Wuslědki workshopa wustajane

Dienstag, 13. September 2022 geschrieben von:
Tójšto zajimcow přiwabi wernisaža wosebiteje wustajeńcy „Zynk & barba“ wčera w Budyskim Serbskim domje. Na wjacorych poschodach pokazuje přehladka twórby, nastate we wobłuku 9. mjezynarodneho festiwala dudakow w Slepom wuhotowaneje molerskeje dźěłarnički pod nawodom Maje Nageloweje. Wo hudźbne wobrubjenje wotewrjenja postara so Serbski folklorny ansambl Slepo, tola tež wopytowarjo někotružkuli serbsku ludowu štučku zaspěwachu. Zarjadowar přehladki je towarstwo Spěchowanski kruh za serbsku ludowu kulturu. Foto: Maćij Bulank

We wobłuku dnja wotewrjeneho pomnika w Smochćicach wotměchu njedźelu popołdnju wosebity koncert. Spěwarjo Wojerowskeho komorneho chóra pod nawodom Anity Däbritz a skupina Wólbernosće podachu so zhromadnje z publikumom po ležownosći kubłanišća swj. Bena a spěwachu na sydom wuzwolenych městnach. Při tym přednjesechu ludowe a wuměłske pěsnje z wjacorych kontinentow. W jubilejnym lěće zaklinčachu wězo tež twórby Zejlerja a Kocora. Foto: Leńka Thomasowa

Kocor a Zejler w šaće 21. lětstotka

Montag, 12. September 2022 geschrieben von:
„Serenada w zelenym – Kocor & Zejler reloaded“ bě hesło koncerta, zahajaceho takrjec tradicionalne Němsko-Serbske nazymske wiki w Stróži. Najebać sylny dešć, kotryž zawini nimale hodźinske zapozdźenje, dožiwi něhdźe 40 zajimcow minjeny pjatk w stanje na łuce při Domje tysac hatow program, wopřijimacy na přikład pop, jazz a elektronisku hudźbu. Interpreća Trio a kumple – z hosćom bě mjez druhim spěwarka Milena Wowčerjec – běchu sej za njón wjacore kompozicije Korle Awgusta Kocora a Handrija Zejlerja wuzwolili a wobdźěłali, při čimž so prašenju wěnowachu, „kak drje bychu twórby klinčeli, bychu-li dźensa nastali“. Foto: Jurij Helgest

Jurij Hajna

Montag, 12. September 2022 geschrieben von:

Wuměłski moler Jurij Hajna słuša do generacije prěnich profesionalnych kubłanych serbskich molerjow a tohodla je bjez dźiwa, zo je jeho mjeno mjez załožerjemi Zjednoćenstwa serbskich wuměłcow (1923). Po zakazu skutkowanja (1937) słušeše k znowazałožerjam Koła serbskich tworjacych wuměłcow (1948). Po studiju na wuměłstwowej akademiji w Drježdźanach słužeše Jurij Hajna jako wojak-moler w Prěnjej swětowej wójnje, a to wosebje w Ruskej. Stipendij Drježdźanskeje akademije zmóžni jemu přebywanje w Italskej, hdźež ze­zna swoju pozdźišu mandźelsku. W Italskej kaž tež po nawróće 1933 do domizny předstaji a wuznamjeni so přede­wšěm jako krajinar a portretist. Kedźbyhódne su tež jeho ćišna. Krajiny z Italskeje su zwjetša akwarele, serija wosom napohladow na Budyšin su mólby. Wobraz ­Miny Witkojc je w Serbskim muzeju a portret dekana Jakuba Skale w Tachantskim muzeju w Budyšinje wustajenej.

Narodźił je so wuměłski moler Jurij Hajna 11. septembra 1877 we Wjerinej chěžce w Budyšinje, wčera před 145 lětami, a lětsa před 70 lětami, 6. septembra 1952, wón w Budyšinje zemrě.

Jurij Łušćanski

Błótowski krimi

Freitag, 09. September 2022 geschrieben von:

Tšupc (SN/bn). Katharina Gutšmidtojc je swoju mjeztym 13. knihu „Herz in Stü­cken“ wozjewiła. Jako „błótowska kriminalka“ wopisowana publikacija, w kotrejž komisaraj Krawc a Kowalik na Williama Shakespeara dopominacu tragediju přepytujetaj, je w formje e-booka na předań a hodźi so na wšitkich wulkich předawanskich platformach kaž na přikład Amazon, Hugendubel, Legimi abo Thalia kupić. Něhdźe stostronska, w samonakładźe wušła kniha płaći 3,49 eurow.

Hišće lětsa chce awtorka dalšu, w samsnym formaće přistupnu knihu wudać, Gutšmidtojic připowědźi.

