Serbja sylnje na putnikowanju zastupjeni
Wulka syła serbskich ministrantkow a ministrantow je so wčera na mjezynarodne putnikowanje do Roma podała. Tydźeń woni tam nětko přebywaja. Tež bamža chcedźa zetkać.
Róžant (SN/MG). Hołk a tołk knježeše wčera před putniskej cyrkwju w Róžeńće, jako podachu so serbscy ministranća a ministrantki na mjezynarodne putnikowanje do Roma. Dekan Wito Šćapan wužohnowaše jich na nyšporje, prjed hač so wšitcy do hižo čakacych pjeć busow nawalichu. Z biskopstwow Drježdźany-Mišno a Zhorjelc wobdźěła so dohromady 770 putnicow a putnikow. Mjez nimi je tež tójšto dorosćenych přewodnikow. Něhdźe 180 Serbowkow a Serbow so na putnikowanju wobdźěli. Putnikowanje wotměje so lětsa pod hesłom „Z tobu“. Wotpowědnu hymnu putnikowanja zaspěwachu serbscy putnicy hižo w Róžeńće. Prěnja stacija po puću do swjateho města běše Mnichow. Tu so wšitcy putnicy dweju biskopstwow prěni raz zetkachu. Při rowje swjateho biskopa Bena wužohnowaše jich Drježdźansko-Mišnjanski biskop Heinrich Timmerevers. 17 busow poda so po tym w kolonje dale na směr juh. Dźensa dopołdnja su wšitcy derje do hotela dojěli.
Mjezsobne nadpady
Kijew (dpa/SN). Ruske wojerske lětadła su Charkowsku kónčinu na wuchodźe Ukrainy znowa masiwnje nadběhowali. Při tym su wjes Wowčansk z pjeć wulkimi bombami trjechili. Nimo toho atakowachu ruske bojowe lětadła zepěranišća ukrainskeho wójska. Ukraina porno tomu je rusku wolijowu rafineriju něhdźe sto kilometrow w kraju z trutami trjechiła. Ruski powětrowy škit je ukrainske truty w druhich regionach kraja wotwobarał, samo w Pětrohródskej kónčinje.
Linnemann žněje kritiku
Berlin (dpa/SN). Generalny sekretar CDU Carsten Linnemann žněje ze swojim žadanjom, dźěło wotpokazowacym přijimarjam wobydlerskeho pjenjeza zakładne zawěsćenje dospołnje šmórnyć, kritiku ze swójskeje strony. Socialne křidło CDU kritizuje namjet Linnemanna jako njerealistiske. Linnemann bě sej w rozmołwje z nowinarjemi žadał, 10 000 ludźom wobydlerski pjenjez kompletnje šmórnyć, dokelž nochcedźa dźěłać.
Šěsć kandidatow za předsydu
Wusłuženy podnurjak zwjazkoweje mariny U17 je po dołhej a ...
Israel warnuje Turkowsku před zasahnjenjom
Tel Aviv/Istanbul (dpa/SN). Israelski wonkowny minister Israel Katz je turkowskeho prezidenta Recepa Tayyipa Erdoğana, po toho hroženju z wojerskim zasahnjenjom přećiwo Israealej warnował: „Erdoğan zadźerži so kaž Saddam Hussein a hrozy Israelej z nadpadom. Njech so na to dopomina, što je so tam stało a kak je so skónčiło“, piše Katz w interneće. Lěta 2003 běchu wójska USA do Iraka zaćahnyli a tehdyšeho irakskeho diktatora Saddam Husseina powalili. Tři lěta pozdźišo su Husseina masakrow přećiwo Kurdam a Šiitam dla wotprawili.
Erdoğan bě na zarjadowanju knježaceje AKP, hladajo na Israel rjekł: „Tak kaž smy so w Hórskim Karabachu a w Libyskej wobdźělili, tak činimy to tohorunja z Israelom.“ Turkowska bě w Hórskim Karabachu Azerbajdźan a w Libyskej tamniše knježerstwo podpěrowała.
Po zahajenju Gazskeje wójny su so poćahi mjez Israelom a Turkowskej drastisce pohubjeńšili. Erdoğan mjenowaše islamistisku Hamas „wuswobodźersku organizaciju“ a přirunowaše israelskeho ministerskeho prezidenta Benjamina Netanjahuwa z Adolfom Hitlerom
Putin hrozy z reakciju Ruskeje
Pětrohród (dpa/SN). Ruski prezident Wladimir Putin je při wulkej paradźe wójnskich łódźow w Pětrohrodźe z reakciju na 2026 planowane nastajenje raketow USA w Němskej hrozył. Ruska chce w padźe zwoprawdźenja planow „špihelej wotpowědujo“ reagować. Moskwa nječuje so potom hižo swójskemu zawjazkej winowata. Zrěčenje INF wo zakazu tajkich brónjow hižo wot lěta 2019 wjace njepłaći, po tym zo běchu ju USA wupowědźili. Ruska pak bě sej po słowach Putina moratorij napołožiła a dojednanja dodźeržała. USA porno tomu Ruskej wumjetuja, zo je rakety tajnje nastajiła.
