Mały, ale rjany! Tale zasada wjedźe prawdźepodobnje mnohich wopytowarjow folklorneho festiwala stajnje zaso na Koklic dwór. Hewak drje njeby tam tež lětsa zaso telko ludźi było. Za to móžachu woni kulturnje dobru měšeńcu wšelakich skupin dožiwić. Tak wustupowachu tam nimo­ Smjerdźečanskich rejwarjow wuměłcy­ skupiny Couleurs d‘Algerie­ a ruskeje Zabawa. Algeriski cyłk z dohromady 19 spěwarjemi, rejwarjemi a instrumentalistami słuša k najlěpšim skupinam kraja na sewjeru Afriki a bě prěni króć we Łužicy. Wužiwajo starodawny material za hudźbne nastroje postarachu so woni wo awtentiske zwuki.

Podobnu awtentiskosć skićeše tež ruski folkorny ansambl Zabawa. Lěta 1987 załožene kulturne ćěleso pěstuje stare ruske a kozakske spěwy. Kulinarisce poskićachu Koklicy mjez druhim kozacu a trutowu pječeń. Marko Wjeńka

Wćipni, kak loni zahajeny nowy cyklus wokoło młodeho Krabata a Čorneho młynka dale dźe, běchu wčera na premjeru zaso sta lubowarjow Krabatowych swjedźenskich hrow přichwatali.

Čorny Chołmc (JK/SN). Zaso je so mustwu wokoło Siebeckec mandźelskeju a Čornochołmčanskeho Krabatoweho towarstwa poradźiła inscenacija, kotraž so tematisce kaž tež wobsahowje derje do hižo znatych powěsćow wokoło serbskeho kuzłarja hodźi.

W režiji Alexandera Siebeckeho a Michaela Kuhna je cyłk, wobstejacy z po­wołanskich a lajskich dźiwadźelnikow, wosmy raz předstajił spodobnu stawiznu ze žiwjenja Krabata. W lětušim kruchu „Elementy mocy“, w kotrymž je młody Krabat nućeny so zaso kuzłanju přiwobroćić, spěwaja, rejuja, ale kaž přeco tež žortuja. Spodobny a napadny tónraz je widźomny a słyšomny serbski podźěl na inscenaciji. Nimo narodneje drasty wjele serbuja, z wulkeho dźěla su spěwne teksty serbske runje tak kaž sceny camprowanja a swjećenja w Čornochołmčanskej korčmje. To je tribut, kotryž orga­nizatorojo a iniciatorojo hry serbskemu žru inscenacije wopokazuja.

Hdyž sy čłon kulturneho ćělesa kaž ja Serbskeje rejwanskeje skupiny Smjerdźaca, potom njeje njewšědne jězdźić na festiwale po cyłym swěće. Ćim rjeńšo pak je, hdyž swoju domiznu ani wopušćić njetrjebaš, zo by tajki wjeršk sobu dožiwił. Kóžde druhe lěto wotměwa so Mjezynarodny folklorny festiwal „Łužica“ tu pola nas. Sy-li zapřijaty do jeho přihotow a wuhotowanja, dožiwješ tele štyri dny tak intensiwnje kaž lědma štó druhi. Hižo na wčerawšim swjedźenskim ćahu po Budyšinje a na programje w dźiwadle móžach prěnje styki k wuměłcam z cyłeho swěta nawjazać. Rozmołwjach so z nimi wo našej domiznje, našej kulturje, našich nałožkach a wo wšěm, štož nam runje do myslow přińdźe. Zhromadnje nětko rejujemy, spěwamy, hudźimy a swjećimy. Na prěni napohlad smy wšitcy rozdźělni, štož tež šarm festiwala wučinja. Nas wšěch pak zwjazuje to jedne: lubosć k domiznje a žiwej folklorje. Pětr Dźisławk

Krabatowy młyn chce zaso filmy pod hołym njebjom pokazować

Čorny Chołmc (AK/SN). Po 17 wječorach přewjedu přichodny měsac w Čornochołmčanskim Krabatowym młynje kino pod hołym njebjom. Stajnje wot štwórtka hač do njedźele pokazaja wot 1. awgusta hač do 1. septembra před kulisu Čorneho młyna najwšelakoriše filmy. Po Krabatowych swjedźenskich hrach a tydźenju přestawki budźe to lětuši druhi wulki wjeršk, rjekny wčera jednaćel Krabatoweho młyna Tobias Čižik.

Z filmom „Krabat“ wotměchu lěta 2008 prěni raz kino pod hołym njebjom w Krabatowym młynje, a činjachu to hač do lěta 2015. Tehdyši nawoda Wojerowskeho kina Gerd Sprecher bě techniku a filmy přewostajił. Po štyrjoch lětach přestawki zwaža so nětko na nowy započatk, a to hromadźe z organizatorami Drježdźanskich filmowych nocow. Jich jednaćel Matthias Pfitzner nadźija so hač do 400 wopytowarjow na wječor. Po jeho słowach nałoža za filmowe wječory w Čornym Chołmcu dohromady 35 000 eurow, z toho 12 000 eurow za techniku. Na wšě 4 000 eurow wudadźa za wabjenje. Před 50 kwadratnych metrow wulkej płachtu změje ně­hdźe 500 ludźi městno.