Beneficny koncert lětsa digitalnje
Nowu popowu delnjoserbsku hymnu sobu spěwać
Choćebuz (SN/CoR). Wjace hač 700 přihladowarjow je dotal widejo 37. delnjoserbskeje schadowanki přiwabiło, kotruž su sobotu z kofejownje Delnjoserbskeho gymnazija w Choćebuzu jako livestream wusyłali. Połdrahodźinski widejo je na Youtube-kanalu Załožby za serbski lud wozjewjeny.
Wobnowjenje postupuje
W Budyskim Serbskim ludowym ansamblu instaluje tuchwilu Kubšiska metalotwarska firma Freund škleńčanu fasadu při nowym přitwarje za probowe rumnosće chóra a baleta. Po tym zo bě saněrowanje třěchi dokónčene, su tohorunja wokna wobnowili kaž tež wonkownu fasadu při Mosće měra ležaceho twarjenja wobarbili. Paralelnje přewjeduja w nutřkownych rumnosćach přihotowanske mulerske dźěła. Dom ansambla přetwarjeć započeli běchu hižo w oktobrje 2019. Po informacijach SLA dotal wšitke naprawy po časowym planje běža. Klětu w septembrje ma wšitko hotowe być. Foto: Jurij Helgest
Krótko do wospjetneho zawrjenja domu je znaty spěwar Ralf Schmidt ...
Ćitajće w nowym rozhledźe (26.11.21)
Z decembrej hodźacej so twórbu „Posledni přewoz“ Klausa Drechslera jako titulny motiw so aktualne wudaće Rozhlada zahaja. Maks Bagańc rozestaja so w swojim pojednanju ze subkulturu w Serbach, rozłožuje jeje teoriju a wotpowědne přikłady, a to na polu literatury, hudźby a w socialnych medijach. Při tym měni, zo swědči eksistenca tajkich projektow a fenomenow wo witalnosći serbskeje towaršnosće. Evelyn Fiebiger zaběra so ze serbskimi chowancami Krajnostawskeho wučerskeho seminara w Budyšinje a wěnuje so Ryćerjec bratram z Hodźija. Tónkróć steji Jan Ryćer w srjedźišću, kiž je po mjenowanym seminarje cyłe swoje žiwjenje w tehdom hišće serbskim Wóslinku wučerił. Justyna Michniuk pak je sej wustajeńcu „Cerno-Běłe. Serbske swaŕby w Slěpjańskej wósadźe“ wobhladała a reflektuje z pomocu fotow, kak běchu w dawnych časach na wsy kwasy swjećili.
Dobyćerjej wubědźowanja „Kocor 2.0“ jasnaj
Budyšin (SN). Składnostnje klětušeho Lěta Handrija Zejlerja a Korle Awgusta Kocora bě Towaršnosć za spěchowanje Serbskeho ludoweho ansambla spočatk lěta kompozitoriske wubědźowanje „Kocor 2.0“ wupisała. Towarstwo ma to w zwisku z jubilejom wuznamneju Serbow za wažny přinošk, wožiwić serbsku hudźbnu kulturu. Mjeztym bě so jury – jej přisłušachu pianistka a komponistka Liana Bertók, zastupjerka Zwjazka serbskich spěwarskich towarstwow Leńka Thomasowa, hudźbnica Lubina Žurec-Pukačowa, komponist Jan Cyž kaž tež intendant SLA Tomas Kreibich-Nawka – 15. oktobra zetkała, zo by zapodate hudźbne twórby pruwowała a wuhódnoćiła. Planowane mytowanske zarjadowanje, kotrež měješe so 19. nowembra w Budyskej Röhrscheidtowej bašće wotměć, su pak korony kaž tež snadneho wobdźělenja dla wotprajili. (SN informowachu)
Jury wubědźowanja bě z wjetšinu hłosow k slědowacemu rozsudej dóšła:
Dr. Leńka Šołćic do instituta
Budyšin (SN). Składnostnje lětnych posedźenjow wědomostneje přirady Serbski institut (SI) wčera wozjewi, zo naslěduje slawistka dr. Leńka Šołćic z Uniwersity Zürich 1. apryla 2022 rěčespytnicu dr. habil. Sonju Wölkowu, kotraž so potom na wuměnk rozžohnuje. 43lětna Serbowka Leńka Šołćic wuwučuje a slědźi tučasnje jako wyša asistentka na Słowjanskim seminarje šwicarskeje uniwersity. W lěće 2008 spožči jej město Konstanz disertaciske myto za doktorske dźěło „Das grammatische System der obersorbischen Umgangssprache unter besonderer Berücksichtigung des Sprachkontakts“. Jeje slědźerske ćežišća su rěčne kontakty, wosebje słowjanskich mjeńšinowych rěčow, werby pohiba we słowjanskich rěčach a gramatiske kategorije hornjoserbšćiny.
Leńka Šołćic bydli w Konstanzu, hdźež je wot lěta 1996 do 2002 slawistiku a germanistiku studowała. Dźěłała je na uniwersitach w Konstanzu, Baselu a Zürichu. Hižo za swoju disertaciju přebywaše wona w SI. Nimo wědomostneho poradźowanja přez Sonju Wölkowu přewostajichu jej za doktorske dźěło dialektalne nahrawanja z katolskeje Hornjeje Łužicy.
Z Mytom Gryphiusa počesćeny
Düsseldorf (AB/SN). W Düsseldorfskim Domje Gerharta Hauptmanna su minjeny pjatk Traianej Popej Traianej Myto Andreasa Gryphiusa 2020 přepodali. Wuznamjenjenje bu rumunsko-němskemu basnikej a nakładnikej z Ludwigsburga hižo před lětom spožčene, korony dla pak móžachu je jemu hakle lětsa zjawnje a swjatočnje přepodać.
Na přepodaću hódnoćachu njeličomne zasłužby wo mjezy a rěče překročacu literarnu wuměnu 1952 w rumunskim Braşovje rodźeneho a wot lěta 1990 w Ludwigsburgu bydlaceho a skutkowaceho spisowaćela a předewzaćela. W srjedźišću jeho tworjenja a wudawanja nakładnistwa Pop steja temy a edicije, zwjazowace južne a wuchodne literarne krajiny Europy ze zapadom.
Lute překwapjenki
Lipsk (SN). Druha kniha ze serije „Dolina při rěce“ z pjera Lubiny Hajduk-Veljkovićoweje je wušła: „Lute překwapjenki“ na was čakaja. Što pyta operowy zajac Cantaruzo w lěsu? Hač Ferdi zaso puć domoj namaka? A štó tam wo pomoc woła? Na dalše pjeć zajimawych stawiznow wokoło małych přećelow z lěsa móžeće so wjeselić a k tomu wězo na nowe hódančka.
Serbsko-němsku a serbsko-jendźelsku nowostku namakaće na Amazon, w Smolerjec kniharni a wšudźe, hdźež su serbske knihi na předań.
