McCarthy wotsadźeny
Njezbožo z 21 smjertnymi woporami
Venedig (dpa/SN). Po ćežkim njezbožu busa z 21 wopodstatnjenymi smjertnymi woporami wčera wječor w Venedigu statne rěčnistwo pad přepytuje. Předewšěm přičina njezboža ma so wuswětlić. Bus bě wot laguny do směra kraja po puću a wot mosta 15 metrow hłuboko na železniske kolije zrazył. Po tym je so jězdźidło zapaliło. Wjacore italske medije wuchadźeja z toho, zo měješe busowy šofer strowotniski problem. Na městnje njezboža njeje žanych slědow, zo je wón jězdźidło borzdźił. Tež 40lětny šofer je mjez smjertnymi woporami. Po informacijach zamołwiteje prefektury je mjez mortwymi wobydler z Němskeje. Znajmjeńša štyri woporow su z Ukrainy. Zarjady mjeztym zdźěla, zo je ćežko wopory wohenja dla identifikować. Předewšěm sedźachu w busu turisća, kotřiž běchu sej jedyn dźeń historiske stare město wotkryli. Při njezbožu je so 15 wosobow ćežko zraniło.
Fachowcy nětko wobrazy a wideja kamerow wuhódnoća, zo móhli přičinu njezboža wotkryć. Tež 70 lět stary most chcedźa přepytować.
„Wšitke temy na blido“
Zetkanje swětoweje synody katolskeje cyrkwje w Romje zahajene
Rom (dpa/SN). W Romje zetkawaja so wot dźensnišeho wuzwoleni zastupnicy k swětowej synodźe katolskeje cyrkwje, zo bychu wo přichodnym puću cyrkwje wuradźowali. Sta biskopow, lajkow a jednotliwe žony na generalnu zhromadźiznu – tak oficialny titul – we Vatikanje wočakuja. Wobdźělnicy chcedźa nowe puće za sobuskutkowanje cyrkwinskeje bazy wotkryć. Wobrěčeć chcedźa pak tež temy, kotrež su we wobłuku cyrkwje skerje njepřijomne, na přikład róla žonow abo wobchadźenje z homoseksualnymi.
Sej sami pomhać
Fundamentalne změny drje zetkanje swětoweje synody we Vatikanje njewunjese. Tole woprawdźe wočakować, by tež přeoptimistiske było. Wuspěch drje wobsteji w tym, zo wo łoskoćiwych prašenjach kaž wo nastajenju k homoseksualnym mandźelstwam abo wo žonach w cyrkwinskich zastojnstwach rěča. Nic naposledk wšak dyrbjeli biskopja – wjetšina wšěch wobdźělnikow synody – swoje dotalne nastajenje do prašenja stajeć.
Změny w katolskej cyrkwi su dotal stajnje z praktiskeho žiwjenja wurostli. Dopominam so derje na skandal, jako sej prěnje młode poriki zwěrichu, so zhromadnje do muskich abo žónskich ławkow sydnyć. Pozdźišo zbudźichu prěnje zmužite ministrantki zadźiwanje w cyrkwjach. Hdyž dyrbja serbscy wěriwi hižo bórze prěnje wosady hromadu połožić, dokelž nimaja sami hižo dosć duchownych, njetrjebaja na pomoc z Vatikana čakać. Potom wědźa sej samo pomhać, tež z pomocu angažowanych lajkow. Marko Wjeńka
Wo Janku Šajatoviću zhonili
Starosće a strachi
Mnichow (dpa/SN). W němskej awtomobilowej branši tuchwilu derje běži. Tola hladajo na přichod su starosće a strachi. Kaž wuchadźa z tak mjenowaneho wobchodneho klimoweho indeksa, kotryž bu zawčerawšim wozjewjeny, je septemberske hódnoćenje chětro rozdźělne. Aktualne połoženje hódnoći branša z 20,9 dypkami, štož je 7,7 dypkow wjace hač w awgusće. Wočakowanja pak wostanu hladajo na hódnotu 44,6 dypkow minus jata niske. Hódnoty pohibuja so po skali minus sto do plus sto dypkow.
