To a tamne (09.07.20)
W běhu widejoweje konferency dušował je měšćanski radźićel w Španiskej, zabył je pak kameru hasnyć. Dokelž bě jemu konferenca z kolegami, žurnalistami a wobydlerjemi po wjace hač štyrjoch hodźinach wostudła, rozsudźi so Bernardo Bustillo w sewjerošpaniskim měsće Torrelavega za multitasking: dušować a druhim dale připosłuchać. Za to móžachu wšitcy přihladować, kak wón nahi pod dušu steji. Bustillo je mjeztym poskićił wotstupić, štož pak su wotpokazali.
Zhubjeny wupokaz bě paduchej w durinskim Sömmerda ze zahubu. 22lětny je we wobchodźe twory za 450 eurow zapakował a ćeknył, ale zhubi swój wupokaz. Jako so na to do wobchoda wróći, běžeše wón mjeztym přiwołanym policistam direktnje do rukow. Rubiznu namakachu zastojnicy w kerku.
Nowy rekord padow korony
Washington (dpa/SN). Z něhdźe 60 000 koronainfekcijemi w běhu 24 hodźin su w USA nowy rekordny staw docpěli. To wuchadźa z ličbow Johnsa Hopkinsoweje uniwersity, kotrež su dźensa rano wozjewili. Dotal najwjetšu ličbu z 54 000 nowymi padami běchu minjeny štwórtk registrowali. Cyłkownje su so w USA dotal nimale tři miliony ludźi z koronawirusom natyknyli, 131 000 ludźi je mjeztym na njón zemrěło.
Namjetuje słužbne lěto
Podstupim (dpa/SN). Předsyda braniborskeje krajneje CDU Michael Stübgen je namjetował zawjesć zawjazowacu słužbu za žony a muži nad 18 lětami. Tak zasadźa so wón za winowatostne lěto w strowotnistwje abo w katastrofowym škiće. „Dyrbimy rozmyslować, kak škit wobydlerjow tež přichodnje zaručimy“, praji Stübgen nowinarjam. Dobrowólne zasadźenje ludźi wjace njedosaha. Zakitowanska ministerka Annegret Kramp-Karrenbauer (CDU) bě w debaće wo znowazawjedźenju woborneje winowatosće tajke słužbne lěto namjetowała.
Zesylnja namjezne kontrole
Žónska kwotaw CDU schwalena
Berlin (dpa/SN). Nawodnistwo CDU chce hač do lěta 2025 zawjazowacu žónsku kwotu 50 procentow přesadźić. Na to stej so komisiji za strukturu a za wustawki po informacijach powěsćernje dpa dźensa rano po jědnaće hodźin trajacych jednanjach dojednali. Nawjedował bě je generalny sekretar CDU Paul Ziemiak. Hospodarska přirada strony kritizowaše planowanu kwotu jako njetrěbnu. Diskusiju wo jasnym statusu homoseksualnych w CDU/CSU su na dźensniše wuradźowanje přestorčili.
Kompromis nastupajo žónski podźěl w stronskich zastojnstwach a pola mandatow předwidźi, zo chcedźa podźěl žonow při wólbach předsydstwow na wokrjesnej runinje krok po kroku powjetšić. Tam ma wot 1. januara 2021 žónska kwota 30 procentow płaćić, wot 1. januara 2023 hižo 40 procentow a wot spočatka lěta 2025 potom 50 procentow.
Merkel w Belgiskej
Połoženje zaso měrne
Warnuje před poł- nymi stadionami
Drježdźany (dpa/SN). Strowotniski fachowc SPD Karl Lauterbach je koronapandemije dla před tym warnował, fanow přezahe zaso do koparskich stadionow pušćić. „Koparske hry zwjazkoweje ligi z přihladowarjemi mam za njezamołwite“, rjekny Lauterbach nowinarjam. „Tež pola druhich wulkozarjadowanjow bjez wobmjezowanja ličby wopytowarjow koncepty hygieny njepomhaja wěstotu před koronawirusom zaručić. Kontakty njehodźa so hladajo na syły ludźi hižo sćěhować. Tajke zarjadowanja móhli „perfektny přihot druheje žołmy infekcijow być“.
