Waršawa (dpa/SN). Z njesměrnje wjele dźěłaćerjemi we wukraju financuje Sewjerna Koreja swoje dewizy. Po informacijach ameriskeho zastupnistwa pola UNO dźěła tuchwilu 100 000 Sewjero­korejčanow we wukraju a nahospodarja režimej na lěto poł miliardy dolarow. Jako je Bjezstrašnostna rada UNO tydźenja wo sankcijach přećiwo krajej diskutowała, rozjimachu tohorunja temu požčenych dźěłaćerjow ze Sewjerneje Koreje. Wobzamknjena rezolucija mjez druhim postaja, zo nimaja tući přichodnje hižo žanu dźěłowu dowolnosć za wukraj dóstać.

Tež w Europskej uniji mjenowana problematika njeznata njeje. Po słowach diplomatow EU su samo rozmyslowanja, staćanow Sewjerneje Koreje z EU wupokazać, kotřiž žanu płaćiwu dźěłowu dowolnosć nimaja. Tež w Europje nahospodarjeja Sewjerokorejčenjo statysacy eurow kóžde lěto do wulkeho hornca, z kotrehož diktator Kim Jong Un swoje raketowe a atomowe testy financuje. Po informaciji statistiskeho zarjada Eurostat měješe loni 625 staćanow Sewjerneje Koreje krajach w EU płaćiwu dźěłowu dowolnosć, 534 z nich w Pólskej.

Kajke mamy my Serbja zbožo! To sej stajnje zaso praju, hdyž čitam wo połoženju europskich narodnych mjeńšin. Na Ukrainje je knježerstwo postajiło, jenož hišće jednu – a to hamtsku – jako kubłansku rěč wužiwać. Předstajmy sej to raz na našich serbskich kubłanišćach. Samozrozumliwje je tam serbska rěč dźěl wšědneho žiwjenja. W tymle zwisku myslu tež na Koru­tanskich Słowjencow w Awstriskej. Woni njemóža swoju rěč w zjawnosći tak na­łožować kaž my Serbja we Łužicy. A to stej jenož dwaj přikładaj. W Europje bydli wjac hač 300 ludowych skupin a mjeńšin. Runje wone trjebaja moderny, časej wotpo­wědny škit. Druhdy mam zaćišć, zo „bydla někotři ludźo prawdźepodobnje za měsačkom“, a zo ze swojim jednanjom koło časa wróćo wjerća. Moderny swět skići wuměnjenja, zo móža narodne mjeńšiny swoju identitu wobchować. Bianka Šeferowa

Dźěle hoberskeje dule tuka, kotraž bě wopłóčkowy kanal w Londonje zatykała, chce tamniši měšćanski muzej kupić. „To by jedyn z najwurjadnišich objektow wšěch muzejowych zběrkow Londona był“, wu­zběhny direktorka Sharon Ament w nowinskej zdźělence. Dula móhła wopytowarjow inspirować, zo problemy rosćacych­ metropolow lěpje rozrisaja.

Njewšědny pišćelowy koncert je kantor Wiesbadenskeje cyrkwje na nohi stajił. Tydźeń do wólbow zwjazkoweho sejma zaklinčachu na wčerawšim koncerće twórby pod hesłom Merkel, Lindner a Schulz. Twórby pak njejsu originalni wólbni kandidaća spisali. Kantor Hans Kielblock je za wuměłcami ze samsnym swójbnym mjenom kaž politikarjo slědźił a tajke tež našoł. Tak zaklinčachu wčera twórby Gustava Adolfa Merkela, Wolfganga Lindnera a Hermanna Schulza.

Z westfalskeho Münstera pochadźacy, po přewróće w Drježdźanach dźěłacy a wot lěta 1994 w swojej nowej domiznje jako měšćanski radźićel w Großröhrsdorfje politisce angažowany Günter Hutschalik je direktny kandidat Swobodnych wolerjow Budyskeho wólbneho wokrjesa za přichodny Zwjazkowy sejm Němskeje. Justiciar srjedźostawskeho předewzaća bě spjećowanja přećiwo wutwarej milinowětrnikoweho parka w zapadnej Łu­žicy dla z dalšimi iniciatiwu „Gegenwind“ wutworił a so naposledk jako „eksot w měšćanskej radźe za naše zajimy zasadźił – to bě tehdy za etablěrowane strony chětro njezwučene“. Takle rozjima wón zazběh swojeho politiskeho skutkowanja. „Wuspěch z našim spjećowanjom njemějachmy, běchmy pak sej wěsći, zo chcemy komunalny přichod wobwliwować. Mjeztym smy druhe najsylniše zastupjerstwo w radźe a tworimy z SPD zhromadnu frakciju. Na tej runinje je wěcywustojne dźěło mjez wšelakimi stronami a zjednoćenstwami móžne.