To a tamne (09.01.17)
Ekstremnje zeschnyty hodowny štom je so při zapalenju swěčki tak spěšnje wotpalił, zo je bydlensku stwu staršeju mandźelskeju w Mnichowje dospołnje zapusćił. Energija bě tak wulka, zo so škleńca bydlenskich duri pukny a napřećo ležace durje so wułamachu. Ekstremneje horcoty dla pušći so samo dźěl wobmjetka na wjerchu. Škodu trochuje wohnjowa wobora na wjace hac 50 000 eurow. 90lětneho muža dowjezechu do chorownje, dokelž měješe ćeže při dychanju. Mandźelska so njezrani.
Zwada mjez mužomaj při storkanju sněha w hornjofrankskim Hofje je nětko pad za policiju. Jedyn z muži bě sněh před awto susoda zestorkał, štož měješe tón za prowokaciju. Mjetaše tuž sněh tamnemu na dwór. Přiwołana policija wupisa na próstwu wobeju muži w starobje 56 a 75 lět skóržbu nućenja dla.
Reformacija we Łužicy prjedy hač w Sakskej so přesadźiła
Lětsa spominamy na 500. róčnicu reformacije w Němskej, zahajeneje z wozjewjenjom 95 tezow awgustinskeho mnicha a profesora Martina Luthera we Wittenbergu.
Po powěsći je Luther 31. oktobra 1517 swoje tezy přećiwo wikowanju z wotpuskom a přećiwo dalšim njedostatkam w tehdyšej katolskej cyrkwi pječa na durje Wittenbergskeje hrodoweje cyrkwje přibił. Znate je, zo bě wón tele tezy swojemu krajnemu knjezej, kurwjerchej Bjedrichej Mudremu, wučencam tamnišeje uniwersity a sakskemu wójwodźe Jurjej w Drježdźanach pósłał. Z wótrych rozestajenjow z bamžowskej cyrkwju a jeje reprezentantami wuwi so reformacija, kotruž su wosebje měšćenjo, wšelacy zemjenjo a krajni monarchojo podpěrali. Tole dowjedźe k pačenju cyrkwje w Němskej a w dalšich krajach. Jubilejne lěto reformacije zahaji so za Saksku dźensa wječor w Budyšinje ze swjatočnymi ekumeniskimi kemšemi a ze statnym aktom knježerstwa.
Pomjeńšeja wojerske jednotki
Moskwa (dpa/SN). Po zdobyću města Aleppo je ruske wójsko započało swoje wojerske jednotki w Syriskej pomjeńšeć. Jako prěnje maja lětadłonošak z mjenom „Admiral Kuznjecow“, raketynošak „Pjotr Wulki“ a wjacore přewodne łódźe region wopušćić, zdźěli dźensa zakitowanske ministerstwo Ruskeje. Postupowanje njepřekwapja. Hižo kónc decembra bě to zakitowanski minister Sergej Šojgu prezidentej Wladimirej Putinej namjetował.
Planuja digitalnu jězdźenku
Berlin (dpa/SN). Němski zwjazkowy minister za wobchad Alexander Dobrindt (CSU) chce po cyłym Zwjazku elektroniske chipy abo handyjowe tikety jako tak mjenowane digitalne jězdźenki w busach a ćahach zawjesć. Zaměr je, zo so wšitke předewzaća a zwjazki zjawneho wosoboweho wobchada na tym wobdźěla a tak syć wutworja, informuje wobchadne ministerstwo w Berlinje. Hač do lěta 2019 chcedźa wotpohlad we wšitkich němskich městach zwoprawdźić.
Loni jasnje wjac wobrota
Wobdźělnicy tři měsacy trajaceho Měroweho pochoda do Aleppa, na ...
Ströbele: Pad Amrija najručišo wuswětlić
Maksimalna hranica dale rozdwoja
Protestuja přećiwo wotbagrowanju
Kerkojce (dpa/SN). Swój protest přećiwo brunicowym planam zwuraznić chcedźa wobydlerjo wsow Kerkojc, Wótšowaša a Grabka zajutřišim, njedźelu, na tak mjenowanym hwězdnym pochodźe. Sta wobdźělnikow na nim wočakuja. Zarjadowanje, kotrež přewjedu lětsa dźesaty króć, je mjeztym tradicija.
To a tamne (06.01.17)
Pisany powětrowy balon na nócnym njebju je zasadźenje policije pola Brandenburga nad Habolu zawinił. Wutoru wječor běchu zastojnicy wosebity objekt we wysokosći třoch metrow wobkedźbowali. Po krótkim přesćěhanju policija objekt dosahny, zo by jón identifikowała. Balonej připinjena bě cedlka z telefonowym čisłom wobsedźerja. Kaž so wukopa, bě jón třilětny hólčk ze staršimaj z Delnjosakskeje hižo silwester na jězbu pósłał. Nětko bě wón wězo jara wjesoły, zo bě runje policija jeho balon našła.
Nowolětny koncert w Nürnbergu bě za přihladowarja po wšěm zdaću tak wostudły, zo sej tam wusny. Jako ze sona wotući, wón wokoło so biješe, při čimž 600 eurow drohe nawoči susodki rozbi. Přiwołana policija wšak móžeše jeho změrować, zo w tymle padźe žadyn chłostajomny njeskutk njepředleži.
Nadhódnotowy dawk zwyšić
Berlin (dpa/SN). Zwjazkowy zarjad za wobswět žada sej hladajo na škit klimy wyši nadhódnotowy dawk za wudźěłki z mjasa a mloka. Dotal płaća přetrjebarjo w Němskej na nje kaž za druhe zakładne zežiwidła zniženy nadhódnotowy dawk sydom procentow. „Za wudźěłki z mjasa a mloka měł dawk na regularne 19 procentow postupić“, rjekny prezidentka wobswětoweho zarjada Maria Krautzberger nowinarjam dźensa w Berlinje.
Němska njesmě so zawěrać
Berlin (dpa/SN). Dźěłodawarjo a dźěłarnistwa warnuja před zawěranjom Němskeje na reakcije populistiskich tendencow w kraju. „Najebać dobre dźěłowe wobstejnosće so mnozy ludźo starosća a su njewěsći. To je přičina, zo so populizmej wotwěraja“, praji šef Němskeho zwjazka dźěłarnistwow Reiner Hoffmann dźensa w Berlinje powěsćerni dpa. Mjezy njesmědźa so zawěrać, dyrbimy mjezynarodnosći dale wotewrjeni wostać.
Maja wjace zamóženja