Putin na paradźe potwjerdźi, zo rakety USA, kotrež móža tež atomarne bomby transportować, w běhu dźesać mjeńšin do Moskwy doleća. Na to dyrbi Ruska reagować. Tež ruske wójnske łódźe móža přichodnje tajke rakety nosyć.
Zwjazkowa wobora zdźěli, zo je Ruska nuklearne rakety Iskander w Kaliningradźe nastajiła, kotrež móža tež němske města trjechić. USA chcedźa w Němskej najnowše jara spěšne rakety zasadźić.
Měr ludźom to najwažniše
Wólbny bój na wuchodźe Němskeje pokazuje najwjetšu starosć wolerjow
Erfurt/Drježdźany (dpa/SN). Załožerka strony BSW Sahra Wagenknecht chce jednanja wo móžnych koalicijach na stejišćo partnerow k wójnje w Ukrainje wjazać. „Wobdźělimy so jenož na krajnym knježerstwje ze stronu, kotraž so tež na zwjazkowej runinje za diplomatiske rozrisanje a přećiwo dalšim wójnskim přihotam wupraja“, rjekny předsydka Zwjazka Sahry Wagenknecht durinskim nowinarjam. Jasne je, „zo žerje dalše napřemobrónjenje miliardy eurow, kotrež trjebamy nuznje za šule, chorownje, bydlenja a wyše renty“.
W septembrje wola ludźo w Sakskej, Durinskej a Braniborskej nowe krajne sejmy. Strona Wagenknecht staja při tym nimo kubłanja a migracije tež měr do srjedźišća. To wunjese jej w tutych třoch krajach 15 do 20 procentow přihłosowanja. Tež AfD so tutej temje wěnuje. Wobě stronje stej přećiwo dalšemu dodawanju brónjow do Ukrainy a za hnydomne jednanja Ukrainy z Ruskej.
Ludźo wšitko njewěrja
To a tamne (29.07.24)
Němske mišterstwa w suwanju po mórskim błóće su kónc tydźenja w sewjernomórskim Dangasće přewjedli. Při tym dyrbjachu wobdźělnicy 150 metrow błóćaneje čary na drjewjanym suwadle zmištrować, z jednej nohu klečo na krosnje, z druhej so wotsuwajo. Něhdźe tysac ludźi je sej spektakl wobhladało, kotryž wotmě so mjeztym dźesaty króć we wobłuku festiwala. Na nim přewjeduja nimo toho koncerty a informaciske zarjadowanja wo jónkrótnym watowym morju.
Do kupnicy zabłudźił je so młody sornik w Landsbergu pola Halle. Młode zwěrjo njeje drje wjace wuchod wobchoda namakało, běhaše panisce mjez regalemi a njeda so změrować. Sobudźěłaćerjam so skónčnje poradźi, sornika do składa zaćěrić a tam zamknyć. Přiwołanaj hajnikaj zwěrjo popadnyštaj a na susodnym polu do swobody pušćištaj.
Zasudźeny prosy wo hnadu
Minsk (dpa/SN). Běłoruska statna telewizija je Němca zjawnosći předstajiła, kotrehož bě sudnistwo w Minsku před dnjemi k smjerći zasudźiło. We wusyłanju prošeše muž mócnarja Aleksandera Lukašenka wo hnadu. Němske knježerstwo ničo za jeho pušćenje nječini, wón skoržeše. Sudnistwo bě jeho terorizma w nadawku ukrainskeje tajneje słužby dla k smjerći zasudźiło. „Wuznawam swoju winu, definitiwnje“, wón rjekny. W Běłoruskej zasudźenych zatřěla.
Scholz za dalše kontrole
Saarbrücken (dpa/SN). Zwjazkowy kancler Olaf Scholz (SPD) spušća so w boju přećiwo njeregularnej migraciji na pomjezne kontrole. Generelnje je planowane, mjezy Němskeje dale raznje kontrolować, rjekny Scholz nowinarjam. Tak chcedźa ilegalnu migraciju wobmjezować, kaž bě wón to připowědźił. „Dyrbimy ličby znižić“. Tež při mjezach Awstriskeje, Šwicarskeje, Čěskeje a Pólskeje hižo dlěši čas kontroluja, zo bychu ilegalnu migraciju wobmjezowali.
Compact wobara so sudnisce
