To a tamne (25.02.21)
Rozhłosowy sćelak za žony chcedźa srjedź lěta po wšej Němskej na runinje DAB+ zarjadować. Ideju za to měješe Lipšćanska firma Teutocast. Statistisce je dopokazane, zo žony časćišo a dlěje rozhłós słuchaja, zdźěli jednaćel firmy. Chcedźa tuž z wosebitym programom žonam „medialnu domiznu“ skićić. Program ma tež internetnje přistupny być. Nawodnicu za njón hišće pytaja.
Tři tydźenje za swojim awtom pytał je muž w Osnabrücku. 62lětny z wjesneje kónčiny bě 3. februara termina dla do města přijěł a awto chwatnje w jednym z parkowanskich domow wotstajił. Pozdźišo pak wjace njewědźeše, hdźe. Zhromadnje z dźowku je wjacore razy do Osnabrücka jěł, zo byštaj wšitke parkowanske domy w bliskosći – cyłkownje 15 – přepytałoj. Hakle po namołwje w nowinje su awto našli.
Prěnje sebjetesty přizwolene
Bonn (dpa/SN). Zwjazkowy institut za lěki a medicinske wudźěłki je prěnje tři wurjadne dowolnosće za sebjetesty na koronawirus přizwolił. Pola wšitkich třoch testow bjerješ sej sliny z prědnjeho dźěla nosa. Test móže kóždy lajk sam přewjesć, kaž institut zdźěli. Zakład je zrozumliwa přiručka, kak nastroj wužiwać. W zwjazkowym instituće bě hač do 12. februara nimale 30 próstwow wo wurjadne přizwolenje sebjetestow dóšło.
Pólska připowědźa kontrole
Waršawa (dpa/SN). Pólske knježerstwo planuje kontrole na mjezy k Čěskej a Słowakskej. Hladajo na epidemiologiske połoženje chcedźa nadróžny wobchad na južnej hranicy Pólskeje wobmjezować, informuje minister za strowotnistwo Adam Niedzielski. Naprawy maja wot soboty płaćić. Do kraja směš potom jenož hišće z negatiwnym koronatestom. Přiběraceje ličby infekcijow dla chcedźa nimo toho před tydźenjomaj wobzamknjene wolóženja cofnyć a hotele kaž tež sněhakowanske areale zaso zawrěć.
Pragmatisce postupować
Prosy wo sćerpnosć posudka dla
Berlin (dpa/SN). Předsyda Němskeje biskopskeje konferency Georg Bätzing je nastupajo předźěłanje aferow splažneho znjewužiwanja w Kölnskim arcybiskopstwje wo sćerpnosć hač dosrjedź měrca prosył. Limburgski biskop wčera w telewiziji ARD připowědźi, zo chcedźa potom nowy posudk wozjewić. „Tuž nam ničo njezwostanje hač čakać, zo 18. měrc přińdźe. Potom budźemy wšitcy mudriši.“
Kölnski kardinal Rainer Maria Woelki bě prěni posudk wo wobchadźenju zamołwitych biskopstwa z padami znjewužiwanja skazał, njeje pak jón wozjewił. Město toho je dalši posudk zhotowić dał a zdobom připowědźił, zo chcył jón bjez wahanja wobšěrnje wozjewić.
Šćěpja wotnětka kubłanski personal
Berlin (dpa/SN). Wučerjo/wučerki a kubłarki/kubłarjo móža so wot dźensnišeho pře koronu šćěpić dać. To je zwjazkowy minister za strowotnistwo Jens Spahn (CDU) wčera připowědźił. Wotpowědny wukaz po informaciji strowotniskeho ministerstwa wot dźensnišeho płaći.
Jens Spahn lubi sej ze šćěpjenja „přidatnu wěstotu“ w tajkich wobłukach, hdźež njehodźi so stajnje wěstotny wotstawk dodźeržeć. Wužiwać ma so šćěpiwo firmy Astrazeneca, kotrež w zwjazkowych krajach składuja. Kaž strowotniske ministerstwo zdźěli, su kraje 1,4 milionow dozow seruma dóstali, dotal pak jenož 212 000 trjebali.
