Žurnalisća su porno politikarjam w komfortabelnym połoženju: Njetrjebaja dopokazać, zo jich mjenje abo bóle mudre přispomnjenja, komentary a přilopki praktisce funguja. Najebać to je dźensa rano přehlad sćelaka MDR aktuell wo měnjenjach němskich nowin nastupajo generalnu debatu w zwjazkowym sejmje pokazał, zo maja medije swój podźěl na tuchwilnej politiskej situaciji. Mnozy komentatorojo so na tym postorkuja, zo zwjazkowy kancler Merz narěč předsydki AfD ignorował njeje, ale je so z wobsahom jeje porokow roze­stajał. Kaž je to dobry demokratiski stil, wšako je Weidel reprezentantka najwjetšeje frakcije opozicije. A dotalna ignoranca jej napřećo je k tomu wjedła, zo bu prawicarska strona w zašłych dźesać lětach dale a sylniša. Merz wě, zo móže jenož konsekwentna konserwatiwna politika pokročowanju tutoho trenda zadźěwać, wšako je wjetšina ludnosće konserwatiwnje woliła – hač so to komentatoram lubi abo nic. Marcel Brauman

US-ameriskeho influencera a pilota Ethana Guoa je chilska justica po njedowolenym přizemjenju w Antarktice pochłostała. Wón bě pječa wopačny plan wo swojim lěće zapodał a bjez dowolnosće na chilskej slědźenskej staciji w Antarktice přizemił. Guo chce ze swojim lětadłom po wšěch sydom kontinentach lećeć a tak dary za dźěćacy centrum hojenja raka w USA zběrać. Wjace hač milion ludźi jeho akciju na socialnych syćach sćěhuje.

Serval je póndźelu wječor w měsće Reinbek blisko Hamburga ze swojeho chlěwa ćeknył. To je dźiwja kóčka, kotraž móže strašna być, čuje-li so wohrožena, informuje město. Štóž zwěrjo wuhlada, měł so na město abo policiju wobroćić. Popadnyć pak kóčku nichtó njeměł. Servale pochadźeja z Afriki, hdźež su wosebje južnje Sahary žiwe.

Něhdźe 15 000 Japančanow w Düsseldorfje a we wokolinje města bydli. Blisko dwórnišća leži štwórć „Little Tokyo“, w kotrejž wuhladaš nimo tójšto japanskich barow a wobchodow tež cyle samozrozumliwje dróhowe taflički w japanšćinje. Tute je město­ Düsseldorf w lěće 2021 wosebje z marketingowych přičin připrawić dało, zo by turistow na mjezynarodnu atmosferu města skedźbniło.

Foto: dr. Lubina Malinkowa

Düsseldorf (dpa/SN). W Essenje su specialisća policije 27lětneho muža podhlada terora dla zajeli. Generalne statne rěčnistwo w Düsseldorfje je přikazało muža zajeć. Mužej wumjetuja přemyslniske wobšudnistwo, zo by islamistisko-teroristiski atentat financować móhł. Hišće dźensa chcedźa muža zamołwitemu sudnikej předstajić. Nutřkowny minister Sewjerorynsko-Westfalskeje Herbert Reul (CDU) praji, zo je policija potencielnemu aktej terora zadźěwała.

Taiwan trenuje inwaziju

Taipeh (dpa/SN). Taiwan je swoje lětne zwučowanje wójska „Han Kuang“ zahajiło. Z tym chcedźa zamóžnosće armeje w padźe nadpada přez Chinu přepruwować. Prěni raz traje zwučowanje dźesać město pjeć dnjow. Po tym zo běchu jón 1984 prěni raz přewjedli, je lětuši manewer tuž najwjetši. Wobstajnje přiběraceho stracha z Chiny dla trenuje Taiwan swoje zamóžnosće lětsa prěni raz zhromadnje z ludnosću.

Merz na prašenja wotmołwjał