Knježerstwo dale w słužbje
Paris (dpa/SN). Francoski prezident Emmanuel Macron je dotalne knježerstwo ministerskeho prezidenta Gabriela Attala prosył, dale w słužbje wostać, doniž njeje nowe knježerstwo pomjenowane. Tole je palast prezidenta po posedźenju kabineta zdźělił. Wšitke politiske strony su namołwjene, so wo zhromadne dźěło w zmysle ludźi prócować. Do toho bě Macron wotstup Attala po wólbnej poražce knježerstwoweho lěhwa při wólbach parlamenta před tydźenjom akceptował.
Wólby bě zwjazk lěwicarjow dobył. Toho nawodźa pak su dospołnje zwadźeni.
Bidena dočasnje nominować?
Washington (dpa/SN). Wosrjedź debaty wo starobje a strowoće prezidenta USA Joewa Bidena nawodnistwo demokratow na tym dźěła, 81lětneho hišće do planowaneho zjězda strony w awgusće na wirtuelnym puću za prezidentskeho kandidata wuzwolić. Zamołwići chcedźa po tutym puću zaručić, zo steji mjeno Bidena při wólbach w nowembru woprawdźe we wšitkich zwjazkowych statach na wólbnym lisćiku. Mjez demokratami w kongresu tute postupowanje kritizuja.
Biden steji tuchwilu swojej starobje a dwělow strowotneje kmanosće dla pod masiwnym ćišćom w rjadach swojeje demokratiskeje strony. Wjacori zapósłancy běchu jeho minjene tydźenje namołwjeli, bój wo zastojnstwo prezidenta skónčić a wotstupić. Druzy zwuraznjeja swoje starosće hladajo na šansy Bidena. Tón prezentuje so dotal bojowniski.
81lětny Biden bě předwólby pola demokratow bjez chutnych přećiwnikow dobył. Nětko dyrbja jeho hišće na wulkim zjězdźe strony srjedź awgusta w Chicagu oficialnje nominować.
Njewjedro festiwal skónčiło
Wichory a zliwki w Słowakskej škody zawostajili a sej wopory žadali
Trenčín (dpa/SN). Koncert pod hołym njebjom w słowakskim Trenčínje su minjeny pjatk dočasnje skónčić dyrbjeli, po tym zo bě njewjedro wšón areal zapusćiło a wjacorych wopytowarjow zraniło. Dokelž njemóžachu fachowcy w běhu 24 hodźin zwěsćić, hač je wěstota wopytowarjow hišće zaručena, su program přetorhnyli a ludźi domoj pósłali, tak medije rozprawjeja. Ludźo rozsud zarjadowarja chcyjo nochcyjo akceptowachu a festiwalne swjedźenišćo w běhu dnja wopušćichu.
Festiwal „Pohoda“ na terenje Trenčínskeho lětanišća běchu štwórtk zahajili. Po planje chcychu jón sobotu wječor z wulkim koncertom zakónčić. Zarjadowanje, na kotrymž mějachu wuměłcy kaž James Blake, skupinje Morcheeba, Black Pumas a słowakski spěwar Richard Müller wustupić, bě na 30 000 přihladowarjow wusměrjeny.
Pjatk wječor bě so při sylnym njewjedrje stan zwjezł. Po informacijach medijow běchu sej wjacore sta wopytowarjow do stana wućeknyli. Pomocnicy pytachu z psami a ćopłotnymi kamerami za ludźimi pod hoberskej stanowej planu.
Signale słabosće
Youtube kanal Compact wotpinył
Berlin (dpa/SN). Po zakazu časopisa Compact přez zwjazkowe nutřkowne ministerstwo je tež Youtube wotpowědne wobsahi na swojej widejowej platformje zawrěł. Dotal su dwaj kanalej wotpinyli, kotrež maja z magacinom Compact činić, internetne předewzaće z USA na naprašowanje powěsćernje dpa zdźěli. Štóž je wčera wječor na platformje za wobsahami w zwisku z Compact pytał, tón je zhonił, zo njeje kanal ze statysacami abonentami hižo wjace přistupny.
