Drježdźany (dpa/SN). Kwalita wučby na sakskich šulach njeměła po měnjenju Zelenych pod falowacymi wučerjemi ćerpjeć. Nawoda krajneho zjednoćenstwa strony Martin Helbig reagowaše z tym na plany kultusoweho ministerstwa, z kotrymiž chcedźa wjace wučby z wučerjemi-přidružnikami zaručić, kotřiž jenož jedyn předmjet wuwučuja. Tak chcedźa absolwentow wysokich šulow z kwalifikacijemi w předmjetomaj hudźba a wuměłstwo we wučbje zasadźeć. Wo tym je dźenik Sächsische Zeitung jako prěni rozprawjał. Helbig podšmórny: „Kreatiwne předmjety kaž hudźba abo wuměłske kubłanje zesylnjeja wuwiće wosobiny młodych čłowjekow a su njeparujomny dźěl cyłotneho kubłanja. Je derje, zo swobodny stat jich wuznam připóznawa.“ Wučerjo z jenož jednym předmjetom pak njesměli tunje rozrisanje być, pod kotrymž naposledk šulerki a šulerjo ćerpja, wón doda. „Štóž chce jich dołhodobnje zasadźować, dyrbi so wo dosahace pedagogiske wukubłanje a mentoring za nich postarać.“

Wjacore zwjazkowe kraje wosebity status dweju krajow kritizuja

Mnichow (dpa/SN). Kóžde lěto spočatk awgusta startuja šulerki a šulerjo z Bayerskeje a Badensko-Württembergskeje jako posledni do lěćnych prózdninow – mjeztym zo dyrbja druhe zwjazkowe kraje rotěrować. Tole so wšěm njelubi.

W debaće wo wosebitym rjadowanju za južnej krajej su so nětko wjacore zwjazkowe kraje kritice z Porynsko-Westfalskeje přizamknyli. „Za nas to tohorunja změrowace njeje“, praji rěčnik nižosakskeje kultusoweje ministerki Julije Willie Hamburg (Zeleni) na naprašowanje. Čehodla so zwjazkowej krajej na rotěrowacym systemje njewobdźělitej, měłoj so wonej samej prašeć. „Zasadnje by wote wšěch krajow akceptowane rjadowanje wjac přihłosowanja – tež w ludnosći – měło.“ 50 lět so zwjazkowe kraje při swojich terminach lěćnych prózdninow hižo wothłosuja. Konferenca kultusowych ministrow by najzašo za šulske lěto 2030/2031 nowe rjadowanje wobzamknyć móhła.

Za šulske dźěći w Sakskej je połojca prózdnin nimale nimo. Hdyž wone zaso do šule póńdu, su so za dźěći na juhu Němskeje runje hakle prózdniny započeli. Spočatk awgusta zahaja so tam prózdniny, to bě hižo přeco tak. Trochu arogantne wšak wustupowanje najlěpšeho ministerskeho prezidenta z najrjeńšeho zwjazkoweho kraja je, hdyž wón praji, zo Baworska na swojim terminje prózdnin ničo njezměni. To je za rólu najwjetšeho zwjazkoweho kraja někak symptomatiske: Wšitcy druzy móža so někak dojednać. Nó derje, haj – tež Badensko-Württembergska nic, ale što wo to. Snano by južnej połojcy Němskeje tyło, so raz ze sewjernym dźělom kraja za blido sydnyć a prastare naroki a priwilegije wotpołožić. Pak ma kóždy zwjazkowy kraj swoje priwilegije, pak žadyn. Tak abo tak podobnje naš horco lubowany federalizm funguje. Mój namjet: Mamy so wšitcy po baworskim principje: Najprjedy my a potom cyle dołho ničo. Maximilian Gruber

Berlin (dpa/SN). Wjele zwjazkowych krajow njeje po měnjenju Němskeje wobswětoweje pomocy (DUH) dosć na wulke powodźenja přihotowanych. Při tym je strach škodow w někotrych kónčinach wosebje wulki, kaž towarstwo zdźěli. „Dotal zwjazkowe kraje přemało za škit potencielnje stow tysacow potrjechenych činja“, praji jednaćel DUH Sascha Müller-Kraenner.

Najwjetša potrjeba nachwatanja we wobłuku prewencije powodźenjow a w prewenciskim monitoringu wobsteji z wida DUH při přirodnym škiće před powodźenjom, na přikład přez renaturěrowanje łučinow a rěkow. Dźakowano tutym naprawam móže so woda lěpje wupřestrěwać a pomału zaso wotběžeć. „Rěki a rěčki trjebaja skónčnje wjac městna, woda dyrbi so w intaktnych lěsach, na łukach a włóžnych kónčinach wróćo dźeržeć“, praji Müller-Kraenner.