Podstupim (SN). Braniborski krajny sejm je minjeny kónc tydźenja naćisk nastupajo wobchadźenje ze sćěhami wudobywanja brunicy jednohłósnje schwalił. Přichodnje nimaja tuž w Braniborskej wjace žane hoberske jězory po brunicowych jamach nastać. „Při planowanju brunicy maja w hórnistwowym a wodoprawniskim nastupanju na to dźiwać, zo su nowe jězory po wulkosći, połoženju a formje tak zapołožene, zo so přichodnje tak mało wody kaž móžno wupari“, rěka wo wobzamknjenju. Tak je wjetšina parlamenta poručenju Zeleneje ligi wotpowědowała. Wobswětoškitna syć zastupuje tele žadanje hižo wot lěta 2015. W awgusće 2020 bě wona wot­powědny poziciski dokument ze žadanjemi na aktualne planowanske procesy we łužiskim brunicowym rewěrje předpołožiła.

Drježdźany (dpa/SN). Krajny zarjad za wustawoškit Sakskeje wobhladuje AfD po informacijach powěsćernje dpa wotnětka jako „podhladny pad“. Tak je móžno stronu ze srědkami tajnych słužbow dohladować, na přikład telefonaty wotposkać abo tajnych wuskušowarjow zasadźić. Oficialne wobkrućenje informacije ze stron zarjada dotal nimaja.

Zwjazkowy předsyda AfD a zapósłanc Sakskeho krajneho sejma Tino Chrupalla rěči w tym zwisku wo „wólbnotaktiskim manewrje. Při tym dźe wustawoškitej a krajnemu knježerstwu jeničce wo to, najwjetšu opozicisku stronu w swobodnym staće w politiskim wubědźowanju wočornić.“ Ludźo w swobodnym staće pak su kmani to spóznać.

Městopředsyda sakskeje AfD Siegbert Droese mjenuje postupowanje wustawoškita „dotal njesłyšany politiski skandal“. Strona chce so tomu ze wšěmi juristiskimi srědkami wobarać. AfD ma w Sakskej něhdźe 2 600 čłonow. Wona je po wólbach krajneho sejma 2019 ze 27,5 procentami druha najsylniša móc.

Wuradźowanje wo šćěpjenju ludźi přećiwo koronawirusej žněje kritiku

Berlin (dpa/SN). Wčerawši tak mjenowany „šćěpjenski wjeršk“ zwjazkoweje kanclerki Angele Merkel (CDU) z ministerskimi prezidentami a dalšimi zastupnikami zbudźa dosć rozdźělne reakcije. Předewšěm opozicija je njespokojom.

Frakciski předsyda Zelenych Anton Hofreiter rjekny nowinarjam: „Tónle wjeršk je misnjenja knježerstwa wotkrył.“ Wot zwjazkoweho knježerstwa a Europskeje komisije sej wón žada, zo matej při wobstaranju seruma zhromadnje postupować. Zwjazkowe knježerstwo dyrbjało nastawace přidatne inwesticije producentow k přerjadowanju produkcije „wulkomyslnje“ přewzać a firmam garantować, zo jim wšón serum wotewza.

Drježdźany (dpa/SN). Sakska wočakuje nětko w februaru šćěpiwo pře korona­wirus za 120 000 ludźi. „Pola firmy ­Biontech smy 157 000 dozow, pola Astraze­neca 74 000 a pola Moderna 13 200 ­dozow skazali“, je sakske socialne ministerstwo wčera na naprašowanje medijow zdźěliło. Cyłkownje liči swobodny stat z 244 200 dozami seruma a tak z wjace hač poprawom připowědźene. Po staršim stawje planowanja bě dodawanje 136 000 dozow předwidźane.

Po informacijach ministerstwa je wot zahajenja šćěpjenja 27. decembra 88 576 ludźi w Sakskej prěnju sykawu dóstało a 16 322 mjeztym tež druhu. Socialne ministerstwo swobodneho stata potwjerdźi, zo njeje roz­dawanje terminow tuchwilu dospołnje přetorhnjene. Njejsu-li mobilne šćěpjenske mustwa abo šćěpjenske centrumy serum w běhu dnja přetrjebali, přińdu hnydom nowe terminy do knihowanskeho systema. Dyrbjało-li hišće wjace šćěpiwa k dispoziciji być, móhli hnydom tež wjace terminow šćěpjenja rozdawać. Hłowne ćežišćo pak je přeco hišće zastaranje wobydlerjow starownjow a hladarnjow ze serumom.