To a tamne (24.07.19)
27 000 eurow za třihanje kerkow a syćenje trawnika je 73lětny w Hamburgu pozdatnym rjemjeslnikam płaćił. Rentnar bě třom mužam pjenjezy hižo do zahajenja dźěłow přepodał, policija zdźěli. Jedyn z nich bě so z mužom na wobjim dźěłow při durjach dojednał. Krótko po zahajenju dźěła so mužojo dopomnichu, zo hišće dalši grat trjebaja a so zminychu.
Wosrjedź horcoty sel na dróhi sypać – tole činja w Nižozemskej. Rěčnica komuny Utrechtse Heuvelrug naprawu wopodstatni: Ze selu móža dróhi chłódźić. Sel ćehnje włóžnotu z powětra, kotraž asfalt chłódźi. Tak tomu zadźěwaja, zo asfalt při wysokich temperaturach rozběži abo so puka. Na awtodróhach njeje tole trjeba, dokelž maja tam hinaši asfalt.
Pomjenuja noweho premiera
London (dpa/SN). W britiskej stolicy Londonje chcychu dźensa popołdnju naslědnika premierministerki Theresy May pomjenować. Po woprašowanjach ma bywši wonkowny minister Boris Johnson najlěpše wuhlady, so z nowym předsydu konserwatiwneje strony a tak tež nowym premierministrom stać. Johnson je horliwy přiwisnik brexita a chcył wustup kraja z Europskeje unije 31. oktobra w nuzy tež bjez zrěčenja z EU přesadźić.
Ruske lětadło warnowali
Seoul (dpa/SN). Wójsko Južneje Koreje je po swójskich informacijach k warnowanju na ruske wojerske lětadło třělało, kotrež bě so do powětroweho ruma kraja zadobyło. Po informacijach južnokorejskich medijow jednaše so wo ruskeho bombowca. Jako reakciju běchu južnokorejske wojerske mašiny startowali a wjacore salwy třěleli. Dalše nadrobnosće njeběchu dopołdnja hišće znate. Moskwa njeje na informacije dotal reagowała.
Namołwjeja knježerstwo
Miliony eurow za poradźowarjow
Berlin (dpa/SN). Zwjazkowe knježerstwo je w prěnjej połojcy lěta znajmjeńša 178 milionow eurow za eksternych poradźowarjow wudało. Tole je wuslědk woprašowanja financneho ministerstwa mjez 14 ministerstwami, kotrež su w nadawku zapósłanca Lěwicy Matthiasa Höhna přewjedli. Z wotstawkom najwjace stej nutřkowne ministerstwo ze 78,7 milionami eurow a wobchadne ministerstwo ze 47,7 milionami eurow do wěcywustojnosće zwonka ministerstwa inwestowałoj. Porno tomu je kubłanske ministerstwo najmjenje za přidatne posudki wudało: Tam su w prěnich šěsć měsacach jenož 293 000 eurow za poradźowarjow wudali.
Jako jeničke zwjazkowe ministerstwo njeje zakitowanski resort na naprašowanje wotmołwił. Tam trjebaja hišće chwile, zo bychu ličby znosyli, rěčnica ministerstwa zdźěli. Matthias Höhn ma tole za „skandalozne“. Mjeztym přepytowanski wuběrk praksu bywšeje zakitowanskeje ministerki Ursule von der Leyen (CDU) poradźowarjow dla přepytuje.
Městam prawo
To a tamne (23.07.19)
Pjeć měsacow do hód je so wčera w danskej stolicy Kopenhagenje kóždolětny kongres rumpodichow zahajił. Dźesatki mužow z běłej brodu a w čerwjenym kabaće su sej zajimawosće města wobhladali a sej zhromadnje z čołmom wulećeli. Kongres zarjaduja wot lěta 1957 we wólnočasnym parku sewjernje stolicy. Wobdźělnicy přińdu mjez druhim z Japanskeje, USA a Wulkeje Britaniskeje.
Kuriozneho zmylka dla dyrbja wulosowanje prěnjeho koła Berlinskeho krajneho koparskeho pokala wospjetować. Towarstwje FC Polonia a FC Al-Kauthar njebuštej minjeny pjatk při wulosowanju wobkedźbowanej, Berlinski koparski zwjazk zdźěli. Nětko dyrbja wulosowanje jutře wospjetować. „Wobstejnosće su mjerzace, ale nuznje trěbne. Smy dźakowni, zo su towarstwa tak spěšnje reagowali, zo móhli zmylk skorigować.“
Hida na cuzych přiběra
Rom (B/SN). Berlinski socialny etikar prof. dr. Andreas Lob-Hüdepohl widźi strach před přichodom po cyłym swěće přiběrać. Na mjezynarodnej zhromadźiznje w Romje rozprawješe wón na temu wo straše, kiž masiwnje přiběra. „Strach před cuzymi přiběra a z tym schowana a wotewrjena njepřećelskosć w towaršnosći a w cyrkwi napřećo wšemu njeznatemu“, rjekny katolski profesor sćelakej Domradio.