Wjace serbskich projektow zapřijeć
Budyšin (SN/MkWj). Parlamentariska přirada Załožby za serbski lud je so předwčerawšim, póndźelu, prawidłownje schadźowała, koronapandemije dla internetnje. Wobdźělnicy – zapósłancy, zwjazkoweho sejma, krajneju sejmow Sakskeje a Braniborskeje kaž tež zastupnicy wobeju knježerstwow – zaběrachu so spočatnje z financnym połoženjom załožby. Na wuradźowanju wobdźělištaj so tež předsydka załožboweje rady Susann Šenkec a direktor załožby Jan Budar, kaž předsyda parlamentariskeje přirady, Budyski zapósłanc CDU w Sakskim krajnym sejmje Marko Šiman, zdźěli.
Wobšěrnje rozjimowachu wobdźělnicy strukturnu změnu we Łužicy. Přezjedni sej woni běchu, zo dyrbjeli serbske projekty bóle zapřijeć a zo je w tym nastupanju hišće tójšto dźěła.
Jan Budar informowaše wo dotalnym wuwiću na polu digitalizacije a modernych medijow a wo dalšich nadawkach. Dźakowano přidatnym pjenježnym srědkam móžachu wot lěta 2015 hižo něštožkuli zdokonjeć. Přichodnje budźe wažne technologiski předskok wulkich porno mjeńšinowym rěčam, kaž serbskeje, krok po kroku nachwatać.
Do čorneho trjechili
Lěs ekologisce wobhospodarjeja
Přepytuja přećiwo demonstrantam
To a tamne (24.02.21)
Dale hač 80 metrow pod lodom nurił je Čech David Vencl w zamjerznjenym kupanskim jězoru pola Teplic. Sportowc njeje při tym žane pomocne srědki kaž pjericy (Flossen) wužiwał a bě jenož w kupanskich cholowach. Za čaru trjebaše wón 1,35 min., mjenje, hač bě sej myslił. Vencl nadźija so nětko zapisa w Guinnessowej knize rekordow. Dotalny swětowy rekord nurjenja pod lodom bjez pjericow a škitneho wobleka bě Dana Stig Severinsen lěta 2013 ze 76 metrami nastajił.
W myjerni awtow tčacy wostał je šofer transportera w Crimmitschauwje. 43lětny njebě wobkedźbował, zo je připrawa na 2,40 metrow wysoke jězdźidło wobmjezowana. Transporter pak bě wjele wyši. Jako program startowaše, bu třěcha zatłóčena a chětro wobškodźene awto wosta w připrawje wisajo.
W dialogu najprjedy pozicije zwěsćić
Na mjeztym 21. posedźenju Serbskeho sejma wobdźělichu so minjenu sobotu znowa podpěraćeljo a wjacori hosćo z europskeje, krajneje kaž tež wokrjesneje runiny.
Njebjelčicy/Drježdźany (SN/at). Wo zjawnoprawniskich zrěčenjach a strukturach k rozdźělenju přilubjenych srědkow w zwisku z kóncom wudobywanja brunicy kaž tež wo swojich naprašowanjach k njeličenym njejasnym detailam je zapósłanča Sakskeho krajneho sejma Antonia Mertsching na znowa wirtuelnje přewjedźenym posedźenju Serbskeho sejma rozprawjała. Sejm bě politikarku Lěwicy přeprosył. Jako serbskopolitiska rěčnica swojeje frakcije so wona dale zwólniwa wupraja, podpěrać objektiwne zwěsćenje stawa nastupajo aktualne połoženje serbskeho kubłanja w Sakskej kaž w Braniborskej po parlamentariskim puću. To Serbski sejm w nowinskej zdźělence piše.
