Praha (dpa/SN). Poslednich čěskich přežiwjenych holocausta na Romach chce Němska, 70 lět po kóncu wójny, wotškódnić. Po jednanjach z financnym ministerstwom su so na sumu 2 500 eurow dojednali, zdźěli čěske wonkowne ministerstwo w Praze po měsacy trajacych jednanjach. Jónkrótke wupłaćenje móh­ło na dobro dźesać do pjatnaće přežiwjenych holocausta być. „Někotři z nich su na łožo putani“, rjekny Čeněk Růžička, zastupnik wuběrka za wotškódnjenje čěskich romaskich woporow holocausta, powěsćerni ČTK. „Hladajo na jich starobu smy sumje přihłosowali, kotraž je poprawom směšna“, wón kritizowaše. Nimo toho dyrbja wo pjenjezy hišće oficialnje prosyć. We wójnje běchu nacionalsocialisća Romow do dźěłowych a kon- centraciskich lěhwow zawlekli. Jeničce 600 z cyłkownje 6 500 je přežiwi.

Prěnja wukrajna jězba Erdoğana wjedźe do Ruskeje

Istanbul/Berin/Wien (dpa/K/SN). Prezident bě wołał, a ludźo zhromadźichu so ze syłami. Namołwu turkowskeho prezidenta Recepa Tayyipa Erdoğana, demonstrować přećiwo pospytej wojerskeho puča, je njedźelu w Istanbulu wjace hač milion wobydlerjow sćěhowało.

Na manifestaciji zwurazni hłowa stata wuhlad na to, zawjesć smjertne chłostanje. „Jeli lud chłostanje ze smjerću chce, strony jeho wolu spjelnja.“ W tajkim padźe wšak Europska unija připowědźa kónc jednanjow wo přistupje k zhromadźenstwu. Mało přećelnje wupraji so Erdoğan wo Němskej. Wón kritizowaše, zo na turkowskej manifestaciji w Kölnje njedźelu­ tydźenja njeje směł z widejosćěny k zhromadźenym rěčeć. Wumjetowanja, zo hraba wón po zwrěšćenym puču za samoknjejstwom, Erdoğan wuwróći. „Njejsym despot ani diktator.“ Za to wón zapadne staty znowa přimaše, prajo: „Wone njejsu nam pokazali, zo su pře­ćiwo pučej. Jich mjelčenje je njewodajomne.“

Berlin (dpa/SN). Němski čerwjeny křiž žada sej bojowu přestawku za woblěhowane sewjerosyriske město Aleppo, zo móhł tam ludźi zastarać. Nuznje trěbne su pitna woda, žiwidła a lěki, wobkrući rěčnik organizacije dźensa medijam. Połoženje za něhdźe 300 000 wobkruženych woby­dlerjow je so minjene dny „dramatisce pohubjeńšiło“. Po wšej Syriskej dyrbi 6,5 milionow ludźi před wójnu ćěkać. Dwaj milionaj dźěći nimatej žanu šulu. Po­mocne organizacije njemóža so častodosć k ćěkancam předrěć, rěčnik praji.

Dospołnje nahi a pod wliwom drogow stejacy je muž w Magdeburgu awto pokradnyć spytał. Wobsedźer awta bě sobotu wječor policiju wołał, dokelž nahi muž w jeho wozu sedźeše. Ta nańdźe tam chětro zamyleneho 27lětneho. Drasty ležachu w bliskosći awta. Test drogow pola njeho wunjese konop a amfetaminy. Muža­ dowjezechu do chorownje.

45 metrow hłuboko padnyła a tole přežiwiła je psyca w Sakskej Šwicy. Zwěrjo bě ze swojej wobsedźerku po horach po puću­, jako so na nahłej a hładkej skaliznje­ wobsuny a do hłubiny padny. Po 25 metrach štomy a kerki spad trochu borzdźachu­. Pomocnicy so z powja­zami po skaliznje dele pušćichu a žałosćacu psycu skónčnje w skalnej škałbje namakachu. Akcija, při kotrejž su dalši pućowarjo pomhali,­ traješe dlěje hač dwě hodźinje.