Damaskusowa stwa w Drježdźanach zaso přistupna

Freitag, 09. September 2022 geschrieben von:

Drježdźany. Wuznamna Damaskusowa stwa w Drježdźanskim ludowědnym muzeju w Japanskim palaisu je zaso kóždemu přistupna. Po štwórć lětstotka trajacej, wobšěrnej restawraciji, stej Léontine Meijer-van Mensch, direktorka ludowědnych muzejow w Lipsku, Drježdźanach a Ochranowje, a generalna direktorka Statnych wuměłstwowych zběrkow Drježdźany Marion Ackermann, trajnu přehladku „Dialog mjez hosćimi“ předwčerawšim na nowinarskej konferency wotewriłoj. Pod titulom „Dialog mjez hosćimi – Damaskusowa stwa w Drježdźanach přeproša“ sposrědkuje w Syriskej w lěće 1810 zhotowjena drjewjana dekoraciska stwa wot nětka zaso zajimcam rjanosće orientaliskeho wuměłstwa.

Na wosebitu prapremjeru přeproša towarstwo Cyrila a Metoda zhromadnje z Chróšćan farskej wosadu jutře, 10. septembra na tamnišu farsku łuku, hdźež předstaja wjace hač 100 sobuskutkowacych dźiwadłowy kruch „Mór a lubosć“. Dalše předstajenja budu 11., 16., 17. a 18. septembra. Wšitke předstajenja započnu w 19.30 hodź. Foto: Feliks Haza

Wo knihach a kniharni (09.09.22)

Freitag, 09. September 2022 geschrieben von:

Započatk nazymy je tradicionelnje čas wuńdźenja Serbskeje protyki a pratyje na nowe lěto. Titulnu stronu delnjoserbskeje knižneje protyki 2023 pyši napohlad Wjerbna. Wosobinsce mějach njerjane dožiwjenje w tej błótowskej wsy: Krótko po změnje běch słužbnje z knižnym blidom na swjedźenju Wjerbnjanskeje wohnjoweje wobory. Chětro podhladnaj kmótraj poskićištaj mi najprjedy, zo byštaj „mojemu staremu na frasu dali“, mějo mój přinarodźeny čerwjeny blečk mjezwoči za zranjenje – při tym steješe „mój stary“ pódla mje. Potom wupožčištaj sej wote mnje pisak a papjeru, zo byštaj stejo při knižnym blidźe serbskeho nakładnistwa planowałoj swój přichodny coup: załamać so do někajkeho domskeho. Njetrjebała drje dodać, zo tehdy lědy něšto předach.

W Zaspach „kokot“ za dźěći wuhotowali

Donnerstag, 08. September 2022 geschrieben von:

Na ponyju jěchajo kokota łapać? W Zaspach (Saspow) su to zańdźenu sobotu takle zdokonjeli: Tola nic Zaspowska młodźina, ale dźěćina.

Z ponyjoweho dwora w Gołkojcach (Kolk­witz) běchu sej organizatorojo swjedźenja dwaj skludnej konikaj wupožčili. Dźewjeć hólcow w šulskej starobje so wubědźowaše. Jěchachu wotměnjejo so na ponyjomaj přez z dubowym lisćom wobwite wrota a so za tam wisacym honačom naćahowachu. Tak wubědźowachu so wo česć prěnjeho, druheho a třećeho krala. Wosebje zwjeselace bě: Jědnaće małolětnych holcow a dźewjeć žonow bě sej k žnjowemu swjedźenjej serbsku drastu woblěkało. Holčki běhachu napřemo, štó zamóže najspěšnišo žabu přez horbatu łuku karować. Kapon a žaba wšak běštej z płata zešitej. Tak njedyrbi so w němskich nowinach hižo nichtó wo nałožku njewobhonjeny na Serbow hubu drěć. Hewak wšak je serbski nałožk wokoło „kokota“ kaž pola dorosćenych młodych muži wotběžał. Wšelakich přičin dla stawa so tole w Zaspach njeprawidłownje, druhdy z wotstawkami wjacorych lět. Cyle po tym hač je dosć chrobłych pachołow.

„Hoberski projekt“ lubi „kolosalne nazhonjenje“

Donnerstag, 08. September 2022 geschrieben von:

Serbski ludowy ansambl je hrajnu dobu 2022/2023 zahajił. We wobłuku nowinarskeje konferency informowachu wčera w Budyskej Röhrscheidtowej bašće wo planowanych wjerškach a wodźachu zastupjerjow medijow po saněrowanych resp. nowonatwarjenych rumnosćach institucije.

Budyšin (SN/bn). „Po wšo druhe hač jednorej hrajnej dobje hotujemy so na nowu sezonu. W 70. lěće wobstaća SLA móžemy skónčnje zaso po zwučenym wašnju probować“, intendant domu Tomas Kreibich-Nawka rozmołwu zahaji a připowědźi „prěnju wulku prapremjeru“, inscenaciju „Z nadźije do přichoda“, kotruž chcedźa 16. septembra na hłownym jewišću Němsko-Serbskeho ludoweho dźiwadła w Budyšinje prěni raz pokazać. Režiju a choreografiju zamołwjacy Měrko Mahr mjenowaše produkciju „hoberski projekt“, wopřijimacy wšitke sparty SLA kaž tež hóstnych solistow a dźěći. Dotal su tři předstajenja kruće zaplanowane, aktualnje dźěłaja na trochu redukowanej turnejowej wersiji.

Nowe poskitki LND namakaće w lětušim wudaću Nowinkarja!

Nowinkar 2026-27

Chróšćan Šulerjo

Midas Logo