Maas do Pólskeje so podał
Berlin (dpa/SN). Bjezposrědnje po wotewrjenju měsacy dołho zawrjeneje mjezy k Pólskej je so němski wonkowny minister Heiko Maas (SPD) dźensa do susodneho kraja podał. Tam wočakowaše jeho wonkowny minister Jacek Czaputowicz. Rozmołwjeć chcyštaj so wo boju přećiwo koronawirusej kaž tež wo europskopolitiskich temach hladajo na to, zo přewozmje Němska 1. julija předsydstwo Rady EU, zastupnistwa čłonskich statow Europskeje unije. Bjezdwěla bě tež wěstotna politiska tema wažny dypk rozmołwow, tak plany prezidenta USA Donalda Trumpa, kontingent 34 500 ameriskich wojakow w Němskej wo 9 500 pomjeńšić. Pólska drje so nadźija, zo USA ličbu swojich wojakow wot tuchwilu 5 000 w kraju dale powjetši, štož pak njesměło na kóšty jednotkow w Němskej być.
Jězba do Pólskeje je mjeztym pjata wukrajna jězba Maasa po dźesać tydźenjow trajacej přestawce koronawirusa dla. Wón bě hižo w Luxemburgu, Nižozemskej, Israelu a Jordaniskej. Pólska bě swoje mjezy 15. měrca za wukrajnikow zawrěła.
„Mamy dosć dopóznaćow“
Sakska SPD sej žada AfD přez krajny wustawoškit wobkedźbować
Drježdźany/Podstupim (dpa/SN). SPD w Sakskej žada sej tež w swobodnym staće, zo wustawoškit AfD jeje prawicarskoekstremnych tendencow dla wobkedźbuje. Wustawowy škit stronu AfD z połnym prawom w Braniborskej a Durinskej wobkedźbuje, rjekny generalny sekretar sakskeje SPD Henning Homann wčera w Drježdźanach. „Wočakuju wot sakskeho wustawoškita, zo nětko prawicarskoekstremistiske wuwiće w AfD tež w Sakskej wobkedźbuje.“
Nawodnistwo sakskeje AfD z krajnym předsydu Jörgom Urbanom a generalnym sekretarom Janom Zwergom je minjenu sobotu w Sebnitzu zhromadnje z bywšim braniborskim krajnym předsydu Andreasom Kalbitzom wustupowało. Zjawne wuznaće solidarity „z wočiwidnym fašistom Andreasom Kalbitzom“, pokazuje, kajki duch nawodnistwo AfD w swobodnym staće pěstuje. „AfD njeje w Sakskej žana konserwatiwna strona, jako kajkaž so w zjawnosći rady wudawa, ale zeskupjenje prawicarskich ekstremistow abo tež karjeristow, kotřiž za politisku móc tež z fašistami paktěruja“, Henning Homann kritizuje.
To a tamne (16.06.20)
Pjenjez w płucach pacienta namakali su lěkarjo we westfalskim Hammje. Muž bě centowy pjenježk w januaru při darće mylnje spóžěrał. Fachowcy za płuca su jemu cuzy předmjet wuspěšnje wuoperowali, po tym zo bě so z kašelom a zahorjenymi płucami lěkarjej předstajił. Muž bě sej při hrě ze centom w hubje hrajkał, jako jemu towarš na ramjo klepny a wón pjenjez na to do so srěbny.
Z gumijowym čołmom Ryn přeprěčił je muž w Bonnje. Pěšk bě wohnjowu woboru informował, zo jědźe po rěce čołm w formje flaminga. W nim leži muska wosoba, kotraž na wołanje njereaguje. Centrala pósła 45 wobornikow a helikopter. „Po intensiwnym pytanju“ su muža skónčnje na tamnym brjohu Ryna čiłeho našli. Wobornicy wšak dyrbjachu jeho powučić, zo je rěku z tajkim „jězdźidłom“ přeprěčić přewšo strašne.
