Spěwanje ju zahorja
„W starobje pjeć lět sym w Budyšinje pod nawodom Friedemanna Böhme swój prěni solo spěwała“, powěda 19lětna Milena Wowčerjec z Nuknicy. Hižo na zakładnej šuli w Chrósćicach je wona na swjedźenju młodych talentow swój talent pokazała a pozdźišo w chórje Worklečanskeje srjedźneje šule so w spěwanju dale wukmaniła. „Sym dźakowna, zo dóstach stajnje trěbnu podpěru. Paralelnje k spěwanju nawuknych na gitarje hrać. Wjeselo je ćim wjetše, zamóžeš-li so sam na instrumenće přewodźeć.“ Na Nukničanskim jolka-swjedźenju móžeše wona hižo časćišo swoje spěwy předstajić.
Tež na rozmachu noweje serbskeje hudźby ma Milena swój podźěl. „Sym mjez druhim někotre title hromadźe ze Skupinu Astronawt natočiła. Najnowši je spěw ,Njewjedra‘. Mam za dobre, zo su dźensa mnohe móžnosće, hudźbu a ideje zjawnje z druhimi dźělić móc.“ Hromadźe z Janekom Süßom z Wopakeje prezentowaše wona pod mjenom „Stainless“ serbske, němske a jendźelske covery. Wustupowałoj staj mjez druhim hižo na delnjoserbskej schadowance a w Budyskim hosćencu „Culinarium“.
Póńdźetej zhromadnje: LND a SLA
Nowinka z RCW
Budyšin (SN). W Rěčnym centrumje WITAJ je wušoł nowy wuknjenski material za serbskich a serbšćinu wuknjacych 5. do 8. lětnika „Handrij Zejler – Słónco swoboda“. Wobsah nowinki su mj. dr. biografija, fabule a balady Zejlerja kaž tež jeho přećelstwo z Korlu Awgustom Kocorom. Z pomocu QR-coda je móžno sej štyri jeju spěwy naposkać.
Material pyta poćah k dźensnišemu wobswětej šulerjow. Zajimcy móža sej zešiwk w Budyskej Smolerjec kniharni abo w online-wobchodźe Ludoweho nakładnistwa Domowina kupić. Šule měli sej jón hač do 10. februara w RCW skazać.
Wo židowskich pohrjebnišćach
Swědstwa židowskich stawiznow w kónčinje zapadneje Pólskeje, kotraž słušeše hač do lěta 1945 do Prowincy Braniborska, běchu předmjet slědźenskeho projekta. Jeho wuslědki su nětko w interneće přistupne.
Frankfurt nad Wódru/Podstupim (RD/SN). Wone su wonjerodźene, zdźěla zničene abo přetwarjene, a přiwšěm móžeš nětko wo nich zhonić – židowske pohrjebnišća w zapadnej Pólskej, kotrež leža hač do lěta 1945 w Prowincy Braniborska. Němsko-pólski slědźenski objekt na Europskej uniwersiće Viadrina Frankfurt nad Wódru dokumentuje w zhromadnym dźěle z Uniwersitu Podstupim 26 židowskich pohrjebnišćow.
Krabat a Jank
Wuznamneho serbskeho prócowarja wopominali
W lěće 2018 bu w Skjarbošcu (Schorbus), hdźež bě Kito Šwjela (1836–1922) wjetšinu swojeho žiwjenja skutkował, pomnik z jeho bistu, wuhotowanej wot Hansa-Georga Wagnera, poswjećeny. Předwčerawšim swjećeše tam něhdźe 20 ludźi serbsko-němsku nutrnosć składnostnje 100. posmjertnin zasłužbneho wučerja, kantora, organizatora wjesneho žiwjenja, redaktora Bramborskeho Casnika a zahorjeneho plahowarja sadowcow a róžow.
Tři přidawki w Budyskej „Krónje“
Z widejemi hižo wjace hač 100 000 klikow docpěli
Lipsk/Budyšin (SN/JBo). Po tym zo je Skupina Astronawt w juliju 2020 swój prěni swójski widejo „Dwaj hrodaj“ na Youtube-kanalu „Serbska hudźba//Sorbian Music“ wozjewiła, slědowaše hač donětka wjac hač dźesać dalšich. Najnowši je hakle tele dny wozjewjeny widejo hudźbneho cyłka zhromadnje ze spěwarku Milenu Wowčerjec „Njewjedra“. Tak maja na swojim kanalu mjeztym cyłkownje 16 widejow. Wobhladać a naposkać móža sej zajimcy tam tež dale serbske hudźbne skupiny kaž Holaski, Wusmuž, Brankatschki a Nowa Doba.
Čitajće w nowym rozhledźe (28.01.22)
Z wolijowej mólbu „Bjez šlewjerja“ Rebekki Rauschhardt (* 1978) zahaja so februarske wudaće Rozhlada. W komentarje praša so Anja Pohončowa, hač su jenož „mužojo hódni wěčnoh wopomnjeća“, a namołwja jako předsydka Maćicy Serbskeje serbsku zjawnosć, wo móžnej změnje mjenowaneje linki serbskeje hymny rozmyslować, hdźež bychu so tež žony wotbłyšćowali. Wozjewjeny je dale interview z projektowym sobudźěłaćerjom Załožby za serbski lud a zamołwitym za medijowe zarjadnišćo Michałom Cyžom wo serbskorěčnych medijowych projektach, móžnosćach njekomercielneho serbskeho radija a wuwiću serbskeho medialneho swěta. Cyž zastupuje měnjenje, zo maja poskitki „tak analogne kaž móžno a tak digitalne kaž trjeba“ być.
Kito Šwjela poł lětstotka redaktor Casnika był
26. wulkeho róžka před sto lětami zemrě w Choćebuzu delnjoserbski wučer a redaktor Bramborskeho Casnika Kito Šwjela. „Chceće-li wědźeć, štó Kito (Křesćan) Šwjela bě, dyrbiće so wobhonić w jeho Bramborskim Casniku. Z tutym tydźenikom je so wón swojemu delnjoserbskemu ludej do wutroby zapisał. Mnozy so dźiwachu, zo bě jemu móžno kóždy tydźeń dlěje hač 50 lět při wšelakich druhich pismach tajku nowinu napisać a Serbam přepodać. W krótkich a dlěšich nastawkach rozwučowaše wón swój serbski lud jako jeho duchowny nawoda.“ Tak pisaše rowjenk Šwjele Wylem Nowy, farar w Choćebuskej Serbskej cyrkwi a awtor rjadu „Z božego kralejstwa“, w Bramborskim Casniku wo Kiće Šwjelu. 21. małeho róžka 1836 bě so Šwjela ratarskej swójbje w Zaspach pola Choćebuza narodźił. Wopytawši wučerski seminar w Nowej Cali bě wón pjeć lět wučer w Žergonju a dalše pjeć lět we Wjelikim Wóseńku (Groß Oßnig). 44 lět wučerješe w Skjarbošcu (Schorbus), doniž njepoda so na wuměnk w Choćebuzu, hdźež je na Sewjernym pohrjebnišću pochowany.