Zakaz běchu wčera rano wozjewili. Wot zwjazkoweho zarjada za wustawoškit jako prawicarsko-ekstremistiski zastopnjowany magacin Compact njesmě hižo dlěje wuchadźeć. Zwjazkowa nutřkowna ministerka Nancy Faeser (SPD) bě magacin zakazała. Bydlenja zamołwitych su přepytowali. Faeser magacinej wumjetuje, zo je „centralny rěčny organ prawicarskeje sceny“ a zo přećiwo Židam a migrantam šćuwa. Šefredaktor Compact Jürgen Elsässer rěčeše porno tomu wo dotal njesłyšanym zasahnjenju do nowinarskeje swobody a rjekny reporteram: „Štož dźensa w BRD mamy, je njedemokratiski režim, kaž bě to režim SED.“
Wjace pjenjez elektrikarjam
To a tamne (17.07.24)
Jědnaće tonow sadu – rozdźěłanu na solotej – chce wulkowikowar sadu w Berlinje składnostnje 75lětneho wobstaća zawoda nadźěłać a jako swětowy rekord zapisać dać. Rozkrać maja sad dobrowólni pomocnicy. Solotej chcedźa potom Berlinskej tafli přepodać, zo bychu ju potrěbnym rozdźělili. Dokelž njemóže tafla telko sadu naraz přetrjebać, chcedźa dźěl sami předźěłać. Zawod Fruchthof běchu 1949 w zapadnym Berlinje załožili.
Na wšě štyri tony kokaina namakali su cłownicy w Paraguayu. Wopojny jěd bě w měchach cokora schowany a za jězbu w kontejneru z łódźu do belgiskeho Antwerpena přihotowany. Kokain je w Europje něhdźe 220 milionow eurow hódny. Nimo USA su w Europje najwjetše wiki za drogi z łaćonskoameriskich krajow Kolumbiskeje, Peru a Boliwiskeje. Loni su w Europje 300 tonow kokaina sćazali.
Ukrainske truty trjechja Kursk
Kursk (dpa/SN). Při nócnych ukrainskich nadpadach z trutami je w fabrice w zapadno-ruskim Kursku woheń wudyrił. Nichtó njebu zranjeny, guwerner Alexej Smirnow zdźěla. W fabrice produkuja elektriske nastroje snadneje napjatosće. Při nadpadźe truta na sydlišćo Tjotkino njedaloko ukrainskeje mjezy je so wobydler zranił. Nadpady trutow registrowachu tež w Belgorodźe, Rostowje a Woronježu. Ruske zakitowanske ministerstwo zdźěla, zo su 13 trutow wottřělili.
AfD chce 40 procentow
Drježdźany (dpa/SN). Za wólby krajneho sejma w Sakskej 1. septembra je sej AfD wuslědk 40 procentow a wjace předewzała. Wólby Europskeho parlamenta, při kotrychž bu AfD w Sakskej z 31,8 procentami najsylniša móc, su stronje nowy rozmach spožčili, rjekny načolny kandidat Jörg Urban. Strona chce w Sakskej knježerstwo přewzać. Na Drježdźanskim Hrodowym naměsće zahaji AfD přichodnu sobotu oficialnje swój wólbny bój.
Kritizuja skrótšenja etata
Donald Trump (nalěwo) je jako runje wuzwoleny kandidat republikanow ...
Faeser zakazuje prawicarski magacin Compact
Berlin (dpa/SN). Zwjazkowa nutřkowna ministerka Nancy Faeser (SPD) je wot zwjazkoweho zarjada za wustawoškit jako prawicarsko-ekstremistiski zastopnjowany magacin Compact kaž tež filmowe předewzaće Conspect zakazała. Policija je dźensa rano wjacore rumnosće organizacije kaž tež bydlenja wodźacych akterow, jednaćelstwa a sobuwobsedźerjow w Braniborskej, Hessenskej, Sakskej a Saksko-Anhaltskej přepytowała.
Zaměr racije je, sćazać dopokazy a zamóženja, w zdźělence rěka. Faeser je swój rozsud z tym wopodstatniła, zo je Compact „centralny rěčny organ prawicarskeje ekstremistiske sceny“, kaž wona rjekny. „Tutón magacin šćuwa na njeznjesliwe wašnje přećiwo Židam, ludźom z migraciskim pozadkom a přećiwo našej parlamentariskej demokratiji.“ Zakaz pokazuje, zo postupujemy tež přećiwo „duchownym zapalerjam, kotřiž šěrja klimu hidy a namocy přećiwo ćěkancam a migrantam w kraju a kiž chcedźa naš demokratiski stat přewinyć“.
