Kopenhagen (SN). Hdyž je społnomócnjeny zwjazkoweho knježerstwa za prašenja wusydlencow a narodnych mjeńšin Hartmut Koschyk (CSU) jako statny sekretar na oficialnym wopyće w Kopenhagenje, je to wob­kedźbowarjam jasne znamjo, zo so Němska za wobchadźenje Danskeje z němskej mjeńšinu zajimuje. Posrědkował bě třidnjowski wopyt, kiž so dźensa skónči, informaciski běrow kulturneho nošerja danskeje mjeńšiny w Južnoschleswigskej Sydsle­svigsk Forening, piše mjeńšinowy sekretariat w nowinskej zdźělence. Z teje přičiny steješe danska mjeńšina w Němskej runje tak na programje kaž němska mjeńšina w Sewjeroschleswigskej. Při tym zetka so Koschyk tež z němskim wulkopósłancom w Danskej Clausom Robertom Krumreiom a z direktorom němsko-danskeje wikowanskeje komory Reinerom Perauwom. Temy rozmołwow běchu dobre­ poćahi wobeju krajow a połoženje mjeńšin w pomjeznej kónčinje. W Kopenhagenje wopyta Koschyk mjez druhim zwjazk Sewjeroschleswigčanow.

Wustawowe sudnistwo Čěskeje republiki je žadanje wobydlerja wotpokazało, swójske „wosobinske identifikaciske čisło“ změnić. Požadar ma dźě w dokumentach muski splah zapisany, po swójskim wuprajenju čuje pak so jako žona. Dokelž móžeš z čěskeho identifikaciskeho čisła splah wučitać, čuje so skóržbnik z přirjadowanjom k mužam „trawmatizowany“.

Dźakowano swojemu dobremu čuchej staj policistaj plantažu konopja namakałoj. W vogtlandskim Muldenhammeru jimaj wčera spodźiwna wóń napadny. Slědujo podhladnu wóń dóńdźeštaj ke kólni. Při přepytowanju tepjeneho twarjenja nańdźeštaj wjace hač 50 rostlin konopja (Canabis). Kólnja steji na ležownosći 39lětneho muža. Tón dyrbi so nětko­ ilegalneho plahowanja wopojnych srědkow dla zamołwić. Poprawom běštaj policistaj padustwa dla po puću.

Chrósćicy (aha/SN). Změny w serbskej katolskej kónčinje njebudu w přichodnych 15 lětach wobeńdźomne. Tole je facit wčerawšeho wopyta Drježdźansko-Mišnjanskeho biskopa Heinricha Timmereversa w serbskich wosadach. Nimo zetkanja ze serbskimi duchownymi w Radworju rozjimowaše wón w Njebjelčicach ze zastupjerjemi serbskeho pastoralneho ruma trěbne přichodne kročele. Połny zaćišćow bě biskop wo zetkanjach a rozmołwach, předewšem wo skutkownym dźěle z młodźinu a dźěćimi.

Berlin (dpa/SN). Němske knježerstwo smě z energijowymi koncernami dojednanje wo wotstronjenju jadrowych wotpadkow wotzamknyć. Zwjazkowy sejm je dźensa wot unije, SPD a Zelenych zhromadnje předpołoženy naćisk zakonja schwalił. Po nim maja koncerny EON, Vattenfall, RWE a EnBw hač do lěta 2022 něhdźe 23,5 miliardow eurow do wosebiteho statneho fondsa płaćić, kotryž kónčne składowanje radioaktiwneho materiala rjaduje. Składźišćo njejsu hišće našli.

Seehofer staja wuměnjenja

Mnichow (dpa/SN). Předsyda CSU Horst Seehofer wobstawa dale na kruće postajenej hornjej mjezy 200 000 ćěkancow, kotřiž směli wob lěto do Němskeje přińć. Tole je wažne wuměnjenje dalšeho wobdźělenja CSU na nowym zwjazkowym knježerstwje po wólbach 2017, rjekny Seehofer powěsćerni dpa. „Hewak póńdźe CSU do opozicije.“ Hornja mjeza je po jeho měnjenju trěbna, zo móhła so čłowjeskosć zachować, integracija zmištrować a wěstota wobydlerjow zaručić.

Pjenjezy EU afriskim krajam