Nadźijeja so wujednawanskeho hamta
Podstupim (dpa/SN). Braniborske hospodarske ministerstwo nadźija so dale zarjadowanja wujednawanskeho hamta za hórniske škody we Łužicy. Dotal Zwjazk tajke městno wotpokazuje, w decembru pak su dalše jednanja planowane, zdźěli tele dny nawoda wotrjada za energiju a surowizny hospodarskeho ministerstwa Klaus Freytag.
Zwjazk ma so sobu zapřijeć, dokelž je přez Łužisku a srjedźoněmsku towaršnosć hórnistwoweho zarjadnistwa (LMBV) w regionje aktiwny. Předewzaće Łužiska energija a milinarnje (LEAG) je hižo signalizowało, zo je zwólniwe we wujednawanskim hamće sobu skutkować. Tež Sakska podpěruje plany, wo kotrychž w Braniborskej hižo wjacore lěta diskutuja.
Wujednawanske městno měło na přikład zakročić, zwěsća-li wobsedźerjo domow škody na twarjenjach. W tym padźe ma so přepytować, hač su škody hórnistwa dla nastali. Wujednawanski hamt měł so dale wo to starać, zo wobsedźerjow domow bjez kompleksnych sudniskich jednanjow wotrunaja.
Twarja mosty hač přez mjezy
Čłonojo mjeńšinoweje rady ze zwjazkowym prezidentom so zetkali
Berlin (SN/BŠe). Mjeńšinowa rada štyrjoch w Němskej připóznatych awtochtonych narodnych mjeńšin a ludowych skupin je tele dny zwjazkoweho prezidenta Franka-Waltera Steinmeiera na hrodźe Bellevue w Berlinje wopytała. Zastupjerjow mjeńšin přewodźeše społnomócnjeny zwjazkoweho knježerstwa za wusydlencow a narodne mjeńšiny Harmut Koschyk (CSU). Serbow zastupowałoj staj čłon mjeńšinoweje rady Kito Ela a předsyda třěšneho zwjazka Dawid Statnik, kiž je tež předsyda mjeńšinoweje rady.
Wólbne rženje
To a tamne (25.09.17)
Z drastiskimi kubłanskimi metodami spyta Thailand nětko swoju statistiku njezbožow pozitiwnje wobwliwować. Dokelž pokuta abo jatba skućićelow njezatrašatej, tam wopitych šoferow hinak chłostaja. Sćelu jich do ćěłownjow, zo bychu na swojej woči widźeli, što móhli ze swojim zadźerženjom zawinić. 7 000 ludźi je tajke chłostanje hižo přešło.
Dźiwinje znjemóžnić so něhdźe chować je jedna metoda, kak móhli jich wobstatk pomjeńšić. Japanscy burja pasu swoje kruwy na njewobdźěłanych płoninach. Tak njemóža so tam sorny, jelenje abo dźiwje swinje wjace we wysokej trawje chować. Kurioznu ideju zrodźi ratar na połkupje Hokkaido a je na polu mobilnu rězarnju zarjadował. Zatřělenu dźiwinu móže tuž hnydom na městnje předźěłać.
Bój w napjatej atmosferje
Drježdźany (dpa/SN). Do njedźelnych wólbow zwjazkoweho sejma bilancuja zastupnicy wšitkich sylnišich stron wólbny bój. W jednym dypku su sej woni přezjedni: Čas do wólbow je napinacy. Přiwšěm běchu rozmołwy z wobydlerjemi wažne. Problemy w Němskej njejsu mjeńše. Na wólbnych zarjadowanjach zwěsćichu politikarjo přiběracu napjatu atmosferu. Tež wólbne plakaty su njeznaći na mnohich blakach zničili.
Katalanojo dale demonstruja
Barcelona (dpa/SN). Do ludoweho wothłosowanja w regionje Španiskeje Katalonskej su wčera znowa tysacy ludźi za njewotwisnosć demonstrowali. Zdobom kritizowachu přepytowanja a zajeća přez paramilitarnu policajsku jednotku Guardia Civil, kotraž přisłuša centralnemu knježerstwu w Madridźe. Wonkowny zarjad w Berlinje němskich dowolnikow konflikta w Španiskej dla namołwja, zo měli wozjewjenja lokalnych medijow sćěhować a wjetšim zhromadźowanjam ludźi z puća hić.
