Bjezdwěla wjeršk był
Iniciatiwa frakcijam plan předstajiła
Podstupim (SN). Delegacija Iniciatiwy za demokratisce legitimowane ludowe zastupnistwo – Serbski sejm bě zawčerawšim, wutoru, z hosćom frakcijow CDU, Lěwicy, Zwjazka 90/Zelenych a SPD w Podstupimskim krajnym sejmje.
Čłonojo iniciatiwy Hanzo Wylem-Kell (delnjołužiski rěčnik), dr. Andreas Kluge (Drježdźany) a dr. Měrćin Krawc (Budyšin) podachu hosćićelam přehlad k pozadkej, zo ma kóždy lud zasadne prawo na swójski parlament. Tomu wšitke frakcije přihłosowachu, skedźbnjejo tež na wólby Rady za serbske naležnosće w Braniborskej lěta 2015, kaž ze zdźělenki iniciatiwy wuchadźa. Runje tak mějachu wulke zrozumjenje za žadanje, zo měł parlament serbskeho ludu sam rozsudźić, kak so wot Zwjazka a krajneju sejmow Załožbje za serbski lud přewostajene srědki zasadźa.
Dale wuradźowachu wutoru wo kompetencach Serbskeho sejma w kulturnych, kubłanskich a politiskich naležnosćach.
To a tamne (02.03.17)
Pokład slěbornakow su při twarskich dźěłach w pincy w Jenje namakali. Po informacijach krajneho zarjada za pomnikoškit a archeologiju jedna so wo 75 twjerdych pjenjez, kotrež běchu w keramiskim sudobju w špundowanju pincy składowane. Najstarši z nich ma wobraz španiskeho krala Philipa II. z lěta 1563. Najmłódši pjenjez pochadźa z Hannoverskeho wulkowójwodstwa z lěta 1710. Prawdźepodobnje jedna so wo zabyty schow z časa, jako bankow hišće njebě. Sudobjo su namakali, jako w pincy domu betonowe špundowanje kidachu.
Ottifant – znate wabjenske logo sewjeroněmskeho komikarja Otta Walkesa, debi wot wčerawšeho wosebitu 70centowsku listowu znamku. „To bě přeco hižo mój són, so raz na listowej znamce zwěčnić móc. Nětko měješe Němski póst skónčnje samsnu mysličku. To wšak bu tež čas“, rjekny Walkes nowinarjam. Comicowy elefant je dlěje hač 40 lět markowe znamjo mjeztym 68lětneho Walkesa.
Politiska popjelna srjeda CSU
Passau (dpa/SN). Ze zaćahom stronskeho nawody Horsta Seehofera a jeho mandźelskeje Karin w Passauwje je CSU dźensa swoju politisku popjelnu srjedu zahajiła. Wopytowarjo w połnje wobsadźenej Třikrajowej hali su bayerskeho ministerskeho prezidenta zahoriće witali. Prěni króć běchu sej za dźensa štyrjoch rěčnikow skazali: nimo Seehofera zwjazkoweho ministra za wobchad Alexandera Dobrindta, bayerskeho nutřkowneho ministra Joachima Herrmanna a městopředsydu CSU Manfreda Webera.
... a socialdemokratow
Vilshofen (dpa/SN). Pod wyskom wjacorych tysac wopytowarjow je tež SPD dźensa swoje zarjadowanje na popjelnu srjedu we Vilshofenje zahajiła. Kanclerski kandidat Martin Schulz zaćahny zhromadnje z awstriskim zwjazkowym kanclerom Christianom Kernom do swjedźenskeho stana. Bjezposrědnje do zahajenja bě hišće zwada wo tym wudyriła, hač ma CSU wjace wopytowarjow hač SPD abo nic: W Passauskej hali CSU ma 4 000 ludźi městno, w stanje SPD pak 5 000.
Gabriel solidaritu přilubił
Kolesowaj kurěraj paketoweho předewzaća DHL Janos Dobai (prědku) a ...
Chce narodnu wěstotu skrućić
Wulki ćišć na Turkowsku
To a tamne (01.03.17)
Sprawna duša: Ručnu tobołku z wjace hač 14 600 eurami je žona na jednej ze stacijow Mnichowskeje spěšnoželeznicy namakała a policiji přepodała. 39lětna bě na swojich narodninach wosamoćenu tošku na ławce wuhladała. Policija móžeše wobsedźerku, kiž bě zastojnikow hižo alarmowała, spěšnje zwěsćić. Poprawom chcyše 40lětna hosćencarka dochody dnja na banku donjesć, ta pak bě karnewala dla hižo zawrjena.
Štyri tony mandlow a sultaninow su njeznaći z nakładneho awta při awtodróze A 9 w Hornjej Frankskej pokradnyli. Z Pólskeje přijěduce awto bě minjeny kónc tydźenja na parkowanišću wotstajene. Paduši planu jězdźidła wočinichu a su, bjez toho zo by to něchtó pytnył, sydom paletow z mandlemi a sultaninami w hódnoće wjacorych tysac eurow wotkładowali.
Katastrofalne połoženje
Juba/Frankfurt n. M./Genf (B/SN). Hladajo na dźeń a katastrofalniše połoženje wójny a suchoty dlatrjeba Južny Sudan 1,5 miliardow eurow za žiwidła, zdźěli běrow za nuzowu pomoc UNO w stolicy Juba. Na mnohich městnach kraja knježi wulka nuza. Něhdźe 7,5 milionow ludźi, wjace hač 60 procentow wobydlerstwa, je pomocy potrěbnych. Wobydlerska wójna je tam po informacijach UNO najwjetšu krizu ćěkancow w Africe wuskutkowała. Wjace hač 1,5 milionow ludźi je wot spočatka konflikta před lětomaj z kraja ćeknyło, to je dźesać procentow wobydlerstwa. 60 procentow ćěkancow su dźěći. Južny Sudan je jedyn z najchudšich krajow swěta, ma pak bohate składy wolija.
Přepytuje potrjebu putnikow
Smalerjej dale w jastwje
Berlin (dpa/SN). Najebać připowědźenu rewiziju wostanjetaj zasudźenaj Berlinskaj smalerjej dale w přepytowanskej jatbje. Kaž rěčnica krajneho sudnistwa zdźěli, dyrbitaj mužej w starobje 28 a 25 lět w jastwje wostać, doniž njeje Zwjazkowe sudnistwo wusud pruwowało. Tuchwilu sedźitaj w jastwje w Berlinje-Moabiće. Sudnistwo bě jeju wčera po ilegalnym awtowym wubědźowanju, při kotrymž bě njewobdźěleny muž žiwjenje přisadźił, morjenja dla k jastwu na čas žiwjenja zasudźiło. Wonaj so tomu wobarataj.
Madźarska twari nowy płót
Budapest (dpa/SN). Madźarska je započała přidatny płót na mjezy k Serbiskej twarić. Wotpowědne dźěła su hižo zahajene, rěčnik knježerstwa zdźěli, po tym zo běchu medije wo tym rozprawjeli. Wuhotowana budźe wulce moderna připrawa z nócnymi kamerami, na pohiby reagowacymi alarmowymi připrawami a sensorami, kotrež na ćopłotu reaguja. Nowy płót ma hižo wobstejacu připrawu z kałateho grota z lěta 2015 wudospołnić, wšako tam lětsa z dalšimi ćěkancami liča, kaž rěkaše.
Priwatnje do swětnišća
