Spahn warnuje
Předsudki integraciju haća
Kamjenica (dpa/SN). Strach, předsudki a rasizm haća we wjesnych kónčinach integraciju ćěkancow. To je slědźenska skupina „Přichod ćěkancow we wjesnych kónčinach“ zwěsćiła. Přepytowali běchu komuny we wosom wokrjesach Sakskeje, Hessenskeje, Delnjeje Sakskeje a Bayerskeje, kaž Kamjeničanska Techniska uniwersita zdźěli. Projekt měješe hišće njewuslědźene polo migraciskeho slědźenja wudospołnić, dokelž integraciju ćěkancow nastupajo małe městačka a wsy w srjedźišću njesteja.
Při podpěrje a socialnym wobdźělenju we wjesnych kónčinach je wažne, kotre stejišćo regionalni politikarjo na městnje zaběraja. Maja-li woni jeno snadny dohlad do žiwjenskich wobstejnosćow ćěkancow, njeje to spomóžne za aktiwnu integracisku politiku, slědźerjo zwěsćeja.
Za integraciju we wjesnych kónčinach njejsu jeno dźěłowe městna, bydlenja a rěčne kursy wažne. Rozsudnej stej zadźerženje regionalneje ciwilneje towaršnosće a zwólniwosć wobydlerjow, ćěkancow do wjesneje zhromadnosće přiwzać.
Bioratarstwo so rozšěrja
Dźesać procentow płoniny burja mjeztym ekologisce wobhospodarjeja
Berlin (dpa/SN). Žana chemija na polach, ale samoplahowana pica za skót: Biologiske ratarstwo w Němskej so dale rozšěrja a wučinja mjeztym prěni króć dźesać procentow wšeje agrarneje płoniny. To zdźěli zwjazkowe ministerstwo za ratarstwo, złožowace so na ličby lěta 2020. Na łahodne biologiske wašnje hospodari mjeztym 35 400 ratarskich zawodow. To je 13,5 procentow wšitkich statokow, po tym zo bě jich před lětomaj hišće 12,9 procentow było. Tež mjez přetrjebarjemi so přiběrajcy za biowudźěłkami prašeja, byrnjež wone přiwšěm dale dosć drohe byli.
Kaž ministerka Julia Klöckner (CDU) w Berlinje rjekny, je ekologiske ratarstwo dale a wuznamniše, trend je stabilny. Jeničce loni je płonina 123 000 koparskich sportnišćow k tomu přišła.
Při tym su dale wulke regionalne rozdźěle. Najwjetši podźěl biologiskich zawodow ma Posaarska z 19,4 procentami. Slědujetej Hessenska z 15,9 a Braniborska ze 14,4 procentami – stajnje hladajo na cyłkownu ratarsku płoninu kraja. Na poslednim městnje steji Delnja Sakska z 5,2 procentomaj.
Chłostanje w nowej formje
Drježdźany (dpa/SN). Bydlić w zhromadnej skupinje, wuchodźować so po měsće a so po krutym dnjowym wotběhu měć: W Sakskej chcedźa přichodnje dorosćenym zasudźenym jastwowe žiwjenje w swobodnej formje zmóžnić. Towarstwo za socialne prawnistwo w Drježdźanach chce wot awgusta štyri tajke městna mužam poskićić, kotřiž su po chłostanskim prawje za dorosćenych zasudźeni, kaž justicne ministerstwo zdźěli. Swobodny stat je po informacijach prěni zwjazkowy kraj, kotryž tajki poskitk předpołoži. Justicna ministerka Katja Meier (Zeleni) je sej wěsta, zo je w swobodnej formje chłostanja lěpše dźěło z jednotliwymi jatymi móžne. „Zaměr je nowe žiwjenje jateho bjez chłostanja po pušćenju.“
Předewšěm jatych z problemami kaž alkoholizmom chcedźa w projektach zwonka jastwowych murjow zaměstnić. Tam změja kruty dnjowy wotběh a zhromadne jědźe. Towarstwo chce so wo jatych starać a jich na žiwjenje w swobodźe přihotować. Štó smě so na projekće wobdźělić, njeje hišće jasne. Wuzwolić pak chcedźa jenož tajkich, pola kotrychž njewobsteji strach, zo so jastwu wuwinu a prosće ćeknu.
