Washington (dpa/SN). Něhdźe tydźeń dyrbješe zasadźenje astronawtki Sun Williams a jeje kolegi Barryja Wilmora na swětnišćowej staciji ISS trać, mjeztym pak su to hižo tři měsacy. Swětnišćowa łódź z mjenom „starliner“, z kotrejž staj na ISS přilećałoj, ma techniske problemy. NASA dyrbi tuž rozsudźić, kak nětko dale postupuja. Hač do kónca měsaca dyrbja wujasnić, kak měłoj astronawtka a astronawt zaso přizemić.

Fachowcy wo dwěmaj móžnosćomaj diskutuja. Tak móhli so ze „starlinerom“ nawróćić, štož pak je wulke riziko. Techniske problemy měli spytać rozrisać. Abo wonaj čakataj na lět z „Dragon“ klětu we februaru. Za to pak trjebataj hišće woblekaj. Jeju čas na ISS móhł so tuž na wosom měsacow podlěšić.

Derje schował je so třilětny hólčec w Ne­ckarsulmje pola Heilbronna. Staršej za nim pytaštaj, ale jeho njenańdźeštaj. Tuž běštaj přeswědčenaj, zo je so hólc z domu zhubił a staj na policiju zazwoniłoj. Podarmo zastojnicy wokoło domu za nim pytachu a tuž hišće raz dokładnje bydlenje přepytachu. Kaž so wukopa, je so třilětny w kamorje schował a měješe wulke wjeselo na chowance. Staršej a hólc z konsekwencami ze stron policije ličić njetrjebaja.

Z wopicoweje hory Salem ćeknjene młodźatko je kedźbnosć w regionje Bodamskeho jězora wubudźiło. Po jednej nocy w swobodźe su policisća wopicu skónčnje na jabłučinje blisko stanowanišća popadnyli. Kaž policija sobotu zdźěli, bě wone po wulěće chětro mučne.

Drježdźany (SN/MiR). Sakska SPD je dźensa na nowinarsku rozmołwu wo temje přeprosyła, kotraž komunalnych politikarjow zaběra. Je to połoženje wohroženja w tutym zastojnstwje skutkowacych. Načolna kandidatka SPD a sakska statna ministerka za socialne a towaršnostnu zhromadnosć Petra Köpping wu­zběhowaše, zo je trjeba, dźe-li wo tule temu, „wšitke ministerstwa za jedne blido dóstać“. Wona je mjeztym dlěje hač dwě lěće w rozmołwje z wjesnjanostami a měšćanostami, kotrež su wohroženja dla swoje zastojnstwo złožili abo kotřiž čuja so tajkeho dla w swojej dźěławosći wobmjezowani. W běhu zarjadowanja připowědźi Němčanski wjesny předstejićer ­Eugen Diesterheft, zo chce so přichodny tydźeń na konstituowacym posedźenju wjesneje rady tohole čestnohamtskeho dźěła wzdać. Na zeńdźenju, kotrež bě wulki zjawny zajim zbudźił, rozprawjachu Běłowodźanski wyši měšćanosta Torsten Pötzsch, měšćanostka Połčnicy Barbara Lüke, něhdyša wjesnjanostka Arnsdorfa Martina Angermann a něhdyši wjesnjanosta Njebjelčic Tomaš Čornak wo swojich nazhonjenjach.

Dešno (SWN/mb). Prěni raz staj so nowy krajny rada wokrjesa Dubja-Błóta (LDS) Sven Herzberger a předsyda Domowiny Dawid Statnik na dźěłowu rozmołwu zetkałoj. Na rozmołwje w domizniskim muzeju w Dešnje su so tež jednaćel Domo­winy Marcus Końcaŕ, regionalna rěčnica Heike Apeltowa, nawoda Rěčneho centruma WITAJ (RCW) w Choćebuzu, Bernd ­Melcher, koordinator młodźinskeho dźěła Domowiny w Delnjej Łužicy, ­Tobias Unger, čłon zwjazkoweho předsydstwa a nawoda projekta Zorja Maksimilian Hasacki, předsydka braniborskeje rady za serbske naležnosće Katrin Šwjelina a šefina Šule za delnjoserbsku rěč a kulturu Uta Henčelowa wobdźělili. Krajnej radźe po­boku bě społnomócnjena za serbske naležnosće wokrjesa Sabrina Kušcyna.

W rozmołwje su wosebje žiwu dwu­rěčnosć, pěstowanje serbskich nałožkow a podpěru wokrjesa LDS za woboje roz­jimali. Nawjazujo na dwurěčne pomjenowanje 80 busowych zastanišćow skedźbni Herzberg, zo njeje jenož serbski lud, ale tež komunalna politika za to zamołwita, serbšćinu zdźeržeć. Předsyda Domowiny bě na rozmołwu přeprosył.