To a tamne (14.02.17)
Scena kaž w filmje: Ze zwažliwym manewrom zadźerža šofer pola Mnichowa ze swojim awtom dalše, kotrež njeměješe toho wodźer hižo pod kontrolu. Kaž wohnjowa wobora informuje, bě mužej awto před nim napadnyło, dokelž jědźeše po seklojtej liniji. Při přesćehnjenju wón widźeše, zo měješe wodźer strowotne problemy. Jědźeše tuž ze swojim wozom před awto a je tak borzdźeše. Skónčnje wostaštaj wobě awće stejo. Muža dowjezechu do chorownje.
Jeno na třoch kolesach jěł je šofer awta na awtodróze A4 w Durinskej. Do toho bě wón na parkowanišću do sćežora a kamjenja zrazył. Po pjeć kilometrach so wobruč pušći. Muž njeda so mylić a jědźeše na zwjenu dale. Policija jeho skónčnje při tankowni pola Erfurta dosćahny. Test alkohola wunjese 2,3 promile. Na šofera čaka nětko sudniske jednanje.
AfD chce Höcku wuzamknyć
Berlin (dpa/SN). Zwjazkowe předsydstwo AfD chce dwělomneho durinskeho krajneho předsydu Björna Höcku z jednanjom strony wuzamknyć. Tole su čłonojo předsydstwa AfD dźensa na telefonowej konferency z wjetšinu wobzamknyli. Hłowna přičina su wuprajenja Höcki w Drježdźanach, hdźež bě wón Berlinske wopomnišćo holocausta „pomnik hańby“ mjenował. Höcke sam njeje sej žaneje winy wědomy.
Ruska: Měr wobchować!
Moskwa (dpa/SN). Ruska je na najnowši raketowy test Sewjerneje Koreje starosćiwje reagowała. Moskwa ma tole za ranjenje rezolucije UNO, zdźěli wonkowne ministerstwo. Zdobom Ruska wšitkich wobdźělenych namołwja, měr wobchować a dalšej eskalaciji zadźěwać. Měr docpěć hodźi so w regionje jenož po puću politiskich rozrisanjow. Wjednistwo Sewjerneje Koreje bě wčera po swójskich informacijach balistisku dalokočarowu raketu wupruwować dało. Z teje přičiny chce so Bjezstrašnostna rada UNO hišće dźensa wurjadnje schadźować.
Wuběrk wuradźował
CDU: Žana kampanja přećiwo Schulzej
Z barbami chorhoje demonstrowali
Róčnica zničenja wopominana
W sakskej stolicy mnohe zarjadowanja byli
Drježdźany (dpa/K/SN). Sakska metropola je dźensa z mnohimi zarjadowanjemi swoje rozbiće w Druhej swětowej wójnje wopominała. 13. februara 1945 a naslědnjej dwaj dnjej běchu britiske a ameriske bombowcy centrum „połobskeho Florenza“ do procha a popjeła přeměnili. Něhdźe 25 000 ludźi tehdy w płomjenjach zahiny.
Wopominajo tragediju chce město zdobom na tuchwilne strašne konflikty na swěće dopominać a znamjo humanity znazornić. „W Drježdźanach su drje mnohe rany zažili, před samymi wrotami Europy widźimy pak dale rozbombardowane a wuludnjene města“, bě wyši měšćanosta Dirk Hilbert (FDP) při předstajenju programa zwuraznił. „Njeńdźe wo to, na swójsku bědu spominajo so zawrěć, ale dać ruku tym, kotrymž su bomby wšitko rubili.“ Za wšelake wuprajenja nastupajo 13. februar běchu prawicarscy ekstremisća Hilberta raznje přimali, tak zo dyrbješe jeho samo policija škitać.
Wuzwolenje Steinmeiera zwjetša witaja
Berlin (dpa/SN). Wuzwolenje Franka-Waltera Steinmeiera (SPD) za noweho zwjazkoweho prezidenta je přewažnje pozitiwne reakcije zbudźiło. Zwjazkowa kanclerka Angela Merkel (CDU) je sej wěsta, zo budźe Steinmeier hladajo na noweho ameriskeho prezidenta Donalda Trumpa a přiběracy nacionalizm wusahowacy zwjazkowy prezident „w tychle ćežkich časach“.
Sydom měsacow do wólbow zwjazkoweho sejma 24. septembra běštej unija a SPD swojeho zhromadneho kandidata wčera w Zwjazkowej zhromadźiznje w Berlinje z dobrymi 75 procentami hłosow přesadźiłoj. Steinmeier je tak najlěpši wuslědk wšitkich dotalnych wólbow zwjazkoweho prezidenta docpěł.
Kaž rjekny předsyda CSU Horst Seehofer w telewiziji ARD, je jeho stronje wažne, zo naslědnik Joachima Gaucka zastojnstwo w samsnej kwaliće dale wukonja. Městopředsyda CDU Thomas Strobl zwurazni, zo trjeba Němska „zwjazkoweho prezidenta, kiž jednoća, integruje a stabilizuje“.
Zmužity měšćanosta
To a tamne (13.02.17)
Z pozdatnym infarktom wutroby je Berlinjan w pfalcskim Landauwje sanitetarjow zjebał, zo by wot nich morfium dóstał. Z tajkim trikom bě 25lětny hižo časćišo po wšej Němskej napadnył. Wočiwidnje wot drogow wotwisny muž bě při tankowni bolosćow w hrudźi dla skoržił a typiske symptomy infarkta wutroby rysował. Přiwołani sanitetarjo dachu jemu na to morfium. W chorowni wšak so spěšnje wukopa, zo njebě to infarkt. Skónčnje dyrbjachu policiju wołać, dokelž muž w chorowni randalěrowaše.
Na wšě 270 000 eurow je podružnik w Awstriskej při wurumowanju pincy swojeho noweho bydlenja w kartonje namakał. Muž zdźěli na to swoju namakanku policiji, kaž nowiny rozprawjeja. Komu pjenjezy słušeja a zwotkel pochadźeja, dotal hišće njewědźa. Policija za tym slědźi.
Rumunojo dale protestuja
Bukarest (dpa/SN). Najebać wčerawši wotstup justicneho ministra a zymske wjedro přećiwnicy knježerstwa w Rumunskej dale protestuja. Tež wčera wječor su tysacy ludźo w stolicy Bukaresće a dalšich městach kraja na dróhu šli. Demonstracije, kotrež traja mjeztym dźesać dnjow, su najmócniše w Rumunskej po powalenju socializma. Wone měrja so přećiwo socialnoliberalnemu knježerstwu, kotrež chcyše z nowym zakonjom bój přećiwo korupciji haćić. Justicny minister Florin Iordache bě protestow dla wčera wotstupił.
Konop nětko na recept
Berlin (dpa/SN). Ćežkochorym smě so w Němskej konop jako lěk dawać. Zwjazkowa rada je dźensa naćisk wotpowědneho zakonja schwaliła. Chorobne kasy dyrbja terapiju ze sušenymi konopjowymi kćenjemi zapłaćić. Wočakuje-li lěkar pozitiwny wuskutk na wuwiće symptomow, móže wón konop jako medikament zapisać. Jeje plahowanje chcedźa statnje rjadować, jako wopojny srědk wostanje konop dale zakazana.
Knježerstwo bjez wjetšiny