Detailowe dźěło zahajene
Mjeztym 25. raz swjećachu wčera w Choćebuzu swětowy dźeń ...
Wobdźělenje mjeńšin rozjimowali
Bratislava (SN). Delegacija Federalistiskeje unije europskich narodnych mjeńšin (FUEN) je zawčerawšim stolicu Słowakskeje Bratislavu wopytała. Mjez zastupjerjemi běštaj tohorunja wiceprezident FUEN a zdobom rěčnik dźěłoweje skupiny słowjanskich mjeńšin Bjarnat Cyž a jednaćel Domowiny Marko Kowar.
Zastupjerjow mjeńšin přeprosył bě społnomócnjeny za narodne mjeńšiny w Słowakskej László Bukovszky. Ćežišćo schadźowanja bě dźěłarnička pod hesłom „Participatiwne mechanizmowe modele za narodne mjeńšiny“. W diskusiji dźěše wo pady a studije, kak móža so mjeńšiny w Słowakskej a tamne słowjanske mjeńšiny we wukraju aktiwnje na towaršnosći wobdźěleć.
Koordinatorow wuzwolili
Chrósćicy (SN). Wo załoženju towarstwa „Smy z.t.“ je so rada starostow Iniciatiwy za Serbski sejm na swojim štwórtym zetkanju minjenu sobotu w Chrósćicach zaběrała. Hłowny zaměr towarstwa je, wólby serbskeho ludoweho zastupnistwa a jich financielne zawěsćenje podpěrać. Za to su Załožbje za serbski lud próstwu wo podpěru zapodali. Nazymu chce załožba wo njej rozsudźić.
Napominała rada starostow je, zjawnosć lěpje informować. Na posedźenju je rada tohorunja nowy memorandum Iniciatiwy za Serbski sejm za přewjedźenje wólbow wobswětliła. Srjedź oktobra je zjawne předstajenje konkretnych předewzaćow planowane. Prěni króć ma so předparlament jako přechodny gremij wolić. Zasady wólbneho porjada maja so tohorunja w oktobrje prezentować.
Za efektiwnu organizaciju a lěpše zastupnistwo wuzwolichu starostojo skupinu koordinatorow, kotraž wobsteji z čłonow Hornjeje a Delnjeje Łužicy.
„Wutroby Polakow sej kupili“
Nowiny bilancuja dwulětnu legislaturnu periodu pólskeho knježerstwa
Waršawa. Dźenik Rzeczpospolita a tydźenik Polityka analyzowaštej tele dny dotalne dwulětne dźěło knježerstwa pod nawodnistwom strony Prawo a sprawnosć (PiS). Přinoškaj wobeju nowin wujewjatej samsny wuslědk: Polacy su ze swojim knježerstwom jara spokojom. Z naprašowanjow mjez wobydlerjemi wuchadźa, zo sej 40 do 44 procentow ludźi knježerstwo waži. Tole njezadźiwa, wšako wone na přikład financne skandale bywšeho nawodnistwa kraja přepruwuje. Swoje wólbne přilubjenja šef PiS Jarosław Kaczyński konsekwentnje zwoprawdźa.
To a tamne (22.09.17)
Willy Brandt je tři dny do wólbow zwjazkoweho sejma do SPD zastupił. To njeje žadyn wólbny žort. 23lětny muž, kotrehož je socialdemokratiska strona nětko přijała, ma samsne mjeno kaž štwórty zwjazkowy kancler. Podobnaj pak sej wobaj scyła njejstaj. Młody Willy Brandt ma brodu a je cyle ležernje w sportowych črijach a puliju na fotowy termin přišoł.
Policajski rewěr z póstowym zarjadom zaměnił je 65lětny w Pforzheimje. W jeho wočomaj wosta to hač do dźensnišeho dnja póst. Bjez jeničkeho słowa połoži wón paket na tejku a wočakowaše wot muža w uniformje, zo swoje dźěło čini. Na prašenje zastojnika, što ma z pakćikom činić, muž wotmołwi, zo ma jón wróćo pósłać. Policist pak jemu rozkładźe, zo njemóže paket přiwzać. Muž widźeše kurioznu situaciju z humorom a wopušći policajski zarjad z posměwkom.
