„Frau“ na serbskej šuli
Ćišć na Bidena dale a sylniši
Washington (dpa/SN). Po telewizijnym duelu Joea Bidena přećiwo swojemu konkurentej Donaldej Trumpej ćišć na prezidenta USA dale přiběra. Prěni demokratiski zapósłanc z Domu reprezentantow w USA je Bidena zjawnje namołwjał, so noweje kandidatury wzdać a městno druhemu přewostajić. Tež demokratiska načolna politikarka Nancy Pelosi so słowa jimaše. Biden sam mjenowaše přičinu za swój skepsany wustup w telewizijnym duelu. Tak bě wón mučny, 81lětny swój słaby wustup wopodstatni a skedźbni na napinace jězby do wukraja. Krótko do telewizijneje debaty je wón faktisce wjacekróć po swěće pućował, štož njebě „jara mudre“, Biden potwjerdźi.
W terminowej protyce měješe prezident USA minjeny měsac dwě jězbje do wukraja. Najprjedy poby spočatk junija na wopomnjenskim zarjadowanju k přizemjenju aliěrowanych w Normandiji w Francoskej. Direktnje po tym poby w Parisu a něšto dnjow pozdźišo na wjeršku G7 w Italskej. Wottam so do USA nawróći a z wólbnym bojom pokročowaše.
To a tamne (03.07.24)
Slědźerjo na Spitzbergenje su njeznatu wačku namakali a ju po skupinje ABBA pomjenowali. Z tym swoje wobdźiwanje za hudźbu šwedskeje band zwuraznichu, zdźěli wčera přirodo-historiski muzej w Stockholmje. Dale chcedźa na 50. jubilej „magiskeho wječora w Brightonje“ w lěće 1974 skedźbnić, rozłoži slědźerka Chahinez Bouguerche. Tehdy bě Abba ze songom „Waterloo“ Eurovision Song Contest dobyła. Bouguerche bě hudźbje band při zestajenju rysowankow wački připosłuchała. Wačka je jako parazit w rybje žiwa.
Wone wupada kaž habl, ale je eksotiske zwěrjo – šupiznak. Zwěrjenc w Praze so wjeseli, zo je žónka Run Hou Tang jenož něhdźe 140 gramow ćežke młodźo zawčerawšim porodźiła.
Politika na kromje kopańcy
Flensburg (SN/mb). Składnostnje Europeady w hraničnych kónčinach Južneje a Sewjerneje Schleswigskeje w Němskej a Danskej je so tež Mjeńšinowa rada schadźowała. Zastupjerjo připóznatych domoródnych narodnych mjeńšin Němskeje su so w domje Danow w Flensburgu „Flensborghus“ zetkali respektiwnje so online wobdźělili – kaž předsyda Domowiny Dawid Statnik, kiž w Budyšinje dźěła.
Gremij je so štyrjom wulkim temam wěnował. Tak su poslednje namjety za planowane poručenje konferency kultusowych ministrow (KMK) za sposrědkowanje wědy na šulach wo narodnych mjeńšinach schwalili. W dźěłowej skupinje zastupjerjow mjeńšinow a zwjazkowych krajow, kotraž je naćisk zdźěłała, skutkuje tež referentka Domowiny za kubłanje, Katrin Suchec-Dźisławkowa. Kaž předsyda třěšneho zwjazka Dawid Statnik našemu wječornikej dźensa wobkrući, chce KMK poručenje hišće lětsa schwalić. Najebać to, zo zwjazkowe kraje wo konkretnym zwoprawdźenju same rozsudźeja, ma tajke zhromadne poručenje „wěstu politisku móc“, tak Dawid Statnik.
Płaćenski system zahajeny
Frankfurt nad Mohanom (dpa/SN). Nowy europski płaćenski system Wero European Payments iniciatiwy (EPI) je dźensa startował. Wulki dźěl nalutowarnjow, kaž tež ludowe w Němskej, z Wero mobilne płaćenja wot jednoho handyja na druhi zmóžnjeja. Wužiwarjo systema njetrjebaja žane 22 cyfrowe kontowe čisło (IBAN) podać. Město toho dosaha mobilne telefonowe čisło abo mejlowa adresa. Pjenjezy w běhu dźesać sekundow na konto přijimarja dóńdu.
Nowe knježerstwo wutworjene
Den Haag (dpa/SN). Sydom měsacow po wólbach parlamenta w Nižozemskej měješe tamniši kral Willem-Alexander dźensa nowe knježerstwo spřisahać. Njestronjan a něhdyši zastojnik Dick Schoof, stanje so z šefom knježerstwa. Radikalnoprawa strona populista Geerta Wildersa wutwori zhromadnje z třomi druhimi prawicarskimi stronami koaliciju.
Direktne zwiski zmóžnić
W přitomnosći pósłanče USA w Němskej Amy Gutmann (1. wotprawa) a ...
Angažementma so podpěrać
Berlin (dpa/SN). Wuchodoněmske towarstwa a iniciatiwy móža za swój demokratiski angažement podpěru z fondsa zhromadźenstwa „Zukunftswege Ost“ dóstać. Znajmjeńša 100 projektow ze stajnje hač do 5 000 eurami ma so spěchować. Prěnje pjenjezy móhli próstwystajerjo hižo w septembru dóstać, zdźěli wčera zamołwity zwjazkoweho knježerstwa za wuchod Carsten Schneider (SPD).
Demokratija wohrožena?
Bywši prezident USA Donald Trump měješe před sudnistwom wuspěch
Washington (dpa/SN). Bywši prezident USA Donald Trump so po rozprawach wo to prócuje, po njedawnym rozsudźe najwyšeho sudnistwa k prašenju imunity, zběhnjenje swojeho zasudźenja w New Yorku docpěć. Jenož něšto hodźin po wobzamknjenju Supreme Courta su prawiznicy Trumpa prěnje kročele zahajili a so z listom na přisłušneho sudnika w New Yorku wobroćili, sćelak CNN a nowina „New York Times“ rozprawještej. Žórła pak žane njemjenowaštej.
Prawiznicy su prawdźepodobnje sudnika tež wo to prosyli, za 11. julij postajene wozjewjenje chłostanja přestorčić. Trumpowy team powoła so při tym na njedawny rozsud Wyšeho sudnistwa USA, po kotrymž so prezidenća USA nastupajo chłostanske přesćěhanje za oficialne jednanja w zastojnstwje škitaja. Prezident USA Joe Biden ma tole za „strašny precedencny pad“. Krok Trumpowych prawiznikow bě wočakujomny, ale je skerje bjez wuhladow.
