Berlin (dpa/SN). Amplowa koalicija je so po raznych protestach ratarjow na přilubjeny paket wolóženjow na dobro burow dojednała. Kaž frakciscy šefojo SPD, Zelenych a FDP wčera zdźělichu, dźe mjez druhim wo dawkowe wolóženja, mjenje běrokratije a sylnišu poziciju ratarjow w rjećazu dodawanja hač k wobchodam. Zwjazk ratarjow rěčeše wo „pakćiku“ a žada sej dalše kročele.

Nastork wolóženjow běchu cyłoněmske protesty ratarjow přećiwo šmórnjenju agrarnych subwencijow pola diesela. Na to bě knježerstwo SPD, Zelenych a FDP roznjemdrjenym ratarjam dalše wolóženja přilubiło. Tole je knježerstwo do dźensa so zahajaceho zjězda ratarjow w Choćebuzu zwoprawdźiło. Tak budźe buram přichodnje móžno, chabłace wuslědki dobrych a špatnych lět dawkowje zličić a wurunać.

Prezident zwjazka ratarjow Joachim Rukwied rěči wo dawno trěbnych naprawach, kotrež pak njedosahaja. Frakcija CDU/CSU w zwjazkowym sejmje ma dojednanje za „wulke přesłapjenje“.

Jězba wicekanclera a hospodarskeho ministra Roberta Habecka (Zeleni) do Chiny drje njebě zwoprědka ničo druheho hač derje planowana inscenacija. Nichtó chutnje njewočakowaše, zo druhe najwjetše hospodarstwo swěta swoju politiku změni, dokelž jemu minister z Němskeje tole kaza. Terminy w Chinje su mjeztym wažne za nahladnosć, wšako pytaja Zeleni hišće za kmanym kanclerskim kandidatom za klětuše wólby zwjazkoweho sejma. W Pekingu hubu wočinić a tam nastupajo hospodarsku politiku, podpěru Ruskeje we wójnje přećiwo Ukrainje abo w prašenju čłowjeskich prawow měnjenje prajić, je mjeztym dopokaz zmužitosće. Stajnje přitomny nowinski wotrjad je Habecka derje zwobraznił, kaž něhdy Joschku Fischera.

Snano njejsmy w Němskej wot chinskich poměrow ani tak zdaleni: Pola nas policija swójbne swjedźenje rozpušći abo awta zadźerži, dokelž su ludźo wony spěw poskali, kotryž su pjani njedawno na kupje Sylt spěwali ... Marko Wjeńka

Wobchod luksusoweje marki Chanel wurubić chcyli su njeznaći minjenju nóc na Berlinskim Kurfürstendammje w zapadnym dźělu města. Po mjeztym hižo zwučenym wašnju zajědźechu z awtom z wotmachom do wukładneho wokna. Při tym so škleńca wokna a wšelake twory we wobchodźe zničichu. Po prěnich dopóznaćach policije pak su skućićeljo bjez rubizny ćeknyli. Stajnje zaso tam rubježnicy na tute wašnje spytaja, wobchody dosć drohich wudźěłkow wurubić.

Zabłudźeneho šotiskeho turista wuchowali su španiscy policisća w horach kupy Teneriffa. 19lětny dowolnik bě so minjeny pjatk samlutki na naročne pućowanje po horach kupy před zapadnym pobrjohom Afriki podał. Jako so wón po hodźinach njenawróći, wołachu hórsku słužbu. Pomocnicy dospołnje wučerpaneho, ale stroweho muža w skałach namakachu.

Załožer wotkrywaceje platformy so z justicu USA na deal dojednał

Washington (dpa/SN). W lěta trajacej prawniskej ćahańcy załožerja wotkrywaceje platformy Wikileaks Juliana Assangeho dla je k njewočakowanemu přewrótej dóšło. Po pjeć lětach jatby w Londonje su Assangeho – bjeztoho zo by zjawnosć to wulce pytnyła – z jastwa pušćili a z Wulkeje Britaniskeje wupućować dali. Portal je minjenu nóc widejo wozjewił, kiž pokazuje, kak 52lětny na Londonskim lětanišću Stansted do čakaceho ­lětadła zalěze. Oficialne wobkrućenje zamołwitych we Wulkej Britaniskej hišće njepředleži. Pozadk je juristiski deal mjez Assangeom a justicu USA, kotraž bě sej přepodaće Awstralčana žadała. Nětko pak chcedźa so toho wzdać.