Budyšin (UM/SN). Njewšědny křiž wuhladaja wopytowarjo nětko w Budyskej tachantskej cyrkwi. Wón wobsteji z pleksiškleńcy a je swojeje refleksije swětła dla jenož jako kontura před pozadkom wjelbowaneho wjercha spóznajomny. Fotografuješ-li transparentnu twórbu, błyšći so wona w najwšelakorišich barbach. „Křiže su w předstawje čłowjeka zapadneje Europy pochmurne a wohrožace. Wšako zwobraznjeja wone smjerć Jězusa Chrystusa“, wě Ludger Hinse. Wuměłc ze sewjerorynsko-westfalskeho Recklinghausena so hižo wjele lět z najwažnišim symbolom křesćanstwa zaběra a spyta jemu tež dalše woznamy spožčić. „Stawizny Jězusa dźě njekónča so z jeho smjerću na křižu. Po tym tola hišće něšto bě ...“
Jónu wob lěto prezentuja Kamjenske měšćanske zběrki pod hesłom „Wu- a předstajene“ swoje nowe zdobyte pokłady – předewšěm we wobłuku Lessingowych dnjow abo kóždolětnje we wotměnje wotměwacych so Lessingowych akcentow. Minjeny štwórtk, 28. februara, bě zaso raz tak daloko.
Frankfurt nad Wódru (SN/at). Lětuši Hudźbny festiwal nad Wódru je so ze swjedźenskim aktom minjeny pjatk w Frankfurće nad Wódru zahajił. Program wopřijima hač do 22. měrca wjace hač 20 koncertow a dalše zarjadowanja w dźewjeć němskich a pjeć pólskich městach.
Prěni hudźbny wjeršk bě sinfoniski koncert minjenu sobotu w Zielonej Górje, partnerskim měsće Choćebuza. Zaklinčeli su tam twórby Edvarda Elgara, Pjotra Iljiča Čajkowskeho, Czesława Grabowskeho a Ludwiga van Beethovena. Koncert wuhotowachu Zielonogórska filharmonija, chór Šleskeje filharmonije a chór Szczecinskeje akademije wuměłstwa. Njedźelny zahajenski koncert w Frankfurtskej koncertowni „C. P. E. Bach“ steješe cyle w znamjenju pasiona po Mateju, předstajeny wot wulkeho chóra Spěwneje akademije a Braniborskeho statneho orchestra Frankfurt.
Europska uniwersita Viadrina je pólske wučbnicy wo starym němskim pismje wozjewiła.
Frankfurt nad Wódru/Słubice. Z wonym dwójnym wudaćom dóstawaja mnozy pólscy wužiwarjo archiwow pomocny kluč k zašłosći do rukow: Pod titlom „Dawne pismo niemieckie“ („Staroněmske pismo“) je na Europskej uniwersiće Viadrina Frankfurt nad Wódru pólska wučbnica wo hač dosrjedź 20. lětstotka rozšěrjenym němskim kurrentowym rukopisu wušła. Wudospołnjena je kniha z ekstra za to wuwitym zwučowanskim zešiwkom „Kurrenta“ za pisanje a čitanje pisma. Wobě wozjewjeni nastaštej na katedrje za pomnikowědu Viadriny w zhromadnym dźěle z Institutom za nałožowane stawizny. Podpěru dóstachu tež ze stron pólskeho statneho archiwa w Poznanju. Spěchowany bu projekt ze srědkami społnomócnjeneje zwjazkoweho knježerstwa za kulturu a medije kaž tež Regenburgskeje załožby Sanddorf.
Wuhotować jendźelske zahrody a parki je w hrabi Hermannje von Pückleru hłuboki zaćišć zawostajiło. To podšmórnyštaj diplomowaj historikarjej Christian Friedrich a Volkmar Herold z Choćebuza minjeny tydźeń na přednošku wo Pückleru w Delnjowujězdźanskej radnicy. Přeprosyło bě na njón Spěchowanske towarstwo Adelspädagogium-Dannenberghaus Uhyst, a wjac hač dwaceći zajimcow je přišło.
Serbski institut poskići zhromadnje z wjacorymi partnerami wědomostnemu dorostej znowa forumaj za nawjazanje stykow, wuměnu a diskusiju. Ćežišći stej sociologija a sorabistika.
Fulda/Budyšin (SN/bn). Sekcija krajina, agrarna a zežiwjenska sociologija Němskeje towaršnosće za sociologiju (DGS) a Serbski institut (SI) wuhotujetej w meji druhi raz dźěłarničku za młodych wědomostnikow. Třidnjowske zarjadowanje ma tomu słužić, „doktorandkam a doktorandam kaž tež młodym wědomostnikam, přihotowacym fachowu publikaciju, w přihódnej wokolinje a konstruktiwnej atmosferje ćežišćowe dźěło, nawjazanje stykow a wuměnu idejow zmóžnić“, kaž we wopisanju projekta rěka. Nimo „intensiwnych wědomostnych diskusijow“ wopřijima dźěłarnička tež „zhromadne aktiwity w regionje“. Po swójskim zajimje móža sej wobdźělnicy indiwidualny program zestajeć.