Erfurt (dpa/SN). Młoda unija Durinskeje je sej wurjadny stronski zjězd CDU w kraju žadała – zwjazany z nowowólbami krajneho předsydstwa. Zo by sej strona nowu dowěru zdobyć móhła, je trjeba, tež wo personalnych prašenjach rěčeć, rěka w zjawnym lisće krajneho předsydstwa Młodeje unije. „Nowowólby krajneho předsydstwa mamy za njewobeńdźomne, dokelž trjebamy za nowozapočatk tež nowe wobliča.“

Awtorojo lista rěča wo žołmje wustupow ze strony, štož jich jara znjeměrnja. Krajny předsyda Mike Mohring steji po wjele diskutowanym wuzwolenju Thomasa Kemmericha (FDP) pod ćišćom.

Po najnowšim woprašowanju je Lěwica po wólbnym debaklu w Durinskej tójšto hłosow přidobyła. Tak by wona aktualnje 39 procentow hłosow dóstała, wosom wjace hač w oktobru. Zhromadnje z SPD (10 %) a Zelenymi (5 %) by to za wjetšinu w sejmje dosahało. Porno tomu by CDU runje hišće 13 procentow měła. FDP by ze štyrjomi procentami z krajneho sejma zlećała.

Twarc elektroawtow podłožki zapodał – nowe protesty w Grünheide

Podstupim (dpa/SN). Twarc elektroawtow Tesla z USA je, kaž běchu wočakowali, próstwu wo spěchowanske srědki za nowu twornju w Grünheide pola Berlina zapodał. Tole je šef předsydstwa za to přisłušneje inwesticiskeje banki kraja Braniborskeje, Tillmann Stenger, w Podstupimje zdźělił. „Podłožki nětko spochi wudospołnjeja.“ K přizwolenju trjebaja hišće inwesticiski plan.

Wo wysokosći spěchowanskeje sumy nochcyše Stenger hišće ničo rjec. Wón pak z toho wuchadźa, zo póńdźe wo wjace hač sto milionow eurow. Trěbny je tež nuzowy financny koncept, kotryž maja komisiji EU w Brüsselu zapodać. Tole wokomiknje přihotuja. Tesla chce w Grünheide nowu twornju natwarić a tam wot julija 2021 kóždolětnje hač do 500 000 jězdźidłow typa Model 3 a Y kaž tež druhich modelow twarić. Tuchwilu přewjeduja přirodoprawniske přepytowanja.

Minjeny kónc tydźenja su přećiwnicy planowaneje wulkotwornje w Grünheide demonstrowali. Po informacijach zarjadowarjow je so něhdźe 120 ludźi na tym wobdźěliło. Demonstracija wotmě so měrniwje.

Runja mjeńšinowej radźe tež ja registrowanje přisłušnosće k mjeńšinam w policajskich statistikach wotpokazuju. Mam podawk Berlinskich policistow, kotřiž běchu přisłušnosć k narodnej mjeńšinje za statistiku kriminality w swojim měsće wosobam přidali, za njesłyšany skandal a ranjenje zakonjow. Z kotrym prawom su to scyła činili? Njeje w Němskej runje tajke zapisowanje zakazane a njepłaći tu wu­znawanski princip – potajkim, štóž so jako Serb wuznawa, je Serb? Po mojim měnjenju njeje wšak to jenož ranjenje zakonjow, ale zdobom diskriminacija w njesłyšanym rozměrje. Wšako njejsu Berlinscy zastojnicy jenož přisłušnosć k mjeńšinje zapisali, ale ju tež za swoje rozprawy wo njeskutkach – kotrež běchu sprawnje prajene z 80 wob lěto směšnje snadne – wužiwali. Tak syja, hač wědomje abo njewědomje, hidu napřećo druhim ludam a připisuja jim negatiwne kajkosće. To njesměmy akceptować! Janek Wowčer

Chětro wojerski póstniski kostim je w Karlsruhe zasadźenje policije zawinił. Kaž policija rozprawja, bě 22lětny muž z „třělbomaj“ wobrónjeny do tramwajki zalězł. Woblečeny bě čorny škitny lac, kaž jón ameriski FBI wužiwa. Policisća muža po pokiwje sobujěducych při zastanišću w nutřkownym měsće zajachu. Brónje wukopachu so jako hrajki. Při přepytowanju namakachu zastojnicy hišće kapsnej nožej. Muž dyrbi ze skóržbu ličić.

W hosćencu dźěćo porodźiła je młoda žona w Oberhausenje – bjez lěkarja, za to z pomocu pinčnicy a wobsedźerki lokala. Prjedy hač lěkar dojědźe, bě mała Angelina na swěće. W hosćencu swjećachu runje šlagrowu party. Ludźo na žurli ani njepytnychu, što so na toaleće stawa. Hakle, jako nuzowy lěkar přijědźe, wo porodźe zhonichu. „Mać a dźěćo dóstaštaj aplaws swojeho žiwjenja“, medije pisaja.