Hač do wčerawšeho běch sej wěsty, zo słušam k mjeńšinje tych, w kotrychž nutřkowny olympiski woheń hišće tak prawje njesapa. Nětko wěm, zo mnozy runje tak mysla. Wjetšina ludźi, 72 procentow, njeje zwólniwa olympiskich hrow dla pozdźe do łoža chodźić. Tole je slědźenski institut YouGov zwěsćił. Jeničce 13 procentow woprašanych chcyło hač do pózdnjeje nocy před telewizorom wutrać, zo móhli sportowe rozsudy „live“ sćěhować. Njelóšt je so wočiwidnje tež na politikarjow połožił. Na wotewrjenskim zarjadowanju dźensa wječor w Rio de Janeiru budźe němski zwjazkowy prezident Joachim Gauck runje tak pobrachować kaž za sport přisłušny nutřkowny minister Thomas de Maizière a ruski prezident Wladimir Putin. Snano ma to tež něšto z dopingom činić. Wšojedne, štó potom w Brazilskej na dobyćerskim schodźenku steji. Prašenje, hač je „čisty“, w kóždym padźe wostanje. Marko Wjeńka

Berlin (dpa/SN). Wólbnobojowy bus CDU je so minjenu nóc w Berlinje wupalił. Prawdźepodobje bu wón zapaleny, rěčnica policije zdźěli. Policajski wotrjad a statny škit přepytujetej. Šofer awta bě na parkowanišću so palacy bus wuhladał. Wohnjowa wobora płomjenja podusy. Dźensa chcychu za móžnymi slědami pytać­. W Berlinje wola 18. septembra Dom zapósłancow a parlamenty wšitkich měšćanskich wobwodow.

Manila (dpa/SN). Najebać protesty aktiwistow za zachowanje čłowjeskich prawow je nowy filipinski prezident Rodrigo Duterte w boju přećiwo drogowej kriminaliće razne naprawy připowědźił.

„Ja was wšitkich morju“, Duterte dźensa hrožeše. Wón bě we wólbnym boju krute postupowanje přećiwo kriminaliće přilubił a bu z wjetšinu woleny. Po jeho zapokazanju kónc junija morichu wjace hač 400 dealerow drogow a tysac małokriminelnych. W žanym padźe njejsu skućićelow zwěsćili. Kritikarjo prezidentej wumje­tuja, zo ćerpi smjertne cwólby.

Amtěrowacy swětowy mišter w mjetanju ručnych tobołkow, 44lětny Andreas Ruland, chce jutře w Bottropje titul za­kitować. Při tym spušća so na swoju mjetansku techniku: wupřestrětu ruku da­le a spěšnišo w kole wjerćeć a tobołku skónčnje pušćić. Swětowe mišterstwa wotměwaja so wo lěta 2012.

Dźiwadłowy kruch je w Allgäuju zasadźenje policija zawinił. Žona bě zastojnikow alarmowała, po tym zo bě w lěsu wutřěle a škrěčenje słyšała. Zastojnicy wšak zwěsćichu, zo słušeše to do dźi­wadłoweho krucha, w kotrymž nadpad a nastatu paniku napodobnjeja. Najebać wopačny alarm policija žonu chwaleše, prajo: Radšo jónu wjace zazwonić hač jónu přemało.