Wobrónjenje přiběrało
Rom (B/SN). Wudawki za wobrónjenje su loni po cyłym swěće tak jara rozrostli kaž minjene dźesać lět nic. Tak inwestowachu USA jeničce loni cyłkownje 732 miliardow dolarow do swojeho wojerstwa, zdźěli slědźerski institut za měr Sipri w Stockholmje. Nimo Ameriki mějachu najwjetši wojerski etat China, Indiska, Ruska a Sawdi-Arabska, štož wučinješe 62 procentow wšěch swětowych wojerskich wudawkow. Němska ležeše loni za Francoskej na 7. městnje a suny so tak porno lětu 2018 wo dwě městnje doprědka. Wot časa globalneje financneje krizy 2008 je so trend wobrónjenja strašnje pospěšił, informowachu měrowi slědźerjo w powěsćach Vatikana.
Kak dale po synodalnym puću?
Turizm poněčim wotuća
Berlin (dpa/SN). Po zběhnjenju warnowanjow před pućowanjemi do druhich europskich krajow je dźensa rano zaso wjace ludźi na Tegelske a Schönefeldske lětanišćo w Berlinje přišło. Na kóždym z lětanišćow pak bě jenož jedyn terminal za wotlěty a přizemjenja k dispoziciji. Cyłkownje planowachu 80 wotlětow a přizemjenjow w Berlinje, hewak je jich wšědnje něhdźe tysac.
Brexit nětko wěc šefow
Brüssel (dpa/SN). Wjerškowe zetkanje Europskeje unije z Wulkej Britaniskej měješe dźensa nowy rozmach do dlijacych so rozmołwow wo wikowanskim zrěčenju po brexiće přinjesć. Na widejowej konferency z premierministrom Borisom Johnsonom wobdźělichu so za EU prezidentka komisije Ursula von der Leyen, prezident Rady EU Charles Michel a prezident parlamenta EU David Sassoli. Fachowcy njeběchu wot měrca najebać intensiwne jednanja ničo docpěli.
Policajskej kulce wina byłoj
Hnujacy to wokomik w nocy na sobotu na němsko-pólskej mjezy w ...
Altmaier: Dolinu krizy wopušćić
Wočakuja impuls
Berlin (dpa/SN). Němski zwjazk Industrijnych a wikowanskich komorow (DIHK) wočakuje po wotewrjenju nutřkoeuropskich mjezow Europskeje unije pozitiwny efekt na globalne hospodarstwo. „Wot wotewrjenych mjezow móhli po wšej Europje impulsy wuchadźeć, zo by so mjezynarodne wikowanje wožiwiło a derjeměće kaž tež dźěłowe městna zaručene byli“, rjekny prezident DIHK Eric Schweitzer nowinarjam. Wosebje wažne jemu je, zo su němske wudźěłki a posłužby po wšěm swěće zaso prašane. „Dźensa wotewrjene mjezy móhli na němske hospodarstwa kaž dalši konjunkturny program skutkować, kotryž stat ničo njepłaći“, měni prezident DIHK.
Starosće Schweitzerej wobradźa, zo dale před jězbami do 160 krajow warnuja, mjez druhim do USA, Chiny a Ruskeje, wažnym hospodarskim wikam Němskeje.
Woidke: Z pólskim susodom rěčeć
Podstupim (dpa/SN). Braniborski ministerski prezident Dietmar Woidke (SPD) ma po nimale tři měsacy trajacym zawrjenju mjezy k Pólskej wuše wothłosowanje ze susodom za trěbne. Społnomócnjeny němskeho zwjazkoweho knježerstwa za styki k Pólskej rjekny rozhłosownikam hladajo na dołhe rynki čakacych nakładnych awtow po zawrjenju mjezy: „Tajkim problemam bychmy zadźěwać móhli, bychmy-li do toho ze sobu rěčeli. To njeje so w turbulentnych časach na spočatku koronakrizy bohužel stało.“ Najebać to je jemu sobotne wotewrjenje mjezy „wulke wjeselo“.
Narodnokonserwatiwne Waršawske knježerstwo bě srjedź měrca swoje mjezy k tamnym krajam Europskeje unije zawrěło, zo by dalšemu rozpřestrěću koronawirusa zadźěwało. To je powołanskich dojězdźowarjow, kotřiž běchu mjezu wšědnje přeprěčili, wosebje trjechiło.
Braniborski ministerski prezident rjekny, zo je tydźensce z koordinatorom na pólskim boku Bartoszom Grodeckim telefonował, a styki su mjeztym „jara dobre“.