Potajnstwo wostanje
Vatikan (B/SN). W zwisku ze skandalom znjewužiwanja dla je Vatikan wuzběhnył wažnosć, zo njehodźi so spowědne potajnstwo wotstronić. Vatikanske sudnistwo Pönitentiarie je přećiwo wočakowanjam, zo ma cyrkej swój porjad prawa statej připodobnić. Dźeržeć so na spowědne potajnstwo njeje pak toleranca napřećo znjewužiwanju, rjekny nawoda sudnistwa, kardinal Mauro Piacenza.
Benedikt wostawa kruty
Agenća CIA w Iranje zajeći
Teheran (dpa/SN). Iranska tajna słužba je po swójskich informacijach syć CIA, tajneje słužby USA, w Iranje wotkryła. W tym zwisku su 17 agentow zajeli, zdźěli rěčnik wotrjada iranskeje tajneje słužby k wotwobaranju spionaže. Wšitcy zajeći su iranscy staćenjo. Někotrym z nich hrozy smjertne chłostanje. Tež někotre europske a aziske kraje běchu na zasadźenjach CIA přećiwo Iranej wobdźělene, rěčnik nowinarjam zdźěli.
Nowy naćisk Spahna
Berlin (dpa/SN). Wot zwjazkoweho ministra za strowotnistwo Jensa Spahna (CDU) nastorčena reforma nuzoweho strowotniskeho zastaranja nabywa konkretne formy. Po informacijach medijow Spahn planuje, nuzowe čisło 112 za wuchowansku słužbu a čisle 116 a 117, z kotrymajž su terminowe serwisowe městna samostatnych lěkarjow docpějomne, hromadźe połožić. Pacienća móža tak posudk dóstać, hač dyrbja do chorownje abo hač ambulantne zastaranje dosaha.
Pompeo Mexikej so dźakował
W ćichej zrudobje steja ludźo w japanskim měsće Kyoto před ...
Ze sylnym mandatom wójnu skónčić
Kijew (dpa/SN). Po dobyću swojeje strony při wólbach parlamenta je zapadej přichileny ukrainski prezident Wolodimir Zelenskij swój zaměr potwjerdźił, wójnu na wuchodźe Ukrainy skónčić. Dalšej nadawkaj stej nawrót ukrainskich jatych z Ruskeje a dobyće nad korupciju, rjekny prezident wčera wječor w Kijewje. Jeho strona „Słužownik ludu“ bě wólby jasnje dobyła, trjeba pak přiwšěm koaliciskeho partnera.
Po dotalnym wuličenju je sej strona Zelenskeho 42 procentow hłosow zdobyła. Druha najsylniša strona je proruska opoziciska platforma z nimale třinaće procentami. Stronski předsyda Jurij Bojko bě sej wěsty, zo móhła so Ukraina z tutym wothłosowanjom zaso na měrliwy a normalny puć nawróćić. Na třeće městno přińdźe strona bywšeho prezidenta Petra Porošenka z wosom procentami.
Maas: Humanitarny zawjazk Europy
Paris (dpa/SN). W zwadźe nastupajo europske přechodne rjadowanje za w Srjedźnym morju wuchowanych ćěkancow prócuje so zwjazkowy minister za wonkowne naležnosće Heiko Maas najebać razne spjećowanje wo zhromadne rozrisanje statow Europskeje unije. „Njesměmy popušćić, doniž njejsmy rozrisanje namakali. To je humanitarny zawjazk Europy“, rjekny politikar SPD do informelneho zetkanja wjacorych nutřkownych a wonkownych ministrow EU k tutej temje w Parisu.
Maas bě sej wěsty, zo móže Europa „spěšne a programatiske rozrisanje“ namakać. K tomu měli wšitcy „kročałku do směra na druheho“ hić. Lětsa je so po jeho słowach hižo 400 migrantow při pospyće zatepiło, Srjedźne morjo přeprěčić. „Njewotpowěduje mojim předstawam wo Europje, zo so z tajkej katastrofu před našimi pobrjohami wotnamakamy.“
Hakle minjeny tydźeń bě Němska zhromadnje z Francoskej w Helsinkach podarmo spytała, system rozdźělowanja ćěkancow w EU namakać.
