Budyšin (SN/bn). Maćica Serbska a Towarstwo za staru serbsku ludowu kul­turu stej na zhromadnje zarjadowanym informaciskim wječoru dokumentaciju wo awtentiskich serbskich rejach předstajiłoj. Wčera w Budyskim Serbskim domje prezentowany, tuchwilu hišće nje­titulowany film je wuslědk wjelelětneho slědźenskeho kaž tež kreatiwneho dźěła předsydy Maćičneje sekcije hudźba Měrka Šołty, bywšeho rejwarja a choreogra­fa Serbskeho ludoweho ansambla Jana Domaški a filmowca Rajnera Nagela. Dohromady dźewjeć zajimcow tworješe facho­wy publikum.

Budyšin (SN/MiR). Jan Lorenc dawa symbolam starych Słowjanow rum na koš­lach, kotrež je za muži wuwił. Z projektom „mój serbski puć“ doby wón 3. myto wubědźowanja SORBIAN STREET STYLE. Łužiska krajina zdawa so na kolekciji Christiany Dögel a Alexandera Gaertnera špihelować. 2. městno je myto za jeju prezentaciju „KATJA“. Lea Kelm přeswědči z nowymi aspektami při wužiwanju hižo trjebanych materialijow, kotrež je do wulkeje palety drasty zapletła. Projekt „choćebuska“, z kotrymž je wubědźo­wa­nje dobyła, dopomina wona na něhdyšu šwalču delnjoserbskeje metropole. Wčera dopołdnja su młodźi designerojo wo myće zhonili. „Šiju tuchwilu wšědnje hač do 18 hodźin na swojich naćiskach. Wša­ko­ su wone tema mojeho bachelorskeho dźěła“, praji Jan Lorenc, student na Wysokej šuli za wuměłstwo Burg Giebichenstein w Halle. „Nas je projekt wot wšeho spočatka zahorił“, rjekny wotrjadnik za komunikaciju z předewzaćemi z Ludoweje banki Drježdźany-Budyšin Andreas Wanitzek.

Wochozy (AP/SN). Park błudźenkow we Wo­chozach bě cil lětušeho zeńdźenja dźěłoweho kruha Łužiske muzeje a muzealne zarjadnišća sekcije ludowěda/muzejownistwo Maćicy Serbskeje.

Nowa wustajeńca we wopytowarskim centrumje wo serbskich stawiznach Wochožanskeje kónčiny njebě jenička přičina póndźelneho zetkanja. Muzejownicy běchu tež wćipni na nowy projekt to­warstwa Serbski kulturny turizm. Wone wuwiwa mjenujcy kartu „Ducy po serbskej Łužicy“, z kotrejž chce „tež za serbske muzeje, rjemjesło a tradicije wabić“, Ines Kunzendorf rozłoži a připowědźi, zo ma karta hišće lětsa wuńć. Přitomni skedźbnichu na wažnosć runohódneho nało­žowanja serbšćiny – tež hladajo na słowjanskich susodow, kiž so přiběrajcy za łu­žisku jězorinu zajimuja –, a zdobom na šansy, kiž z ideje zhromadneho wa­bjenja wurostuja.

Drježdźany (mla/SN). 17. króć swjećachu w sakskej stolicy a přisłušnych měšćanskich dźělach minjeny pjatk Dołhu nóc wědomosćow. Wjace hač 650 zarjadowanjow na 17 wědomostnych stacijach je sej tež tójšto Serbow z města a zajimcow z Hornjeje Łužicy wobhladało. Wšako chcychu so wo aktualnych slědźenskich wuslědkach, projektach a kubłanskich poskitkach popularnych wědomosćow Drježdźanskeje Science Community wobhonić.

Wšelake fakulty Techniskeje uniwersity Drježdźany předstajichu na přikład najnowše inowatiwne twarske maćizny, alternatiwne móžnosće zmilinjenja a chemijowu fabriku přichoda. Wosebje dźěćom so při najwšelakorišich pospytach w laborje woči błyšćachu a jich starši so njemało dźiwachu, kak móža sej ze sadu a zeleniny sami bateriju twarić. Fachowcy­ Fraunhoferskeho instituta rozłožichu eksperiment, zo móžeš tež z wopłóčkow milinu wudobywać.