Što jemu „swoboda měnjenja“ woznamjenja, je knjez Musk, po tym zo je sej platformu Twitter kupił, dosć doraznje dopokazał. Wšitcy smědźa wšitko wozjewić, wšojedne, kak absurdnje, ranjace, politisce (nje)korektnje a/abo prosće wopačne tež było. Jenož mějićela samoho, jeho častodosć dwělomne aktiwity a jeho tohorunja častodosć dwělomnych „přećelow“ w tejle socialnej syći kritizować njesměš. Hewak hroža sankcije „mistera X“. Platformu ­wopušćić je tuž z konsekwentnej kročelu. Tutu su mjeztym na přikład Mjezynarodny Auschwitzowy komitej, zwjazkowy koparski ligist FC Sankt Pauli a Serbski institut kročili. Wězo směš so w tym zwisku prašeć, komu kotre polo přewostajiš a hač njeby naposledk mudrišo było, so desinformacijam, „alternatiwnym faktam“ a łžam na městnje spřećiwjeć. Na druhim boku wšak dowola „swoboda wólby“, so za alternatiwami rozhladować – #fediverse. To njeje ničo druhe hač praktikowana demokratija. Bosćan Nawka

W přinošku Serbskich Nowin „Institut atraktiwne stejnišćo“ z 10. januara jewi so zmylk. 2,5 milionow eurow njeje cyłkowny etat instituta, ale suma srědkow ze stron třećich. Z nimi so přidatny personal přistaji a projekty zwoprawdźa, kotrež ­zakładne financowanje njedowola. Redakcija prosy wo wodaće za misnjenje.

Z dobrej tradiciju je zarjadowanje „Wiki nawrótnikow“, kotrež město Choćebuz ­stajnje spočatk lěta organizuje. Tež lětsa su zaso tójšto zajimcow přiwabili. Přede­wzaća, institucije a iniciatiwy – wot měšćanskeho zarjadnistwa přez zwjazkowe ­institucije hač k železnicy – prezentowachu swoje dźěłowe městna a poradźowachu zajimcow. Wosebje měrjachu so tež lětsa zaso na ludźi, kotřiž su swoje zbožo něhdy zwonka Łužicy pytali a namakali a kiž najebać to wo tym rozmysluja, so do domizny nawróćić. Foto: Michael Helbig

Sam sej do pasli zalězł je muž na Dortmundskim lětanišću, jako chcyše pjenježnu pokutu swojeje žony zapłaćić. Zastojnicy běchu ju při kontroli zajeli, dokelž wona pjenjezy dołžeše a wukaz zajeća hižo předležeše. Policija zwěsći, zo tež muž njewinowaty njeje. Tež za nim hižo pytachu, dokelž bě wospjet bjez jězbneje dowolnosće po puću był. Žona smědźeše hić, muža dowjezechu do jastwa.

Wopojny jěd, luksusowe časniki, dwě dule złota, drohe awto a 200 000 eurow namakała je Berlinska policija při raciji přećiwo wikowarjam drogow we wjacorych bydlenjach stolicy. Pola hłowneho podhladneho namakachu 450 gramow kokaina, sto gramow marihuany a dalše drogi. Policija bě z wjacorymi zastojnikami, wukubłanymi psami a specialnej jednotku bydlenja přepytowała.