Mjeztym je to hižo štwórty měsac, w kotrymž stej hódnoće aktualneho połoženja a wočakowanja tajkej rozdźělnej, zdźěli fachowc instituta Ifo Oliver Falck. Tuchwilu je wočakowanje chětro negatiwne a to k tomu přinošuje, zo je wotstawk dale a wjetši. Tajke pesimistiske wuprajenja je branša posledni raz w zwisku z financnej krizu podała.
Situacija napjata
Berlin/Belgrad (dpa/SN). Hladajo na přiběrace napjatosće mjez Kosowom a Serbiskej je zwjazkowa wonkowna ministerka Annalena Baerbock (Zeleni) před dalšim přiwótřenjom konflikta warnowała. „Mjez Kosowom a Serbiskej njesmě k dalšej eskalaciji dóńć. Politiski proces měł dale hić. Tohorunja apeluju na Serbisku, kotraž měła swoje wojerske jednotki na mjezy redukować“, Baerbock minjenu njedźelu na mjeńšim stronskim zjězdźe w Mnichowje wujasni. Wěstota w Kosowje je za Němsku jara wuznamna. „Tam trjebaja ludźo wěstotu a měr“, wona zwurazni. Serbiski prezident Aleksandar Vučić je mjeztym móžny nadpad na Kosowo dementował.
Hišće zańdźenu sobotu je so nawodnistwo Kosowa přizjewiło a wo wohroženju ze stron Serbiskeje rozprawjało. Tak je serbiske wójsko na třoch stronach jednotki zesylniło. Serbiska pak tole wuraznje wotpokazuje.
Tež knježerstwo USA je hladajo na napjatosće w Balkanje njeměrne. Tak je wonkowny minister Antony Blinken ze serbiskim prezidentom telefonował. Vučić je w rozmołwje tohorunja dementował, zo je Serbiska wójsko na mjezy do Kosowa zesylniła.
To a tamne (04.10.23)
Z paradu 75 w Francoskej přeco hišće wulce česćenych historiskich wosobowych awtow Citroën 2CV su w Parisu minjenu sobotu 75. róčnicu předstajenja kultowe jězdźidła na Pariskim awtomobilowym salonje 7. oktobra 1948 wopominali. Jako awto za jednory lud naćisnjeny wóz symbolizuje hač do dźensnišeho žiwjenske začuće ludźi w Francoskej. Hač do 1990 su wjace hač pjeć milionow „kačkow“ twarili.
Profesionalnje wuhotowany wopačny policist je w Frankfurće nad Mohanomw při wobchadnej kontroli nadpadnył. Zastojnicy wuhladachu na pódlanskim sedle módroswěcu a policajsku čapku we awće 19lětneho. Na to sej muža bliže wobhladachu a zwěsćichu, zo je technisce lěpje wuhotowany hač zastojnicy sami. Muž je policije mjeztym derje znaty a dóstanje nětko skóržbu.
Komuny z wužadanjemi
Drježdźany (dpa/SN). Dale a wjace ćěkancow dla maja po słowach sakskeho ministerskeho prezidenta Michaela Kretschmera (CDU) komuny w swobodnym staće wulke wužadanja zmištrować. Najwjac ćěkancow je w zhromadnych přebywanišćach zaměstnjenych. Tuchwilu njeje žanych swobodnych bydlenjow, ale město toho wjace stanow za přebywanje. Kretschmer z tym liči, zo budu bórze zymy dla sportowe hale za zaměstnjenje trěbne, wón dźensa w interviewje z „Leipziger Volkszeitung“ wujasni.
Swjatočnosće dźensa zahaja
Hamburg (dpa/SN). Ze zahajenjom wobydlerskeho swjedźenja w Hamburgu zahaja so hižo dźensa swjatočnosće w zwisku z jednotu Němskeje. Hamburgski měšćanosta Peter Tschentscher (SPD) je tuchwilu předsyda Zwjazkoweje rady, čehoždla město swjatočnosće wuhotuje. Tam wočakuja sta tysacy wobydlerjow. Wjace hač 400 partnerow a akterow pisany program wuhotuje, při čimž ma so metropola jako naslědna, mnohostronska a swětej wotewrjena wotbłyšćować.
Trump před sudnistwom
