Lipsk (SN/bn). Znowa su zarjadowarjo Lipšćanskich knižnych wikow rekordnu ličbu wopytowarjow zličili. Inkluziwnje wiki wobrubjaceho rjadu „Lipsk čita“ je so cyłkownje něhdźe 286 000 ludźi – to je 15 000 wjace hač loni – na wjace hač 3 500 zarjadowanjach, kaž na přikład awtor­skich čitanjach, podijowych diskusijach a awtogramowych hodźinach – wobdźěliło resp. wo poskitkach a nowostkach najwšelakorišich nakładnistwow wobhoniło. „Jara zwjeselacy“ bě po słowach direktora Lipšćanskich knižnych wikow „zajim na literaturje lětušeho hóstneho kraja Čěskeje“. Tež minister za kulturu Čěskeje republiki Antonín Staněk­ hódnoći prezentaciju swojeho kraja jako „njewšědnje wuspěšnu. Nam je so poradźiło, publikumej na wšě 70 no­wych přełožkow do němčiny před­sta­jić. Sym dobreje nadźije, zo polěpši to wuhlady za naše awtorki a našich awtorow na mjezynarodnej runinje“, rěka w zdźělence zarjadowarjow wikow.

W póstnym času poskićeja tež w katolskich Serbach wjacore zarjadowanja za nutřkowne rozpominanje. Tak zaklinčachu wčera popołdnju w Pančičanko-Kukowskej klóšterskej cyrkwi hudźbne modlitwy a meditacije k póstnemu časej. Zanjesłoj staj je akordeonist Michael Lieberwirth a cyrkwinski hudźbnik/komponist Feliks Brojer. W Chróšćanskej cyrkwi je wčera nimale w samsnym času Kulowska spěwna skupina Effata (na wobrazu) zhromadnje z wosadnej młodźinu křižowy puć wuhotowała. K tomu poka­zachu wobrazy a zanjesechu wjacehłósne twórby. Foto: Feliks Haza

Błobošojce (FAG/SN). Jónu wob lěto prezentuje muzejowa bróžnja w Błobo­šojcach (Bloischdorf) pola Grodka wosebitu wustajeńcu rozdźělnych wuměłcow. Za něšto dnjow zaso tak daloko budźe. „Keramika­ – ludźo a žiwjenje“ rěka přehladka, kotruž wuhotujetej Christa Eitnerowa a jeje dźowka Carola. Žonje w starobje 75 a 48 lět pokazatej potom swoje keramiske twórby wo serbskim wjesnym žiwjenju, kotrež stej minjeny čas w swojej Grodkowskej dźěłarni zhotowiłoj. Formy­ a figury nastawaja po dokładnym wobkedźbowanju serbskich nałožkow, drasty a bajow. W skicach wobě žonje swoje zaćišće zapopadujetej a je pozdźišo do keramiskich twórbow přenjesetej. Na te­ wašnje so prócujetej wjesne žiwjenje přichodnym generacijam zachować. Jeju wosebitu wustajeńcu wotewru njedźelu, 31. měrca, w 15 hodź. Wona wostanje potom hač do kónca lěta w Bło­bošojcach přistupna.

Dźensa před 80 lětami wobsadźi němske wójsko na přikaz Adolfa Hitlera litawske přibrjóžne město Klaipėda (němsce Memel) a wokolny bywši memelski kraj hač do Kuršćanskeho zaliwa. Po Prěnjej swětowej wójnje dyrbješe Němska 1919 tutón wuchodny teritorij Narańšeje Pruskeje Litawskej wotstupić. Litawske knježerstwo njeje so po 22. měrcu 1939 wobsadźenju bywšeje Memelskeje wobarało. Jeje okupacija bě poslednja bjezbojowa do nadpada na Pólsku 1. septembra 1939, po kotrymž wudyri Druha swětowa wójna.