Přežiwjenych našli
Rom/Farindola (dpa/SN). Pomocnicy w italskej zemjerženskej kónčinje Abruzzach su dźensa w zasypanym hotelu Rigopiano šěsć přežiwjenych našli, kotřiž su pak hišće pod rozwalinami, kaž powěsćernja Ansa rozprawja. Prawdźepodobnje běchu so třo mužojo, dwě žonje a holca do małeje rumnosće wuchowali.
Hoberska lawina bě zawčerawšim, srjedu, po zemjerženju hotel zasypała a dźěle domu sobu storhnyła. Po informacijach direktora luksusoweho hotela bě 35 wosobow w twarjenju, kotrež steji 1 200 metrow wysoko. Tež wjacore dźěći su zhubjene. Medije rozprawjeja, zo su pomocnicy mjeztym štyri ćěła chowali. Ciwilny škit rěči wo dwěmaj mortwymaj. Dwě wosobje, kotrejž běštej za čas katastrofy zwonka hotela, móžachu wuchować.
Němscy wojacy maja Rusku wottrašić
Berlin (dpa/K/SN). Rusku cyle přisłušnje wottrašić ma wot NATO nětko 450 wojakow Zwjazkoweje wobory hromadźe z 50 belgiskimi a nižozemskimi wojakami. Woni maja so zaměstnić na wuchodźe aliancy. Němski kontingent bu wčera w hornjobayerskim Oberviechtachu ze swjatočnym apelom rozžohnowany. W přichodnych tydźenjach přepołoža tankowych grenaděrow do něhdyšeje sowjetskeje republiki Litawskeje.
„W minjenych měsacach smy jara intensiwne wukubłanje přešli“, rjekny komander jednotki, podpołkownik Christoph Huber. Wojacy wjesela so na swój „wulki nadawk“. Za NATO so nimo wojakow tež 26 tankow a 170 dalšich wojerskich jězdźidłow na terenje zaměstni, zdalenym něhdźe 100 kilometrow wot ruskeje enklawy Kaliningrad. Tanki dowjezu ze železnicu do Litawskeje. Nad wójskom NATO w Litawskej je Němska komando přewzała.
To a tamne (20.01.17)
Njewšědny policajski škit stej małej dźěsći w Lipsku dóstałoj. Jeju 35lětnu mać bě wčera chorobne awto nuznje do kliniki dowjezło, zo by tam porodźiła. Zo njebyštej samej wostać trjebałoj, doniž njejstaj dźěd a wowka z Durinskeje přijěłoj, so policistaj wo njej staraštaj. Jedyn ze zastojnikow, sam hakle wot njedawna młody nan, dwulětneho fachowsce pjelchowaše. Tamny zaběraše so z pjećlětnym bratrom. Potom so hrajkachu, doniž dźěd a wowka njedojědźeštaj.
Skazanka na sudniske jednanje jězdźenja bjez dowolnosće dla bě to jeničke, štož měješe šofer wosoboweho awta na awtodróze A 43 při sebi, jako jeho policisća zadźeržachu. Přewodźachu jeho na parkowanišćo, dokelž bě za wodźidłom telefonował. Wón pak njeměješe ani wupokaz ani jězbnu dowolnosć při sebi. Město toho pokaza list sudnistwa. Jězbnu dowolnosć hižo wot lěta 2013 nima.
Cyłkowny wobraz hišće njenastał
Mysle wo rozprawnistwje w Budyskim wokrjesnym sejmiku nastupajo serbske naležnosće
Wustawki wo zachowanju, spěchowanju a dalewuwiću serbskeje rěče a kultury z lěta 2008 su zakładny grat, kak z naležnosćemi našeho ludu w Budyskim wokrjesu wobchadźeć. Tohodla je tam zapisane, zo krajny rada kóždolětnje nastupajo zachowanje, spěchowanje a dalewuwiće rozprawja, podawajo při tym aktualny staw zwoprawdźenja wustawkow.
