To a tamne (12.07.24)
Gigantiski kwas přihotuja tuchwilu w indiskej metropoli Mumbai. Rozměry swjedźenja přirunuja mjeztym z kralowskimi wjerškami we Wulkej Britaniskej. Syn multimiliardara a dźowka wobsedźerja pharma-koncerna chcetaj so zmandźelić. Na wjacore dny trajacy swjedźeń wočakuja bywšeju britiskeju premierministrow Borisa Johnsona a Tonyja Blaira kaž tež filmowcow a dźiwadźelnikow. Policija je wjacore dróhi zawrěła.
Brónje, drogi a kradnjene kolesa namakała je policija w bydlenju 39lětneho w Šwikawje. Za powětrowki a trašawki njeměješe muž trěbne dokumenty. Nimo toho namakachu zastojnicy retle, nože, tesaki a machety. Policiju běchu informowali, zo składuje 39lětny brónje w swojim bydlenju. Při přepytowanju bydlenja namakachu tež crystal, marihuanu, ecstasy a kokain. W bydlenju nadeńdźechu wjacore kradnjene elektriske kolesa.
Diskutuja wo přeprošenju na wólbne forumy
Měli kandidaća stron, kotrež su při wólbach wokrjesneho sejmika nahladne wuslědki docpěli, na podiju forumow Krajneje centrale za politiske kubłanje do wólbow noweho Sakskeho krajneho sejma zastupjeni być?
Budyšin/Drježdźany (SN/at). Swobodni wolerjo w Budyskim wokrjesu čuja so wróćostajeni. „Dźesać procentow płaćiwych hłosow smy při wólbach Budyskeho wokrjesneho sejmika docpěli, smy třeća najsylniša politiska móc w sejmiku“, rjekny Mike Hauschild, jich kandidat we wólbnym wokrjesu 56, našemu wječornikej. Wón je w dispuće ze sobuzarjadowarjom wólbnych forumow, Krajnej centralu za politiske kubłanje. Kandidat Hauschild so boji, zo přiwótřeja so wone wólbne forumy na dwubój najsylnišeju politiskeju mocow, AfD a CDU.
Pellmann žada sej wotmołwu
Berlin/Lwiw (dpa/SN). Zapósłanc Lěwicy w zwjazkowym sejmje Sören Pellmann chce wědźeć, čehodla su jemu jězbu do Ukrainy znjemóžnili. Lipšćanskeho politikarja běchu na dwórnišću ukrainskeho Lwiwa zadźerželi a do Pólskeje wróćo pósłali. „Wočiwidnje maja tam lisćinu ludźi, kotřiž su so kritisce wuprajili a kiž njesmědźa nětko wjace do Ukrainy přińć“, rjekny 47lětny, kiž bě wospjet dodawanje brónjow do Ukrainy šwikał.
Baerbock njekandiduje
Washington (dpa/SN). Annalena Baerbock chce so hladajo na mjezynarodne krizy dospołnje na swój nadawk wonkowneje ministerki koncentrować a nochce kanclerska kandidatka Zelenych być. Tole rjekny politikarka Zelenych na wjerškowym zetkanju Nato we Washingtonje nowinarjam. Po tutym puću móhł so hospodarski minister Robert Habeck z kanclerskim kandidatom Zelenych k wólbam zwjazkoweho sejma klětu nazymu stać.
Steinmeier w bywšim jastwje
Tež dźensa rano su so w španiskej Pamplonje zaso młodźi mužojo z ...
Dwěle Bidena dla dale a sylniše
Washington (dpa/SN). W diskusiji wo strowotnisku a dušinu kmanosć prezidenta USA Joewa Bidena za zastojnstwo je prěni króć demokrat w senaće USA na tym dwělował, hač ma Biden při wólbach prezidenta woprawdźe šansy. Michael Bennet warnuje w rozmołwje ze sćelakom CNN před přemóžacym wuspěchom Trumpa a republikanow we woběmaj komoromaj kongresa. Tež wodźaca politikarka demokratow Nancy Pelosi Bidena indirektnje namołwješe, tola hišće raz wo tym rozmyslować, hač chcył za zastojnstwo prezidenta kandidować.
