Přiměr mjez Iranom a Israelom
Teheran (dpa/SN). Wot prezidenta USA Donalda Trumpa připowědźeny přiměr mjez Iranom a Israelom wot dźensnišeho ranja 6 hodź. płaći. Bjezposrědnje do toho je Iran hišće raz salwu raketow na Israel wottřělił. Jedna z raketow zrazy do města Beerscheba a mori tam štyrjoch wobydlerjow. Iranski statny rozhłós rozprawja, zo je Israelej přiměr „nanuzował“. Wčera bě Iran wojerske lětarske zepěranišćo USA w Kataru z raketami nadběhował. Powětrowy škit pak móžeše wšitke rakety wotwobarać. Nichtó so njezrani.
Němski wonkowny minister Johann Wadephul (CDU) ma po iranskim nadpadźe za zepěranišćo USA diplomatiske rozmołwy mjez USA a Iranom za móžne. Rozmołwy mjez krajomaj bychu spomóžne za region a za wšón swět byli, rjekny Wadephul w sćelaku ARD. Postupowanje Irana přećiwo USA je Wadephulej znamjo, zo Iran swoje srědki łahodnje zasadźa. Tež reakcija Trumpa je wuwažena, tak Wadephul. Dalšej eskalaciji wojerskeho rozestajenja hodźi so tuž zadźěwać“, je sej wonkowny minister wěsty.
Srědki za klimu derje zasadźić
Prezident zwjazkoweho zarjada za wobswět namjety předpołožił
Berlin (dpa/SN). Srědki z hoberskeho wurjadneho zamóženja za škit klimy a za wobchad měli so po měnjenju zwjazkoweho zarjada za wobswět za to nałožować, zo móža sej ludźo elektroawta kupić a stare twarjenja ponowić. Wočakowane inwesticije měli so na dobro klimy wuskutkować a socialnje sprawnje rozdźělić, rjekny prezident zarjada Dirk Messner powěsćerni dpa w Berlinje.
Wosebje małe a srjedźne awta měli so spěchować, tak Messner. „Ludźo ze snadnymi dochodami dóstanu wyšu přiražku.“ Kaž pola podpěry za studentow měła mjeza dochodow z měritkom być. „Stat njeměł elektroawta za dźěći z bohatych swójbow financować.“
Polěpšić měli so infrastruktura nabiwanskich stacijow w zjawnym rumje, blisko awtodróhow, za nakładne awta tež w nocy a přizamki za wjaceswójbne domy. Zjawny bliskowobchad měł so spochi dale wutwarjeć, sej Messner žada. Knježerstwo CDU/CSU a SPD chce elektroawta spěchować, mjez druhim z dawkowymi lěpšinami za słužbne awta. Hač tež statnu podpěru za priwatnych ludźi planuja, njeje znate.
Dokładnje připosłuchać!
Chinscy lěkarjo w Budyšinje
Wjace namocyw zjawnej słužbje
Drježdźany (dpa/SN). Němski dźěłarniski zwjazk DGB skorži přiběraceje namocy přećiwo přistajenym zjawneje słužby dla. „Ličby su alarmowace a spochi přiběraja“, kritizuje krajny předsyda Markus Schlimbach. Po cyłoněmskich statistikach su loni nimale 111 500 namócnych njeskutkow přećiwo policistam, sobudźěłaćerjam wuchowanskeje słužby a wohnjowym wobornikam zličili, to je nimale pjeć procentow wjace hač lěto do toho.
Tež sobudźěłaćerjow železnicy stajnje zaso ranja, wohrožuja a samo ćělnje nadběhuja. Po zwěsćenju dźěłarnistwa železnicarjow je so 82 procentow přistajenych z direktnym kontaktom k ludźom w běhu swojeho powołanskeho žiwjenja hižo raz z woporom ćělneho nadpada stał.
Wšitke namócnosće měli so zapisać a konsekwentnje chłostać, sej Schlimbach žada. „Namóc přećiwo přistajenym zjawneje słužby njeje žadyn nakromny zjaw.“ Nimo toho dyrbjeli zamołwići swojich sobudźěłaćerjow lěpje před namócnosćemi škitać. K tomu słuša wjace personala a lěpše techniske wuhotowanje.
Wčera bě dźeń zjawneje słužby, kiž ma w Sakskej 239 000 přistajenych.
To a tamne (24.06.25)
Surfowanje psow je minjeny kónc tydźenja zaso tójšto přihladowarjow do pobrjóžneho města Huntington Beach njedaloko Los Angelesa w Kaliforniskej přiwabiło. Psy wubědźowachu so tam na płuwacych deskach. Wosebity star bě Faith, ameriski pitbull-terrier: Hłucha a nimale slepa psyca poda so zmužiće na desce do žołmow. Nimo toho wubědźowachu so psy w slalomowym běhu, při skakanju přez zadźěwki a w dalokoskoku.
Wulkeje hary nadróžneho wobchada dla ćerpi mjeztym kóždy pjaty wobydler Europy. Něhdźe 112 milionow ludźi w 31 přepytowanych krajach dyrbi z trajnej haru w swojej wokolinje žiwych być. Tole piše europska wobswětowa agentura EEA w swojej nowej rozprawje. Hara nješkodźi jenož strowoće ludźi, ale wuskutkuje so negatiwnje na wobswět a hospodarstwo. Polěpšenje njeje wotwidźeć.
Ekumeniske znamjo
Genf (B/SN). Do swjatkow su Lutherski swětowy zwjazk (LWB) a zastupjerjo ortodoksnych cyrkwjow swoje diferency mjez wuchodnymi a zapadnymi cyrkwjemi w zhromadnym wozjewjenju k Swjatemu Duchej pomjeńšili. LWB reprezentuje 150 sobustawskich cyrkwjow z wjace hač 78 milionami wěriwych.
Zhromadne jutry swjećić
Bonn (B/SN). Zamołwity biskop za swětowu cyrkej Bertram Meier je zastupjerjow grjeksko-ortodoksneje cyrkwje k zhromadnemu terminej za swjećenje jutrow namołwjał. „Čas za to je zrały, wola tu je. Njech Bóh zamołwitych našich cyrkwjow přewodźa, zo bychu bórze rozsudźili. Přetož křesćanski swět žedźi za wuprajiwymi znamjenjemi jednoty.“ Zakłady za nju běchu před 1 700 lětami na koncilu w Niceji połožili.
Chinski stat biskopa připóznał
Swjedźeń z wjerškom zakónčili
Teheran namołwjeny
Berlin (dpa/SN). Po nadpadach USA na atomowe objekty w Iranje namołwjeja zwjazkowy kancler Friedrich Merz (CDU), prezident Emmanuel Macron a premier Keir Starmen Iran w zhromadnej deklaraciji, so za blido jednanjow wróćić. Nastać měło zrěčenje, kotrež wšitke wobmyslenja nastupajo iranski atomowy program wotstroni. Iran njesměł žane naprawy wjace zwoprawdźić, kiž region znjeměrnja.
Rozmołwy bjez wuslědka
Berlin (dpa/SN). Zwjazkowe knježerstwo a zwjazkowe kraje Němskeje wojuja dale wo pjenježne rjadowanje nastupajo planowany inwesticiski program na dobro hospodarstwa. Koło jednanjow financneho ministra Larsa Klingbeila (SPD), nawody kanclerskeho zarjada Thorstena Freija (CDU) a wjacorych ministerskich prezidentow je so wčera wječor bjez wuslědka skónčiło. Dźensa wječor chcedźa znowa wuradźować. Kraje žadaja sej wurunanje za falowace dochody.
Žadaja sej wjace personala
