W Parisu dóńdźe wčera po wozjewjenju wuslědkow wólbow parlamenta ...
Jednota rentow hišće přewšo zdalena
Najebać přiměrjenje su renty wjelelětnych zawěsćenych na wuchodźe dale jasnje niše hač na zapadźe. Zwjazkarstwo Sahry Wagenknecht žada sej mjez druhim wobmjezowanje dawkow na rentu.
Berlin/Drježdźany (dpa/SN). Za šefowku BSW Sahru Wagenknecht su jenak wulke renty na wuchodźe a zapadźe hišće přewšo zdalene. „1 385 eurow renty w Sakskej po 40 lětach dźěła nima z wukonosprawnym systemom renty ničo činić. Zo rentnarjo w Sakskej přeco hišće 169 eurow mjenje pjenjez dóstawaja hač w zapadźe, pokazuje, zo smy wot jednoty renty daloko zdaleni“, rjekny wona powěsćerni dpa. Mnozy ludźo w Sakskej maja hišće jasnje mjenje w móšni.
„Zakonska renta lědma hišće žiwjenski standard zawěsća, ale woznamjenja za dźeń a wjace wobydlerjow socialny zestup w starobje. A potom přińdźe dawk na rentu hišće k tomu. Štóž změje rentu z mjenje hač 2 000 eurow měsačnje, toho měł fiskus na pokoj wostajić“, žada sej politikarka. Jeje zwjazkarstwo žada sej wyše renty po přikładźe Awstriskeje a wobmjezowanje dawka na rentu.
Cyłoněmska jězdźenka dróša?
Düsseldorf/Berlin (dpa/SN). Wobchadni ministrojo zwjazkowych krajow wuradźuja dźensa na wosebitej konferency w Düsseldorfje wo přichodźe cyłoněmskeje jězdźenki za 49 eurow. Zwjazk njeje hač dotal přizwolene pjenjezy krajam přewostajił, čehoždla so wobchadni ministrojo boja, zo so tiket podróši . Prawdźepodobnje je zwyšenje hišće lětsa wot 1. oktobra trěbne.
Z cyłoněmskej jězdźenku, kotraž wob měsac 49 eurow płaći, móža sobujěducy bliskowobchadne srědki po cyłym Zwjazku wužiwać. Zwjazk a kraje pak dyrbja tiket financielnje podpěrać, štož płaći wob lěto 1,5 miliardow eurow. Wobchadne předewzaća niskich płaćiznow jězdźenkow dla wotpowědnje mjenje pjenjez zasłuža a tuž je tajka podpěra nuznje trěbna.
Poprawom su kraje a Zwjazk płaćiznu lětsa garantowali. „Hižo poł lěta čakamy na to, zo zwjazkowy kancler Olaf Scholz (SPD), swoje přilubjenja dodźerži“, zdźěli bayerski wobchadny minister, Christian Bernreiter (CSU).
Lěwica w Francoskej dobyła
Njewočakowany wuslědk wólbow parlamenta – premier Attal wotstupił
Paris (dpa/SN). Dźeń po njewočakowanym wólbnym wuslědku při wólbach parlamenta dyrbi so Francoska znowa orientować. Politiske nachilenje do prawicarskeho směra je słabše hač myslene. W nowej narodnej zhromadźiznje budźe prawdźepodobnje lěwicarski zwjazk najsylniša móc. Ministerski prezident Gabriel Attal je prěnje konsekwency sćahnył a swój wotstup připowědźił. Nowe jednanja kmane knježerstwo njeje při wšěm wotwidźeć. K tomu so přidruži, zo nimaja lěwicarjo zhromadne nawodnistwo a žadyn program. Runje tak njewěste je, kajke wuskutki změje wólbny wuslědk za přichod Europy a za poměr mjez Francoskej a Němskej.
Zwjazk lěwicarjow Nouveau Front Populaire, wobstejacy z komunistow, socialistow a Zelenych, je sej njewočakowano najwjetši dźěl wšěch 577 mandatow narodneje zhromadźizny zdobył.
Strowy duch pěstowali
To a tamne (08.07.24)
Nowy premierminister Wulkeje Britaniskeje ma so přichodne dny ze šefom na Downing Street rozestajić. Tam knježi mjenujcy kocor z mjenom Larry. Zwěrjo hižo 13,5 lět swěrnje swoje zastojnstwo w domje zdokonja a myše łóji. Nětko budźe kocor šesteho premier ministra na Downing Street dožiwić. Bywši šef knježerstwa Wulkeje Britaniskeje David Cameron bě tehdy Larryja wobstarał, dokelž mějachu ćeže z wulkimi myšemi.
