To a tamne (07.02.25)
Za wodźidłom swojeho oldtimera je žona w Ludwigshafenje tčacy wostała, dokelž elektriske přestajenje sedła hižo njefungowaše. Sedło hodźeše so jenož hišće doprědka k wodźidłu sunyć, wróćo pak nic wjace. Tež wohnjowi wobornicy sej žaneje rady njewědźachu. Skónčnje wućahnychu wulke hydrawliske nožicy a žonu wuswobodźichu. Kelko škody su w drohim awće zawostajili, njeje znate.
Šlagrowy spěwar Heino je čestny hósć Semperoweho operoweho bala dźensa wječor w Drježdźanach. 86lětny njebě hišće ženje na tutym balu a so přewšo wjeseli, nowiny pisaja. Loni bě Heino hósć Wienskeho operoweho bala. Spěwać wšak zastupnik jakneho němskeho šlagra w Drježdźanach njebudźe. Za to pak wočakuja jeho w kruhu prominentnych na čerwjenym přestrjencu a na rozmołwje z čestnymi hosćimi.
Pjeć lět „Sorbisch? Na klar.“
Drježdźany/Budyšin (SN). Dźensa před pjeć lětami su na žurli Serbskeho domu w Budyšinje oficielnje kampanju „Sorbisch? Na klar!“ zahajili. Kaž su woprašowanja ludźi njedawno wobkrućili (Serbske Nowiny su rozprawjeli), je kampanja akceptancu serbšćiny w zjawnym rumje Łužicy polěpšowała. Zamołwići kampanje su dźensa w socialnych syćach „wulkotnej syći partnerow, podpěraćelam a wjele ludźom“ dźakowali, „kotřiž ze swojej horliwosću za serbšćinu a serbsku kulturu pokazuja, štož Łužicu wučinja.“ Woni su přilubili, tež přichodne lěta so wo to starać, zo wostanje naša rěč widźomna.
Kulturna ministerka Barbara Klepsch (CDU), kotraž běše tež na zahajenju před pjeć lětami přitomna, wčera zwurazni, zo posrědkuje serbšćina identitu a žiwu kulturnu mnohotnosć we Łužicy. Kampanja „Sorbisch? Na klar.“ tule w Němskej jónkrótnu mnohotnosć zesylnja. Ministerka pokaza na wuslědki woprašowanja wo kampani, zo maja 75 procentow ludźi serbsku rěč a kulturu za wobohaćenje regiona, kotrež tež turistisku atraktiwitu Łužicy stopnjuje.
Scholz: Sym na dobrym puću
Berlin (dpa/SN). Zwjazkowy kancler Olaf Scholz (SPD) je přeswědčeny, zo je wón při wobmjezowanju njeregularneje migracije na dobrym puću. „Sym pomjezne kontrole wukazał, sym so wo to postarał, zo su při mjezach 40 000 ludźi wotpokazali. Ličba za azylom pytacych je wo třećinu woteběrała“, rjekny Scholz nowinarjam. Runočasnje wón kanclerskeho kandidata CDU/CSU Friedricha Merza kritizowaše, kiž bě přihłosowanje AfD w zwjazkowym sejmje akceptował.
Israel wustupi z rady UNO
Jerusalem (dpa/SN). Israel je wot prezidenta USA Donalda Trumpa připowědźeny wustup z rady UNO za čłowjeske prawa witał a so tutej kročeli přizamknył. Rada z hłownym sydłom w Genfje „jeničku demokratiju na Bliskim wuchodźe Israel runjewon agresiwnje zasudźuje“, piše wonkowny minister Gideon Saar na platformje X. Israel su z wjace hač sto rezolucijemi zasudźili, wjace hač Iran, Kuba, Sewjernu Koreju a Venezuelu hromadźe“, Saar piše. Tole Israel dlěje njećerpi.
London podpěruje Ukrainu
Před Capitolom we Washingtonje su ludźo wčera přećiwo prezidentej ...
Rentowu starobu zwyšić!
BSW: 100 eurow wjace w měsacu
Gazu „dobrowólnje“ wuludnić
Tel Aviv (dpa/SN). Israelski zakitowanski minister Israel Katz je wójsku kraja přikazał, přihotować plan k „dobrowólnemu wupućowanju“ Palestinjanow z Gazaskeho pasma. Plan je sćěh namjeta prezidenta USA Donalda Trumpa, dwaj milionaj Palestinjanow z pobrjóžneho pasma přesydlić. Prezident USA bě w přitomnosći israelskeho ministerskeho prezidenta Benjamina Netanjahuwa wozjewił, zo chcyli USA Gazaske pasmo „přewzać“ a na derje so wuwiwacu „rivieru Bliskeho wuchoda“ přetwarić. Po woli Trumpa měli wobydlerjo Gazaskeho pasma zničenu kónčinu wopušćić a so w susodnych arabskich krajach zasydlić.
Wuprajenja su mjezynarodnu kritiku zbudźili. Na to je knježerstwo plany złahodniło. Wonkowny minister USA Marco Rubio rjekny, zo njeje plan njepřećelski, ale zo bě „wulkomyslny poskitk“ prezidenta. Zaměr je, pobrjóžnu kónčinu natwarić, zo móhli tam zaso ludźo bydlić, wón rjekny. Wokomiknje wšak to móžno njeje. Minister Katz je „chrobły plan“ Trumpa mjeztym jara witał.
Merz wostawa njepowalny
Předsyda CDU a kanclerski kandidat unije swoju politiku zakituje
Berlin (dpa/SN). Kanclerski kandidat CDU/CSU Friedrich Merz wostawa hladajo na trajace demonstracije přećiwo zhromadnemu wothłosowanju unije z AfD k přiwótřenju migraciskeje politiki njepowalny. „Bjeru to jara chutnje. Tola jako poslednja zbywaca ludowa strona njedamy so wot demonstrantow z našeho puća zwjesć“, rjekny předsyda CDU nowinarjam. Přemóžace wjetšina wobydlerjow Němskeje ma kurs unije za prawy, je sej wón wěsty.
Merza kritizuja, dokelž je minjeny tydźeń w zwjazkowym sejmje akceptował, zo dóstanje jeho pjeć dypkow wobsahowacy naćisk z pomocu AfD wjetšinu hłosow. Minjeny pjatk bě naćisk najebać přihłosowanje AfD zwrěšćił, dokelž njeběchu so mnozy zapósłancy unije a FDP na wothłosowanju wobdźělili.
Rozsud njezadźiwa
To a tamne (06.02.25)
Januar 2025 bě po klimowej rozprawje najćopliši, kotryž su hdy naměrili. Globalna temperatura wučinješe 13,23 stopnjow a tak 1,75 stopnjow nad niwowom doindustrijneho časa, zdźěla słužba za klimowu změnu programa EU Copernicus w britiskim Readingu. „Januar bě dalši překwapjacy měsac a z rekordnymi temperaturami pokročuje, kotrež minjene lěta wobkedźbujemy“, zdźěli rěčnica centruma. Daty zběrali běchu satelity, łódźe, lětadła a wjedrarnje po wšěm swěće.
Ličba wobchadnych haćenjow na awtodróhach Němskeje je znowa přiběrała. W swojej bilancy za lěto 2024 naliči ADAC cyłkownje 516 000 haćenjow, 12 000 wjace hač lěto do toho. Haćenja trajachu cyłkownje 448 000 hodźin a so na 859 000 kilometrach rozpřestrěwachu. To je puć hač na měsačk a zaso wróćo. Hłowna přičina je přiběraca ličba awtow.
