To a tamne (09.07.21)
Pjeć ludźi je italska policija zajała, kotřiž běchu so jako posrědnicy Vatikana wudawali a tak swoje wopory wo wysoke pjenježne sumy wobšudźili. Pozdatni skućićeljo běchu škodowanym financne wikowanja k wosebje wunošnym kondicijam poskićili, zdźělichu carabinieri wčera w Romje. Wobšudźerjo zetkawachu swoje wopory wospjetnje w zjawnje přistupnych cyrkwinskich zarjadnišćach a žadachu sej posrědniski popłatk w hotowych pjenjezach.
Papagajnik je w badensko-württembergskim Vaihingenje nad rěku Enz zadobywarja zahnał, kiž je w nocy na srjedu přez nachilene wokno w přizemju do swójbneho domu zalězł. Při tym kwětkowc dele padny. Ptačk škrěkaše, paduch ćěkaše. Bjez rubizny pak njebě, na wobkromje wokna ležacu móšeń bě sobu wzał.
EU ma sankcije rozšěrić
Strasbourg (dpa/SN). Europska unija ma po woli Europskeho parlamenta swoje sankciske móžnosće přećiwo ranjenjam čłowjeskich prawow na korupciske delikty rozšěrić. Chłostanske naprawy njeměli přichodnje jenož ranjerjow čłowjeskich prawow trjechić, ale runje tak na hospodarskich a financnych podpěraćelow wusměrjene być, rěka w přiwzatej deklaraciji. Po njej prócuje so parlament EU tež wo zwjazkarstwo z USA, zo bychu mjez druhim ze sankcijemi přećiwo płokanju pjenjez postupowali, kaž prezidij parlamenta dźensa wozjewi.
„Strašny eksperiment“
London (dpa/SN). W zjawnym lisće kritizuje wjace hač 100 wědomostnikow a medicinarjow wotewrjensku koronapolitiku britiskeho knježerstwa jako „strašny eksperiment bjez skruplow“. Hdyž so wirus dźakowano planowanym wolóženjam, kotrež předwidźa kónc winowatosće nahubnik wužiwać a wotstawk dźeržeć, dale wupřestrěwa, móža so miliony ludźi natyknyć.
Bywši prezident w jastwje
„Wjećba Lukašenka“
Minsk/Vilnius (dpa/SN). Po stach pušća běłoruski mócnar Aleksander Lukašenko ćěkancow z wójnskich kónčin, kaž ze Syriskeje abo Afghanistana, na zapad. Čini to jako reakciju na sankcije Europskeje unije. Wón nikoho wjac njezadźerži, kiž chce do přijomneje Europy, rjekny 66lětny tele dny na knježerstwowym posedźenju. Chutnje měnjene hroženje Lukašenka pytnje wosebje susodny baltiski europski kraj Litawska. Po 81 ćěkancach cyłe lěto 2020 je jich lětsa po oficialnym zdźělenju hižo wjace hač 1300 do Litawskeje přišło, wosebje z Iraka, Syriskeje a Afghanistana. Litawska premierministerka Ingrida Šimonytė Lukašenkej porokuje, zo chce kraj a EU destabilizować.
Tež předsydka komisije EU Ursula von der Leyen a předsyda Rady EU Charles Michel starosćitaj so njeměra na mjezy dla.
Maaßen runje tak kaž Höcke
Erfurt (dpa/SN). Durinski ministerski prezident Bodo Ramelow widźi paralelu w zadźerženju kandidata CDU za wólby zwjazkoweho sejma Hansa-Georga Maaßena a šefa strony a frakcije AfD w Durinskej Björna Höcki. „Wón prowokuje ze swojimi raznymi wuprajenjemi, wočaknje rozhorjenje, zo by po tym twjerdźić móhł, zo su jeho wopak rozumili“, rjekny Ramelow powěsćerni dpa. „Maaßen wužiwa chětro podobne metody kaž knjez Höcke.“ Tajke prowokacije njesměli ludźi slepić, politikar Lěwicy podšmórny.
Maaßen nastupi za CDU jako direktny kandidat we wólbnym kruhu 196 za lětuše wólby zwjazkoweho sejma.
Wjelk tema w sakskim sejmje
Drježdźany (dpa/SN). Dźensa chcyše so wuběrk Sakskeho krajneho sejma za energiju, škit klimy, wobswět a ratarstwo znowa z wjacorymi namjetami frakcijow na temu wjelk rozestajeć. Tak so mjez druhim AfD za to wupraja, regulować jeho wobstatk. „Wjelk njeje ani w Europje, ani w Němskej, ani w Sakskej wohroženy“, wopodstatni frakcija swoje žadanje. W Němskej pak njeje žanoho managementa, kotryž regulaciju zmóžnja. AfD knježerstwo namołwja, zhromadnje ze zwjazkowymi krajemi „dźiwino-ekologiski rumowy koncept“ zdźěłać.
