Iniciatorow projektow idejoweho wubědźowanja „Rěč zwjazuje“ mytowali
Budyšin (SN/bn). „Rěč je naše najwyše kubło. Z njej so rozestajeć a ju z nowymi srědkami a po nowych pućach naslědnje šěrić je hłowny zaměr wubědźowanja ‚Rěč zwjazuje – Rěc zwězujo – Sorbisch verbindet‘. Wjeselimy so, zo móžachmy je mjeztym třeći raz wuhotować a zo bu wospjet wuběrnje přiwzate.“ Z tymile słowami zahajištaj předsyda załožboweje rady Marko Kowar a zastupowaca direktorka Załožby za serbski lud Michaela Mošowa minjeny pjatk mytowansku ceremoniju mjenowaneho wubědźowanja na žurli Budyskeho Serbskeho domu. Syman Hejduška a Hanka Rjelcyna ju hudźbnje wobrubištaj. Cyłkownje 50 idejow z cyłeje Łužicy bu zapodatych, 17 z nich bu z mytami w hódnoće dohromady 70 000 eurow wuznamjenjenych. Dr. Anja Pohončowa podšmórny w mjenje jury, zo bě hladajo na kwalitu a wjelorakosć namjetow proces pruwowanja a mytowanja „spore, ale jara zajimawe dźěło“.
Jewišćowy bal, kotryž Němsko-Serbske ludowe dźiwadło a Serbski ludowy ansambl zhromadnje wuhotujetej, słuša kóždolětnje k nazymskim wjerškam wobeju institucijow. We wulkim domje NSLDź dožiwichu hosćo pjatk a sobotu pod hesłom „Die Wunderlandrevue“ po swjatočnej hosćinje galaprogram z wurězkami inscenacijow, kaž na přikład „Alice im Wunderland“ (na foće), z hudźbnymi chłóšćenkami orchestra SLA a z přinoškami klankodźiwadła. Kaž so za bal słuša, sej hosćo někotryžkuli walčik zarejowachu, doniž wječoraj ze šlagrami a znatymi popowymi štučkami, zahratymi wot dźiwadłoweje band, njewuklinčeštej. Foto: Roman Koryzna
Druhe wolejbulowe mustwo holcow a žonow Viktorije Worklecy je sobotu we Wojerecach přećiwo prěnjemu mustwu Módro-běłych Wojerecy z 3:0 (25:20, 25:21, 25:20) dobyło a so na druhe městno tabulki wobwodneje klasy Wuchodna Sakska polěpšiło. Kapitanka Diana Hajnec bu jako najlěpša Worklečanska hrajerka wuznamjenjena. Foto: Konstantin Hrjehor
Kandidatka za prezidentku Chile Jeannette Jara rěči po wčerawšim prěnim wólbnym kole prezidentskich wólbow k swojim přiwisnikam. Zastupnica lěwicarskeje koalicije a čłonka komunistiskeje strony bě wólby ze 26,7 procentami dobyła. Jeje konserwatiwny konkurent Jose Antonio Kast docpě 24,1 procent. Z tym dyrbitaj wobaj do dalšeho wólbneho koła. Foto: dpa/Lucas Aguayo Araos
Metod Šołta steji na čole 54. póstniskej sezony w Serbskich PazlicachNjebjelčicy (AKr/SN). Runje tak kaž w druhich hornjołužiskich póstniskich regionach je tež Serbskopazličanske karnewalowe towarstwo minjenu wutoru nowu, mjeztym hižo 54. póstnisku sezonu zahajiło. W Njebjelčanskim gmejnskim zarjadnistwje je wjesnjanosta André Bulank princowskemu porej Clemensej II. a Andreji III. symboliski kluč a pokładnju přepodał. Štó pak budźe nowy princ 54. sezony, to bu hakle sobotu wječor na wólbach noweho princa w Njebjelčanskej Bjesadźe přeradźene. Z wjele prócu je towarstwo zaso přewšo pisany a lóštny program k wjeselu a zabawje publikuma na nohi stajiło.
Sobotu tak daloko je: W Budyskej Krónje zeńdu so serbscy wuknjacy a studowacy na swoju 151. schadźowanku. Prěni raz staj studentaj Milena Wowčerjec a Maximilian Gruber za program zamołwitaj. Milan Pawlik je so z naposledk mjenowanym rozmołwjał.Kak je k tomu dóšło, zo sy hromadźe z Milenu Wowčerjec naročny nadawk režije programa schadźowanki přewzał?M. Gruber: To bě móhłrjec připad. Naju předchadnikaj, Katka Pöpelec a Syman Hejduška, staj so najprjedy Mileny woprašałoj. Lětsa na folklornym festiwalu smój so potom móhłrjec spontanje zhromadnje rozsudźiłoj nadawk přewzać.Pod kotrej temu steji lětuši program? Změjetaj wosebitu překwapjenku abo nowostku za publikum?M. Gruber: Prašenje, z kotrymž chcemy so lětsa intensiwnje zaběrać, je, što schadźowanka za nas docyła je. Tomu so wšelke dypki programa wěnuja. Wo překwapjenkach nětko hišće ničo prajić njemóžu, wšako hewak překwapjenki njejsu. Publikum pak smě so na tu abo tamnu nowostku wjeselić.Kelko sobuskutkowacych schadźowanka změje? Kotr ...