Wohnjowi wobornicy w Malešecach su zatłusnjenu kóčku wuswobodźili. Zwěrjo bě mjez dwěmaj sćěnomaj zapopadnjene, policija wčera zdźěli. Wobsedźer za swojim lubuškom hižo dwaj dnjej pytaše a so skónčnje pola policije přizjewi. Zastojnicy tuž za skoćećom pytachu a nańdźechu je na ležownosći susoda. Po wuchowanju je wobsedźer swoju kóčku zaso sobu domoj wzał.
Orban mandat EU nima
Brüssel (dpa/SN). Šefdiplomat Europskeje unije Josep Borrel je móžny wopyt madźarskeho ministerskeho prezidenta Viktora Orbana w Moskwje raznje kritizował. Wopyt wotměwa so jenož we wobłuku bilateralnych poćahow mjez Madźarskej a Ruskej, zdźěli społnomócnjeny za wonkowne naležnosće EU. Madźarska wukonja drje tuchwilu rotěrowace prezidentstwo, to pak njepředwidźi zastupowanje wonkowneje politiki unije. Tuž Orban žadyn mandat za jednanja nima.
China z firmami rěči
Brüssel/Peking (dpa/SN). Europska unija žada sej cłowny popłatk na elektorawta z Chiny a wobkrući to ze statnej podpěru chinskich awtotwarcow. Jako reakcija na to přepytuje China hižo dlěje přećiwo importowanemu brandyjej z EU. Z firmami, kotrež su wot importowaneho palenca z EU potrjechene, chce China nětko rěčeć. Wotpowědne zetkanje ma 18. julija być, na dnju nachwilneho nabywanja płaćiwosće cłow EU přećiwo w Chinje produkowanym awtam.
Nowa nadźija na přiměr
Etna, najwyši wulkan Europy a wot lěta 2013 dźěl swětoweho ...
Hoberske dobyće strony Labour
London (dpa/SN). Strona Labour je wčerawše wólby parlamenta we Wulkej Britaniskej z hoberskim předskokom dobyła. Wona změje po prognozy BBC 410 ze 650 zapósłancow a frakcija konserwatiwnych Torryjow pomjeńši so na 144 čłonow. W Londonje rěkaše, zo kral Charles III. stronskemu šefej Keirej Starmerej připołdnju nadawk da nowe knježerstwo wutworić. Dotalny premjer Sunak je wólbnemu dobyćerjej rano gratulował.
Starmer je po wólbnym dobyću strony Labour nowostart za kraj přilubił. Wužadanjow ma dosć: statne strowotnistwo NHS přewšo chromi, je přemało bydlenjow, marodne jastwa su přepjelnjene, brexit přewinjeny njeje, fachowcy wšudźe faluja, dowěra do politiki je skažena.
Etat 2025: Ampla přełamk docpěła
Berlin (dpa/SN). Koalicija ample je so na přełamk za zwjazkowy etat 2025 a paket rozrosta dojednała, to je powěsćernja dpa z kruhow koalicije zhoniła. Jednanja kanclera Olafa Scholza (SPD), financneho ministra Christiana Lindnera (FDP) a hospodarskeho ministra Roberta Habecka (Zeleni) trajachu hač do rańšich hodźin.
Dojednanje ke klětušemu zwjazkowemu etatej a financnemu planej hač do lěta 2028 ma za wuměnjenje, zo wobmjezowanje dołha dodźerža. Nuzowe połoženje zwěsćili njejsu, piše dpa.
Paket rozrosta móhł klětu přidatny plus poł procenta wuskutkować, to je 26 miliardow eurow hospodarskeho wukona. Planowane su pospěšene wotpisanja inwesticijow a polěpšena přiražka za slědźenje. Nimo toho chcedźa impulsy za wjace přistajenjow dawać.
Zdobom je so koalicija na zwyšenje dźěćaceho pjenjeza wo pjeć na měsačnje 255 eurow dojednała. Wo samsnu sumu chcedźa hnydomnu přiražku za dźěći swójbow z wobydlerskimi pjenjezami zwyšić. Swobodna suma za dźěći ma so lětsa hišće wo 228 na 9 540 eurow zwyšić, wuchadźa z podłožkow knježerstwa.
