Tuchwilu šokuje chinski start-up z pozdatnje sensacionalnej wunamakanku kumštneje inteligency high-tech-miliadarow w USA: Snadź to pokazuje, zo móžeš z mudrej hłójčku a tež bjez wulkeho kapitala najbóle doprědkarske wěcy zdokonjeć. Jako z Kamjeneje pochadźacy serbski IT-ženij Mikławš Joachim Wićaz prěni blidowy ličak NDR wuwi, běše naš swět hišće zawrjeny a politiscy funkcionarojo NDR wuznam skutka spóznali njejsu. Dźensa mamy w Drježdźanach „Silicon Saxony“, pola nas rosće Astrocentrum Łužica, a tež dokoławokoło digitalizacije serbšćiny widźimy, zo tu mudrych hłójčkow je. Dźensniši warnowanski dźeń hospodarstwa skedźbnja na politiske puta a běrokratiske brěmjenja, kotrychž wotstronjenje sej předewzaćeljo žadaja. Wo tym móža wolerjo bórze wothłosować. Tola wo hospodarskim wuspěchu rozsudźeja na kóncu slědźerske ideje a předewzaćelska zmužitosć – a tych je tradicionelnje we Łužicy tójšto. Wužijmy tón potencial za přichod! Marcel Brauman

Wobydlerjo, měšćanscy radźićeljo a čłonojo Choćebuskeje židowskeje wosady su předwčerawšim, póndźelu, na mjezynarodnym Dnju wopominanja holocausta při wopominanskej tafli za něhdyšu synagogu w Choćebuzu wěncy a kwětki połožili. Fararka Johanna Melchior jako zastupniča Choćebuskeje němsko-israelskeje towaršnosće spominaše na židowskich wobydlerjow łužiskeje metropole, kotrychž běchu nacionalsocialisća poniželi, přesćěhowali, wućěrili a morili. UNO bě 27. januar jako mjezynarodny dźeń wopominanja holocausta 2005 składnostnje 60. róčnicy wuswobodźenja koncentraciskeho lěhwa Auschwitz postajiła. Foto: Michael Helbig

Berlin (dpa/SN). Dobre tři tydźenje do wólbow zwjazkoweho sejma bědźi so SPD ze spochi woteběracej nahladnosću mjez wolerjemi. Samsny čas bywa AfD dale sylniša. Po naprašowanju instituta YouGov spaduje SPD ze zwjazkowym kanclerom Olafom Scholzom na čole w tak mjenowanym njedźelnym prašenju wo štyri na nětko 15 procentow. Wuslědk AfD so porno tomu wo štyri procenty na 23 polěpši. Strona wostanje tak druha najsylniša móc po CDU/CSU, kotraž wo jedyn na 29 procentow přiběraše.

Zeleni jako koaliciski partner spadowachu na 13 procentow, FDP ma tři procenty.

Wěčnje parkowace awto při Berlinskim lětanišću BER su nětko tola na druhe městno přesadźili. Tole zdźěla wobhospodar parkowanišća. Hišće wčera rěkaše, zo njeje tole z prawniskich přičin móžne. Awto steji mjeztym cyłe lěto na parkowanišću, hdźež płaći hodźina 23 eurow. Jězdźidło wostanje na zawrjenym dworje, doniž njejsu wobsedźerja zwěsćili a prašenja popłatka zrjadowali. Te wšak je so na 200 000 eurow nakopiło.

Nachribjetnik połny bananow je w Berlinje zasadźenje policije zawinował. Swědk wobkedźbowaše muža, kiž bě na swój nachribjetnik padnył. Při tym žórleše so žołta maćizny z wačoka, štož zdaše so mužej chětro podhladne. Z nachribjetnika wisacy kabl a klinkacy budźak w toši běchu swědkej doskónčny dopokaz, zo jedna so wo bombu. Policija je muža změrowała, jeho kedźbliwosć při wšěm chwaleše.