To a tamne (24.06.21)
Mužej w kostimje spidermana ruku dał je bamž Franciskus a je tak wulku kedźbnosć zbudźił. Maskěrowany muž bě Italčan, kiž w kostimje chorownje wopytuje, zo by tam předewšěm dźěćom wjeselo wobradźił. Tydźenska generalna awdienca 84lětneho Franciskusa wotměwa so mjeztym zaso z wopytowarjemi. Bamž je dawno přećiwo koronje šćěpjeny.
Postawa praženeho prosatka wuskutkuje w Romje wótre diskusije. Wuměłska uniwersita italskeje stolicy bě skulpturu w měšćanskim dźělu Trastevere postajiła, hdźež je wosebje wjele turistow. Tući widźa tam nětko mortwe prosatko z kamjenja, bjez nohow a kaž ke grilowanju zwjazane – tak mjenowanu „porchetta“, tradicionalne pražene prosatko. Zwěrinoškitne organizacije přećiwo postawje raznje protestuja, dokelž maja ju za ranjenje zasadow derjeměća skotu a wšitkich ludźi w Romje.
Orbán na hru njepřijědźe
Mnichow (dpa/SN). Madźarski ministerski prezident Viktor Orbán je po informacijach powěsćernje dpa swój dźensa planowany wopyt koparskeje hry wubrankow Němskeje a Madźarskeje na europskich mišterstwach w Mnichowje wotprajił. Do skupinskeje hry běchu raznje wo wobswětlenju stadiona w tučelowych barbach debatowali. Europski koparski zwjazk bě wčera próstwu Mnichowskeje měšćanskeje rady wotpokazał. Wobswětlenje měješe so přećiwo rozsudej madźarskeho parlamenta na njedobro homoseksualnych měrić.
UNO warnuje před talibanami
New York (dpa/SN). Zjednoćene narody warnuja před dalšim wojerskim postupowanjom talibanow w Afghanistanje. Wot spočatka cofanja wojakow NATO z kraja su talibanojo 50 dalšich z cyłkownje 370 wobwodow kraja zdobyli. Hrozy strach, zo militantni islamisća dalše wobwody a jich stolicy přewozmu, zdźělichu w Bjezstrašnostnej radźe UNO. Připowědźenje, zo wukrajni wojacy kraj wopušća, je w politice a towaršnosći Afghanistana „zemjerženje“ zawiniło.
Poslednje woprašowanje
Andrej Dronow (2. wotprawa), ruski generalny konsul w Lipsku, a ...
Krajny sejm wuradźował
Drježdźany (dpa/SN). Z rozprawu krajneho knježerstwa su dźensa plenarne posedźenje sakskeho sejma zahajili. Wšitke frakcije mějachu składnosć so k njej wuprajić. Přezjedni sej běchu, zo je wuwiće incidency, ličby nowych natyknjenjow z koronawirusom, zwjeselace. W aktualnej debaće dźěše mjez druhim wo rozdźělenje srědkow k zmištrowanju strukturneje změny. K tomu běchu frakcije wotpowědne próstwy zapodali.
Ze swojej próstwu zwrěšćiła je frakcija AfD. Wona chcyše komisiju zasadźić, kotraž personalne wudawki swobodneho stata kritisce pruwuje. Za zasadźenje tajkeho parlamentariskeho gremija je 40 hłosow trěbnych. Dokelž pak ma AfD jeno 36 zapósłancow, njemóžeše so frakcija ze swojej próstwu přesadźić.