Koalicija CDU, Zelenych a SPD prosy wo sylniši management nastupajo wjelči wobstatk. Runočasnje so za to zasadźa, plahowarjow pastwoweho skotu hladajo na wudawki za jeho škit pjenježnje dale podpěrać. „Dotalne pozitiwne wuwiće wobstatka je wuspěch škita wjelkow, zdobom pak plahowarjow skotu wužaduje“, rěka ze stron koalicije. W Sakskej je tučasnje 25 wjelčich črjódow.
„To demokratiju wohrožuje“
Społnomócnjeny za wuchodne kraje Wanderwitz rozprawu předstajił
Berlin (dpa/SN). Społnomócnjeny zwjazkoweho knježerstwa za wuchodne zwjazkowe kraje Marco Wanderwitz wobkedźbuje mjez mnohimi wuchodnymi Němcami „pohłubšene zasadne dwěle“ napřećo politice a demokratiji. „To drje je mjeńšina, ale wona je wjetša hač w starych zwjazkowych krajach“, rjekny politikar CDU powěsćerni dpa. „To demokratiju wohrožuje. Dyrbimy docpěć, zo ludźi wo demokratiji a prawniskim staće přeswědčimy. Dyrbjało kónc z tym być, zo při kóždych wólbach jednoho z wuchodoněmskich krajnych sejmow kaž putani na wólbne wuslědki hladamy a dyrkotamy, kelko procentow su ekstremne mocy zaso docpěli.“
To a tamne (08.07.21)
Twochnjeny kenguru bě wčera w měsće Delmenhorsće po puću. Kaž rěčnik policije zdźěli, słuša skoćo swójbje. Swědka bě wčera rano policiju alarmowała, jako wuhlada kenguruwa při busowym zastanišću. Zastojnicy spytachu jeho popadnyć, štož pak so jim njeporadźi. Su tež přestali dale za nim pytać. Wšako z jich strony rěkaše: „Dokelž žane wohroženje njewobsteji, njejsmy přisłušni.“
Chětro wopity 56lětny je w běłym kitlu, ze zawobalenym łochćom a do ruki kałnjenej kanilu chorownju wopušćił a tak druhi raz na dźeń zasadźenje policije zawinił. Muž bě wutoru z 3,5 promilemi alkohola w kreji po durinskim Hildburghausenje kolesował. Zazy do wonkowneho špihela awta, padny a so zrani. Za braće kreje a zawobalenje ranow dowjezechu jeho do chorownje, hdźež pak so jemu po wšěm zdaću njelubješe.
Poraženosć po atentaće
Amsterdam (dpa/SN). Pospytane morjenje prominentneho nižozemskeho kriminalneho reportera Petera R. de Vriesa zbudźa w kraju wulku poraženosć. Policija je třoch podhladnych zajała. Ministerski prezident Mark Rutte rěčeše wo „nadpadźe na swobodny žurnalizm“. Na reportera běchu wčera wječor třěleli, jako wón studijo telewizijneho sćelaka wopušći. Skućićel bě jemu do hłowy třělił a jeho žiwjenjastrašnje zranił. De Vries leži w kritiskim stawje w chorowni.
Warnuja Iran před eskalaciju
Wien (dpa/SN). Wonkowni ministrojo Němskeje, Francoskeje a Wulkeje Britaniskeje warnuja Iran před dalšej eskalaciju w atomowej zwadźe. W zhromadnej deklaraciji zwuraznjeja woni swoje „chutne starosće“, zo móhł kraj uran na maćiznu předźěłać, kotraž hodźi so za twar atomowych bróni. Tajki material njeje za ciwilny wobłuk atomoweje energije trěbny, ale słuži jeničce za twar jadrowych bróni, ministrojo pisaja.
Dalše ćěła wućahnyli
Kritizuja namóc ze stron policije
Madrid (dpa/SN). Španiska policija dyrbi sej zasadźenja gumijowych retlow přećiwo wobdźělnikam demonstracije přećiwo homofobnej namocy raznu kritiku lubić dać. Na widejach je widźeć, kak su policisća póndźelu wječor bjez widźomneje přičiny demonstrantow w španiskej stolicy Madridźe bili. W telewiziji kritizowachu, zo su dźěle španiskeje policije na prawe wóčko slepe. Přećiwo lěwicarskim demonstrantam wone retle spěšnje wućahnu. Porno tomu móža prawicarjo w zjawnosći hitlerski postrow pokazać, zakazane spěwy spěwać a chorhoje wustawje njepřećelsce zmyslenych skupin při sebi měć, bjez toho zo policija jedna.
We wjacorych městach běchu póndźelu smjerće 24lětneho muža dla demonstrowali. Jeho běchu sobotu rano před diskoteku homofobnje ranili a tak ćežko zbili, zo wón na to w chorowni wudycha.
