Roth: Knježerstwo měło jednać
Berlin (dpa/SN). Wiceprezidentka Němskeho zwjazkoweho sejma Claudia Roth je zwjazkowe knježerstwo namołwjała, politiku ćěkancam napřećo změnić. „Priwatne wuchowanje ludźi z mórskeje nuzy dyrbjało poprawom njetrjebawše być, dokelž je to statny nadawk“, rjekny politikarka Zelenych nowinarjam. Pozadk je wuwiće wokoło wuchowanskeje łódźe „Sea-Watch 3“ w Italskej. „Je načasu, zo knježerstwo to spóznaje a skónčnje wotpo- wědnje jedna.“ Němske knježerstwo móhło dawno zhromadnje z druhimi europskimi krajemi wuchowansku misiju na nohi stajić, Roth kritizowaše. Město toho chowa so wone za cyłoeuropskim rozrisanjom, kotrež njeje wotwidźomne.
Pušćenje němskeje kapitanki „Sea-Watch 3“ Carole Rackete mjenowaše Roth „zwjeselace a konsekwentne“. Wona je prawje jednała a ludźi před zatepjenjom wuchowała, kaž sej to mórske prawo žada.“ Kapitanku Rackete běchu minjenu sobotu zajeli, dokelž bě ze 40 wuchowanymi migrantami bjez dowolnosće na kupje Lampedusa přistawiła.
Zakonske naćiski rozjimali
Druhi dźeń poslednjeho plenuma Sakskeho krajneho sejma
Drježdźany (dpa/SN). Z wuradźowanjom wo wjacorych zakonjach je Sakski krajny sejm dźensa ze swojim předposlednim plenarnym posedźenjom do wólbow pokročował. Na blidźe mějachu zapósłancy cyłkownje 14 naćiskow, mjez nimi tři z rjadow koalicije CDU a SPD. Wuradźowali su mjez druhim w změnach nadróžneho zakonja, wo informaciskej wěstoće a wo płaćenju zastojnikow. Na zakładźe wjacorych próstwow wočakowachu w běhu dnja tež wobšěrnu diskusiju wo poćahach swobodneho stata k Ruskej a wo sankcijach EU přećiwo Moskwje.
94. posedźenje Sakskeho krajneho sejma bě so wčera z knježerstwowej deklaraciju ministerskeho prezidenta Michaela Kretschmera (CDU) zahajiło. Premier bě sej połdra lěta po nastupje zastojnstwa wěsty, zo je Sakska na pra- wym puću, a pohonjowaše wobydlerjow k zmužitosći do přichoda. „Smy wuhibki w swobodnym staće znowa nastajili“, rjekny wón w plenumje w Drježdźanach. „Štož smy přilubili, smy dodźerželi“, wón zwurazni.
Ćežke njezboža z e-rolerami
Berlin (dpa/SN). Runje dwaj tydźenjej su elektrorolery na dróhach Němskeje dowolene, a hižo kopja so wobchadne njezboža z nimi. Jeničce minjeny kónc tydźenja dyrbjachu w Berlinskej njezbožowej chorowni w měšćanskim dźělu Marzahnje štyrjoch znjezboženych stacionarnje přiwzać. Dalšeju lochko zranjeneju jězdźerjow e-rolerow móžachu po ambulantnym lěkowanju zaso domoj pósłać.
Ćežkozranjeni běchu sej po informacijach chorownje wjacore kosće, rjapowki abo ruku złamali. Jedyn pacient měješe krawjacu ranu na hłowje a bě sej mozy střasł. Wotběh njezbožow bě cyle wšelaki: Tak bě žonu we hłownym wobchadźe na Berlinskej dróze nakładne awto sobu wlekło. Jedyn muž bě pjany z e-rolerom padnył, kaž chorownja zdźěla.
Policija bě hižo tydźenja wo prěnich njezbožach z elektrorolerami rozprawjała. Tak běštej sej žonje kosće złamałoj. Jězdźidła su hač do 20 km/h spěšne. Jězbna dowolnosć njeje trěbna, tež někajke pruwowanske wopismo abo nahłownik nic. Jězdźić smědźa tele rolery na kolesowanskej šćežce a hewak na dróze.
To a tamne (03.07.19)
Pokradnjeny wóslik dźěćaceho karusela w bayerskim Günzburgu je zaso namakany. Postawa bě so na kónctydźenskim měšćanskim swjedźenju z karusela zhubiła. Nětko su ju w 20 kilometrow zdalenej wsy na zahrodźe wuhladali. Wobsedźer ležownosće twjerdźi, zo je wóslika na dróze namakał a sej myslił, zo chce jeho něchtó wotbyć. Wobsedźer ležownosće dyrbi nětko ze skóržbu ličić, dokelž bě sej namakanku přiswojił.
