To a tamne (23.07.24)
Połnaheho a napiteho muža je policija w nocy na sobotu w Dortmundźe z 45 metrow wysokeho krana na twarnišću wuchować dyrbjała. 54lětny měješe so za wodźerja twarskeho nastroja. Swědkojo běchu muža wosrjedź nocy w kabinje krana wuhladali. Po tym zo njemóžeše policija jeho přeswědčić, sam z krana zalězć, zasadźichu teleskopowy rěbl. W kabinje krana namakachu alkoholiske napoje. Muž bě chětro napity a jenož spódnje cholowy zdrasćeny.
Protestny camp přećiwo kapitalizmej su punkerojo na kupje Sylt zahajili. Wobdźělnicy su wjace hač 30 stanow njedaloko lětanišća nastajili. Započeli běchu akciju před lětomaj, jako móžachu z jězdźenku za dźewjeć eurow přijomnje na kupu dojěć. Tam protestuja přećiwo gentrifikowanju: Bohačcy kupuja imobilije a domoródnych dale a bóle wutłóča.
Moskwa wuwiće wobkedźbuje
Moskwa (dpa/SN). Po cofnjenju Joewa Bidena z boja wo zastojnstwo prezidenta w USA chce Krjeml w Moskwje połoženje w USA „dokładnje wobkedźbować“. Rěčnik Krjemla Dmitrij Pjeskow w tym zwisku na to dopominaše, zo je prezident Wladimir Putin Bidena jako kandidata zastopnjował, kotrehož móžeš wobličić a kiž je z tym Ruskej wažniši hač Trump. Wólby prezidenta w USA pak su hakle za něšto měsacow, tuž móže so hišće tójšto změnić, Pjeskow rjekny.
Ukrainske truty Rusku trjechili
Moskwa (dpa/SN). Ruski powětrowy škit je po informacijach zakitowanskeho ministerstwa znowa dźesatki ukrainskich trutow wottřělił. Cyłkownje 80 trutow w šěsć regionach su wotpopadnyli a zničili, ministerstwo w Moskwje zdźěla. W Tuapse nad Čornym morjom je k wjacorym detonacijam dóšło. W tamnišim zawodźe energijoweho koncerna Rosneft je woheń wudyrił, kotryž pak móžachu zhašeć. Zawod bě hižo wospjet cil trutow. Jednaja dale wo zastajencach
Něhdźe 20 000 ludźi je wčera na španiskej kupje Mallorca ...
Zeleni chcedźa kandidata
Njewjedra sej wopory žadali
EU wuradźuje wo jězbje Orbána
Brüssel (dpa/SN). Wonkowni ministrojo 27 čłonskich statow EU su so dźensa w Brüsselu k wuradźowanju wo połoženju na Bliskim wuchodźe a w Ukrainje zešli. Na poslednim posedźenju do dowoloweje přestawki chcyše so tež ukrainski wonkowny minister Dmitrij Kuleba w formje widejoweje konferency wobdźělić.
Posedźenje přesahowachu wšelake měnjenja wo jězbje madźarskeho ministerskeho prezidenta Viktora Orbána wójny w Ukrainje dla. Orbán bě so w tym zwisku z ruskim prezidentom Wladimirom Putinom, z chinskim statnym a knježerstwowym šefom Xi Jinpingom a z bywšim prezidentom USA Donaldom Trumpom zetkał. Spočatnje bě Orbán tež ukrainskeho prezidenta Wolodymyra Zelenskeho w Kijewje wopytał.
EU bě na jězbu hněwnje reagowała, dokelž njebě ju Orbán z Brüsselom dorěčał. Prezidentka komisije EU Ursula von der Leyen chce Madźarsku, kotraž Radu EU tuchwilu nawjeduje, ze sankcijemi chłostać. Němska chce z Madźarskej rěčeć a jeje argumenty rozumić.
Nowa šansa přećiwo Trumpej?
Politikarjo Němskeje reaguja wolóženi na cofnjenje Joewa Bidena w USA
Washington (dpa/SN). Wolóženi su politikarjo Němskeje na připowědźenje prezidenta USA Joewa Bidena reagowali, so z wólbneho boja wo prezidentstwo USA wróćo sćahnyć. Wšako dyrbjachu dołho přihladować, kak so ćělnje a dušinje widźomnje wosłabjeny Biden we wólbnym boju bědźi. Nětko so wšitcy prašeja, hač móža demokraća USA Donalda Trumpa tola hišće porazyć. Trump sam reagowaše na připowědź Bidena hněwny. Wón bě so na słabeho Bidena nastajił a bě sej swojeho wólbneho dobyća dospołnje wěsty. Tole móhło so nětko změnić.
Stara mizera železnicy
Dešća dla lětsa mjenje žita
Berlin (dpa/SN). Při zahajenych žnjach žita w Němskej so wuhlady na dobre wunoški poněčim zaćěmnjeja. Zwjazk ratarjow rěči mjeztym wo „skromnym spočatku“ nazymskeho ječmjenja. Wobmyslenja, zo kwalita zorna po mokrym nalěću a zažnym lěću widźomnje ćerpi, su so wočiwidnje zwoprawdźili. Wuchadźejo ze snadneho wunoška nazymskeho ječmjenja a prěnich dalšich wuslědkow žnjow dyrbja z tym ličić, zo spočatk žnjow wočakowane mnóstwo 42 milionow tonow žita 2024 lětsa na žadyn pad njedocpěja.
Tež hrib je nazymskemu ječmjenjej lětsa njewšědnje sylnje zeškodźał, zwjazk ratarjow rozłoži. W najwjace zwjazkowych krajach žně ječmjenja hišće traja, dokelž dyrbjachu dźěła dešća dla stajnje zaso přetorhnyć. Pola druhich družin žita su dotal jenož mało płonin wotžnjeli. Pola rěpika hišće žane spušćomne ličby nimaja. Přichodny wusyw pak budźe wot zwjeselaceho wuwića płaćiznow na wikach pozitiwnje wobwliwowany, je sej zwjazk ratarjow wěsty. Prěnja žnjowa rozprawa zepěra so na informacije 18 krajnych ratarskich zwjazkow.
