Mannheim/Berlin (dpa/SN). Smjerć młodeho policista po nadpadźe z nožom w Mannheimje je po wšej Němskej zludanje zbudźiła. Runočasnje diskutuja wo konsekwencach ataki minjeny pjatk. Mannheimski wyši měšćanosta Christian Specht (SPD) je wukazał, chorhoje před radnicu połwysoko powěsnyć.

Při nadpadźe bě pjatk dopołdnja z Afghanistana pochadźacy pozdatny islamist na torhošću wosrjedź města na zarjadowanju islam kritizowaceho hibanja Pax Europa z nožom šěsć ludźi zranił, mjez nimi policista. 29lětny zastojnik je wčera popołdnju wudychał. Nadpadnik bě jemu z nožom wospjet do hłowy kłół.

Zwjazkowy kancler Olaf Scholz (SPD) piše: Zasadźenje policista za našu wěstotu zasłuži sej najwyše připóznaće. W swojich myslach sym při swójbnych, kiž wo njeho žaruja. Předsyda CDU Friedrich Merz piše: Mordarstwo žada sej razne chłostanje, tež za tych, kotřiž ze skućićelom sympatizuja. Předsyda AfD Tino Chrupalla ma nadpad za sćěh wopačneje migraciskeje a wěstotneje politiki.

Po zliwkach zapławjenja w Bayerskej a Badensko-Württembergskej

Reichertshofen (dpa/SN). Połoženje wulkeje wody dla so w někotrych kónčinach Badensko-Württembergskeje dale přiwótřa, tež w Bayerskej wostanje situacija kritiska. Minjenu nóc wohrožowaše woda w měsće Ebersbach nad rěku Fils juhowuchodnje Stuttgarta wobydlerjow. Zapławjenje běchu bydlensku štwórć docpěli. Zamołwići wukazachu tak mjenowane wurjadne połoženje, Göppinski krajnoradny zarjad dźensa rano zdźěli.

W Bayerskej bě so połoženje wčera wječor we wokrjesomaj Günzburg a Donau-Ries dramatisce přiwótřiło. Tam dyrbjachu wjacore sydlišća ewakuować. Tež přichodne dny liča z dalšimi njewjedrami ze zliwkami.

„STOLZ STATT PRIDE“ steji na nalěpku, kotryž ležeše dźens rano w listowym kašćiku Serbskich Nowin. Wudał je jón młoda alternatiwa, młodźinski zwjazk AfD, kotryž je w Sakskej prawicarsko-ekstremistiski. Strach před wšěm, štož je hinaše, hač „normalna“ swójba, za to su prawicarjo po wšěm swěće znaći. Znaći su woni tež za swoju politiku wumjezowanja a diskriminacije. Po jich měnjenju njeje w towaršnosći ruma za ludźi, kotřiž lubuja čłowjeka samsneho splaha, abo kiž so jako muž abo žona identifikować njemóža. Dołhož nacije jenož bledźa, je to někak ­hišće k wutraću. Strašne pak je, hdyž počinaja woni měrliwe protesty hordych njeheteroseksualnych čłowjekow nadběhować, kaž su to sobotu w Drježdźanach činili. Mjeńšiny, wšojedne hač narodne abo seksualne, su jim potajkim njelube. Strach wobsteji, zo steja prawicarjo snano bórze tež poboku křižerskich procesionow a tute myla. Tući ludźo wumjezuja tež nas Serbow. Maximilian Gruber

Budyšin (SN/MkWj). W Budyskej Tachantskej cyrkwi su minjeny pjatk jurista Jannika Jaschinskeho jako hosća witali. W rjedźe zarjadowanjow „Budyske narěče“ stejachu tónkróć awtoritarne politiske strony a sćěhi jich skutkowanja w srjedźišću. Jaschinski je wědomostny sobudźěłaćer w „Durinskim projekće“, slědźenskim projekće, kiž přepytuje krutosć demokratije a prawostatnosće w Němskej.

W swojim přednošku přepytowaše Jaschinski před něhdźe sto wopytowarjemi, što móhło so stać, hdyž awtoritarna strona nawod krajneho knježerstwa přewozmje. Złožujo so na přikłady w Madźarskej abo Pólskej jurist naliči, kak móža awtoritarne strony z pomocu wobstejacych zakonjow demokratiju podrywać a ju takrjec z demokratiskimi srědkami wotstronić. „Durinski projekt“ běchu załožili, zo bychu tute wuwiće přeslědźili. Jaschinski bě prawniske wědomosće a ludowe hospodarstwo w Heidelbergu, Parisu a Santiago de Chile studował. Wot lěta 2022 iniciatiwa „Budyšin zhromadnje“ rjad „Budyske narěče“ organizuje. Skupina chce ludźi z hospodarstwa, kultury, kubłanja a cyrkwje zjednoćić.