Do toho běchu w Sakskej wo tym rozmyslowali, wot 1. septembra přihladowarjow znowa do koparskich stadionow a sportowych halow pušćić. Tak bychu zarjadowanja z wjace hač tysac wobdźělnikami zaso móžne byli, wězo jeno z dodźerženjom prawidłow hygieny a ze sćěhowanjom kontaktow, kaž strowotniska ministerka Petra Köpping (SPD) wčera w Drježdźanach zdźěli. Połne stadiony přiwšěm móžne njebudu. Knježerstwo chcyło mustwam pomhać, kotrež nuznje dochody trjebaja.
Ministerka za Łužicu so zajimowała
Weterinarojo wobskorženi
Podstupim (dpa/SN). Organizacija za škit zwěriny „Vier Pfoten“ je wjacore weterinarne zarjady w Braniborskej podhlada čwělowanja skotu dla wobskoržiła. Statne rěčnistwo w Podstupimje je wobkrućiło, zo su skóržby dóšli. Te nětko pruwuja, rěčnica statneho rěčnistwa zdźěli. To pak móhło wjacore tydźenje trać.
Po informacijach rozhłosa RBB su cyłkownje wosom weterinarnych zarjadow w Braniborskej, Delnjej Sakskej, Sewjerorynsko-Westfalskej a Sakskej wobskoržili. Zarjady běchu transporty žiweho skotu mjez druhim do Georgiskeje, Kazachstana, Irana, Algeriskeje, Marokka a Libanona dowolili. „Hižo wjele lět na to skedźbnjamy, zo njeje na mjenowanych čarach dosć zastaranskich stacijow“, fachowča organizacije Ina Müller-Arnke kritizuje.
To a tamne (08.07.20)
Smjertne wutřěle z policajskeje pistole na howjado zaběraja nětko Nürnbergske krajne sudnistwo. Loni w meji bě młoda kruwa po puću do rězarnje ćeknyła. Mandźelska wobsedźerja wołaše na to policiju. Jedyn ze zastojnikow wućahny mašinsku pistolu a skoćo zatřěli. Na to je sej wobsedźer 3 000 eurow wot Bayerskeje žadał, argumentujo, zo bě policist přespěšnje reagował. Dwě mjeńšinje pozdźišo dźě běchu skótny lěkar, rěznik a hajnik na městnje, kotřiž móhli kruwu družinje wotpowědnje morić.
Dwanaćelětnu su ze zamknjeneho kašćika Ingelheimskeho dwórnišća wuswobodźić dyrbjeli. Holca bě tam sobotu wječor sama nutř zalězła. Přećel na to do duri storči, pječa mylnje, kaž twjerdźeše. Durje so zamknychu a njehodźachu so wjace wočinić. Wohnjowi wobornicy holcu njezranjenu wuswobodźichu.
Wulkoměsto zaso zawrjene
Melbourne (dpa/SN). Druhe najwjetše město Awstralskeje Melbourne dyrbja drastisce přiběraceje ličby koronainfekcijow dla znowa šěsć tydźenjow zawrěć. Po tym zo běchu w pjeć milionow wobydlerjow wopřijacej stolicy zwjazkoweho stata Victoria hospodarstwo zaso wožiwili, płaća wot jutřišeho zaso razne wobmjezowanja wšědneho žiwjenja. Tak njesmědźa ludźo domy abo město hižo wopušćić. Wójsko je mobilizowane, zo by policiju při kontrolach podpěrało.
Chce nowy zakoń přesadźić
Hongkong (dpa/SN). Ministerska prezidentka Hongkonga Carrie Lam je „rigorozne“ přesadźenje chinskeho „wěstotneho zakonja“ w Hongkongu připowědźiła a w padźe ranjenja před „jara chutnymi konsekwencami“ warnowała. Na zakładźe zakonja su tam hižo wjacore wosoby zajeli a „terorizma“ dla wobskoržili. Zakoń Pekingskemu knježerstwu zmóžnja přećiwo aktiwitam w Hongkongu postupować, kotrež ma za subwersiwne, separatistiske abo teroristiske.
Korčmy wospjet zawrjene