Dwěle nastupajo Bidena jewja so tež mjez jeho přiwisnikami. Dźiwadźelnik George Clooney rjekny: „Lubuju Joewa Bidena, jako senatora, wiceprezidenta a prezidenta. Tola bój, kotryž Biden dobyć njemóže, je bój přećiwo časej.“
Nowy šef šule policistow
Dalše rakety USA w Němskej
Washington (dpa/SN). USA zesylnja wojerske wottrašenje za škit čłonskich krajow Nato w Europje. Za to chcedźa w Němskej wot lěta 2026 nachwilnje same so orientowace rakety typa Tomahawk a druhe daloko sahace brónje nastajić, rěka w zhromadnym dokumenće USA a Němskeje, kotrež su na kromje wjerškoweho zetkanja Nato wozjewili.
Konkretnje mjenuja tež lětadła wotwobarace rakety SM-6 a jara spěšnje lětace rakety, „kotrež leća wo wjele dale, hač dotalne rakety“.
Prezident USA Joe Biden bě na spočatku ruskeho nadpada na Ukrainu prezencu ameriskich wojakow w Němskej zesylnił, zo by teritorij NATO lěpje škitał. Biden bě stajnje zaso zwuraznił, zo chcyli USA swojeje zamołwitosći wotpowědować a „kóždy centimeter teritorija NATO zakitować“. Z prezidentom Donaldom Trumpom w Běłym domje móhło so tole změnić. Bywši prezident Trump znowa za zastojnstwo prezidenta kandiduje. Jako prezident (2017–2021) bě wón wospjet hrozył, zo USA z Nato wustupja.
Pólska Ukrainje dale pomha
Ministerski prezident Tusk a prezident Zelenskyj zrěčenje wotzamknyłoj
Waršawa (dpa/SN). Pólski ministerski prezident Donald Tusk a ukrainski prezident Wolodymyr Zelenskyj staj bilateralne wěstotne zrěčenje wotzamknyłoj. „Štóž dźensa Ukrainu zakituje, zakituje so sam“, Tusk rjekny.
Ukrainski prezident mjenowaše zrěčenje „naročne“. Dojednanje „je kmane, žiwjenje našich ludźi škitać a so ruskemu njedobru wobarać“, Zelenskyj zwurazni. W zrěčenju je předwidźane, zdźěłać mechanizm, z kotrymž móža „ruske rakety a truty nad teritorijom Ukrainy wottřělić, kotrež do směra na Pólsku leća“.
Nimo toho w zrěčenju steji, zo Pólska móžnosć pruwuje, Ukrainje dalše wojerske lětadła typa MiG-29 přewostajić. Waršawa je Ukrainje hižo dźesać lětadłow tohole typa přepodała. Po ukrainskich medijach dźe nětko wo 14 dalšich lětadłow. Tusk w tym zwisku potwjerdźi, zo dyrbjeli zapadni partnerojo Pólskej najprjedy bojowe mašiny narunać.
Hinaši stil politiki
To a tamne (11.07.24)
Wjace hač 3,6 kilometrow na wuskim powjazu přeprěčił je Jaan Roose z Estiskeje w Italskej. 250 metrow nad morjom balansowaše 32lětny mjez sicilskej kupu a Italskej. Za zapis do Guinnessoweje knihi rekordow přiwšěm njedosahaše: Sto metrow před cilom zhubi Roose runowahu a padny. Wěstotny powjaz jeho dźeržeše. Akrobat čaru hišće doběža. Roose bě prěni čłowjek, kotryž je so na přeprěčenje Messinskeje dróhi zwažił.
Swětłe włosy, wopačne zuby a šnawcar – takle předrasćeny je so Pforzheimski wyši měšćanosta Peter Boch (CDU) mjez ludźi měšał, zo by sej starosće a problemy wobydlerjow naposkał. Won pomhaše w pěstowarnjach, we wuchowanskej słužbje a w měšćanskim zawodźe. Tak porjedźeše hrajkanišća a rumowaše wotpadki, kotrež su ludźi do parka mjetali. Rozprawu pokazuja póndźelu w 20.15 hodź. w RTL.