Dotal njeznatu družinu pawka su slědźerjo Uniwersity Hamburg w Awstralskej wotkryli a po twórcu mody Karlu Lagerfeldźe (1933–2019) pomjenowali. Pawk dopomina na stil Lagerfelda: Čorne nóžki asociěruja slědźerjo z rukajcami, kotrež Lagerfeld stajnje nošeše; hoberskej woči pawka wupadaja kaž čorne nawoči njeboh wuměłca.
Přepytuja njezbožo
Aerzen (dpa/SN). Po znjezboženju helikoptera Zwjazkoweje wobory je zarjad za wěstotu lětarstwa přepytowanja zahajił. Mašina z dwěmaj pilotomaj bě wčera zapadnje Hamelna znjezbožiła. Pilotka při tym zemrě, dalši pilot so zrani. Přičiny njezboža njejsu dotal znate, kaž zakitowanska ministerka Ursula von der Leyen (CDU) njedaloko městna njezboža rjekny. Přichodne dny chcedźa podawk nadrobnje přepytować.
Wočakuja rozsud kapitanki dla
Rom (dpa/SN). W padźe kapitanki pomocneje łódźe Sea-Watch 3 Carole Rackete wočakowachu dźensa rozsud sudnistwa. Po wčerawšim tři hodźiny trajacym sudniskim jednanju njebě jasne, hač 31lětnu žonu pušća abo hač jeje zajeće wukazaja. Minjenu nóc bě wona w domjacym aresće. Rackete bě minjeny tydźeń z łódźu a 40 migrantami bjez dowolnosće do italskeho mórskeho teritorija přijěła a minjenu njedźelu tohorunja bjez dowolnosće přistaw italskeje kupy Lampedusa wužiwała.
Unija so snadnje polěpšiła
W boju přećiwo wulkemu lěsnemu wohenjej na bywšim wojerskim ...
Sakska změje wjace policistow
Posledni tydźeń schadźowanjow
Naslědnik Junckera dale njejasny
Brüssel (dpa/SN). Zwjazkowa kanclerka Angela Merkel (CDU) chcyše dźensa zhromadnje ze swojimi europskimi kolegami spytać, zwadu wo wodźacy personal Europskeje unije rozrisać. Najebać marathonowe wuradźowanje njejsu so dotal dojednać móhli. Mjez druhim dźe wo naslědnistwo prezidenta komisija EU Jeana-Claudea Junckera. Prezident rady EU Donald Tusk je wuradźowanja na dźensa přestorčił. Wobdźělnicy steja pod časowym ćišćom: Jutře chce so nowy parlament prěni króć schadźować.
Nachwilnje wupadaše wčera za přibliženjom: Po tym móhł Nižozemjan Frans Timmermans Junckera naslědować, načolny kandidat Europskeje ludoweje strony Manfred Weber móhł so z nowym prezidentom parlamenta EU stać. Tomu pak so mnozy spjećowachu. Předewšěm wuchodoeuropske staty Visegrádskeje štyrki su přećiwo Timmermansej. Čěski premier Andrej Babiš rjekny: „Timmermans je wunamakar migraciskich kwotow a je našej kónčinje napřećo negatiwnje nastajeny.“
Podpěraja rozšěrjenje insektow
Sakski minister Thomas Schmidt nowy jednanski koncept předstajił
Lipsk (SN/BŠe). Sakski minister za ratarstwo, wobswět a geologiju Thomas Schmidt (CDU) je minjeny štwórtk jednanski koncept za wšelakorosć insektow w swobodnym staće předstajił. Dźewjeć wobłukow wopřijacy koncept wopisuje nowe naprawy, z kotrymiž ma so mnohotnosć překasancow spěchować. Naćisk ministerstwa za wobswět a ratarstwo budźe nětko we wobšěrnym konsultaciskim procesu k programej dalewuwity. „Škit překasancow je dawno fachowe ćežišćo. Dokelž je jich dale a mjenje, je to alarmowacy signal a wuskutkuje so na cyłkowny ekosystem“, Thomas Schmidt zwurazni.
Wšitcy akterojo towaršnosće su namołwjeni. W městach a we wjesnych kónčinach maja na přikład insektam nješkodźace swěcy instalowane a zahrodki kaž tež łuki z wjele kćějacymi rostlinami wuhotowane być. Zdobom měło mortwe drjewo zdźěla w lěsach wostać, žiwe płoty podłu polow spřihotowane a přibrjohi rěkow zwosadźane być. Z najwšelakorišimi naprawami hodźi so tak překasancam přihódny žiwjenski rum wutworić.