Tójšto kritiki tež w Serbskich Nowinach bě rozprawa lěta 2014 zbudźiła, podata na kóncu wólbneje periody prěnjeho wokrjesneho sejmika 2008 wutworjeneho wulkowokrjesa Budyšin. Tohodla bě so krajny rada Michael Harig (CDU) w oktobrje samsneho lěta w interviewje z SN wo tym wuprajił, kak móhło so tele rozprawnistwo polěpšić. Jeho tehdyše wuprajenja (kursiwnje woznamjenjene) njech su pruwowanišća za to, štož čitamy sprěnja we winowatostnej rozprawje krajneho rady, ale zdruha tež we wuwjedźenjach wokrjesneje społnomócnjeneje za serbske naležnosće Reginy Krawcoweje na posedźenju Budyskeho wokrjesneho sejmika 12. decembra 2016.
Tež wo změnach informować
Lawina hotel zasypała
Rom (dpa/SN). W italskej zemjerženskej kónčinje je lawina sněha hotel zasypała. Wuchowanske mocy z tym liča, zo je tójšto ludźi žiwjenje přisadźiło. Dźensa su pomocnicy, kotřiž běchu so na sněhakach k městnu katastrofy předrěli, mortweho muža z hotela wućahnyli. Tamni wuchowarjo su z awtami dźewjeć kilometrow před tym w sněze tčacy wostali. W hotelu Rigopiano w Abruzzach bě cyłkownje 30 ludźi. Prawdźepodobnje su tam hižo 24 hodźin zasypani.
Prezident přisahu złožił
Sofija (dpa/K/SN). Nowy bołharski prezident Rumen Radew je w parlamenće před nawodu prawosławneje cyrkwje, patriarchom Neofitom, słužbnu přisahu złožił. Zastojnstwo nastupi Ruskej přichileny něhdyši general Radew přichodnu njedźelu. Jedne z jeho prěnich słužbnych naprawow budźe, parlament rozpušćić a přechodne knježerstwo postajić. K politiskej krizy dóšło bě w Bołharskej loni w nowembru z wotstupom kabineta premiera Bojka Borisowa.
Winterkorn: Najćeša kročel
Wopory atentata wopominali
Wulki wuspěch
Wo mjeńšinach informowali
Zastupnicy FUEN w Europskim parlamenće w Strasbourgu
Strasbourg (SN/MkWj). Po wuzwolenju Antonija Tajanija za noweho prezidenta Europskeho parlamenta zawčerawšim, wutoru, su dźensa w Europskim parlamenće w elsaskim Strasbourgu naležnosće mjeńšin tematizowali. Federalistiska unija europskich narodnych mjeńšin (FUEN) bě za to naročny program spřihotowała. Serbow a słowjanske mjeńšiny zastupowaše předsyda Domowiny Dawid Statnik, woleny čłon Europskeho dialogoweho foruma. Dźěło FUEN, najwyšeho zastupnistwa awtochtonych narodnych mjeńšin, předstaji jeje prezident Loránt Vincze. Jeho běchu na lońšim kongresu FUEN we Wrócławju wuzwolili.
Europski dialogowy forum je zhromadny gremij FUEN a młodźinskeje organizacije narodnych mjeńšin MENS. Lěta 2008 załoženy forum wobsteji ze sydom zastupnikow FUEN a dweju zastupnikow MENS kaž tež wobeju prezidentow. Gremij prócuje so wo politiski dialog z Europskim parlamentom. Hłowny zaměr foruma je, zapósłancam parlamenta naležnosće europskich narodnych mjeńšin direktnje posrědkować a spřistupnić.
Zapokazanje zawěsćene
To a tamne (19.01.17)
Pedalej płuna a borzdźidła zaměnił je šofer w myjerni awtow porynsko-pfalcskeho Bad Dürkheima. Kaž w policajskej rozprawje rěka, smaleše 65lětny z awtom po myjerni, při čimž sobudźěłaćerja snadnje zrani. Awto zjědźe přez dróhu hač na parkowanišćo kupnicy. Tam zrazy do parkowaceju jězdźidłow a wosta skónčnje stejo. Cyłkownu škodu trochuja na 70 000 eurow.
Z druheho poschoda wjaceswójbneho domu skočił je muž w Podstupimje, zo by so zajeću wuwinył. Do toho bě chětro wopity nan policistow při durjach wotpokazał, kotřiž za jeho 31lětnym synom z wukazom zajeća pytachu. Tón so na to w kupjeli schowa. Po tym zo běchu nana přewinyli, zastojnicy hrožachu, zo durje kupjele namócnje wotewru. Muž pak z woknom skoči a ćekny. Policisća zajachu jeho krótko na to w pincy.
