Žane rozrisanje
Za piwowymi blidami a při swójbnych swjedźenjach je tema migracije dawno prezentna. Ze stron politiki słyšimy wšědnje nowe žadanja za pomjeznymi kontrolemi a za rozrisanjom na europskej runinje. Dźensa chcychu nutřkowni ministrojo w Brüsselu za wupućom pytać.
Njemóžu sej předstajić, zo namakaja rozrisanje za problem, kiž zdawa so hoberski a dale přiběracy być. Wobrazy dołhich karawanow gumijowych čołmow z ćěkancami do směra na italsku kupu Lampedusa njezbudźeja tež runjewon nadźiju na lěpše časy. Policist mi powědaše, zo su tele dny na awtodróze pólskeho pašowarja z wosom ćěkancami w awće lepili. Wot kóždeho bě sej wón dwaj tysac eurow za jězbu do Němskeje žadał. Dołhož je migracija tež hišće lukratiwna naležnosć, njemóžu sej rozrisanje na politiskej runinje scyła předstajić. Bjezradnosć politiki a přiběraca agresiwita za piwowymi blidami su pak strašna měšeńca, kiž mi skerje strach načinja. Marko Wjeńka
Tójšto ranjenjow zwěsćili
Drježdźany (dpa/SN). Při kontrolach składnostnje cyłoněmskeje akcije na dobro wobchadneje wěstoty „sicher.mobil.leben“ je policija w Sakskej 2 895 ranjenjow zwěsćiła. Zastojnicy kontrolowachu po wšěm swobodnym staće 5 193 wobchadnych wobdźělnikow, mjez nimi 501 kolesowarja, nutřkowne ministerstwo zdźěla. Za čas akcije předwčerawšim, wutoru, měješe 467 zastojnikow na 175 kontrolnišćach wosebje ranjenje čerwjeneje ample, mylenje šoferow přez telefonowanje, pobrachowacu kedźbnosć, přesnadny wěstotny wotstawk, alkohol a drogi kaž tež prašenja spěšnosće, přesćehnjenja a ignorowanje wobchadnych znamjenjow na starosći.
Kraje přesahowacu akciju „sicher.mobil.leben“ přewjeduja wot lěta 2018. Lětsa wěnowachu so předewšěm prašenju mjezsobneje kedźbnosće. „Tuta kedźbnosć je w nadróžnym wobchadźe rozsudna, strachi wotwobarać a njezbožam zadźěwać“, policajska direkcija zdźěla. Loni su w Sakskej 97 061 wobchadnych njezbožow zličili. Smalenje, ranjenje předjězby, pobrachowacy wotstawk, alkohol a drogi běchu hłowne přičiny.
W Lubiju so ze serbšćinu zaběrali
Trudeau wo wodaće prosył
To a tamne (28.09.23)
Po dołhim tam a sem smě bywši britiski premierminister Boris Johnson (59) na swojej ležownosći nětko tola płuwanski basenk twarić, najebać wobmyslenja škitarjow zwěrjatow. Twarski zarjad je twarskim dźěłam přizwolił. Při tym ma Johnson na to dźiwać, zo tam bydlacym mološam (Molche) njezeškodźi. Johnson bě pod škitom pomnikow stejace twarjenje njedaloko Oxforda za swoju swójbu kupił a chce sej tam nětko pool natwarić.
Njeplanowane rjepotanje wosrjedź rańšich powěsćow je rěčnica powěsćow „Tagesschau“ Susanne Daubner rozkładła. Zasadnje so wona wjeseli, zo je ataku poněčim zaso kontrolować móhła. Po připowědźenju wobeju moderatorow rańšeho wusyłanja dyrbješe so Daubner naraz smjeć, štož traješe po jeje měnjenju „wěčnje“. Wothłós w socialnych medijach pak je jednohłósnje pozitiwny.
Debatuja wo kontrolach
Berlin (dpa/SN). Za skutkowniši bój přećiwo pašowarjam ludźi přihotuje zwjazkowa ministerka nutřkowneho Nancy Faeser (SPD) přidatne kontrole při čěskej a pólskej mjezy. Městopředsydka frakcije Zelenych w zwjazkowym sejmje Britta Haßelmann je w tym zwisku potwjerdźiła, zo měło so raznišo přećiwo kriminalnym pašowarjam postupować. Wona je hladajo na krute kontrole při mjezach skerje skeptiska, dokelž wšak zastojnicy potom druhdźe pobrachuja.
Tójšto mortwych w składźe
Stepanakert (dpa/SN). Při rozbuchnjenju bencinoweho składa w Hórskim Karabachu na juhu Kawkaza je po oficialnych informacijach něhdźe 70 ludźi žiwjenje přisadźiło. Něhdźe 290 wobydlerjow je so zraniło. Dalšich sto ludźi je zhubjenych. Detonacija bě póndźelu wječor předewšěm ludźi trjechiła, kotřiž chcychu swoje awta natankować, zo móhli z Hórskeho Karabacha do Armeniskeje ćeknyć.
Schwala dźěćace zawěsćenje
Michael Vierra steji před rozwalinami swojeho domu na kupje Hawaii: ...
Pistorius: Němska z wodźacej rólu
Tallin (dpa(SN). Zakitowanski minister Boris Pistorius je zwjazkarjam NATO w Baltikumje wojersku spušćomnosć Němskeje k wottrašenju Ruskeje přilubił. „Němska přewozmje zamołwitosć a Němska přewozmje wodźacu rólu“, rjekny politikar SPD dźensa na wěstotnej konferency w estiskej stolicy Tallinje.
Runočasnje je Pistorius Ukrainje dołhodobnu podpěru při zakitowanju přećiwo ruskim nadpadnikam zaručił. „Stejimy wam poboku, dołhož je to trjeba“, wón rjekny. Zdobom warnowaše Pistorius před hrózbnymi konsekwencami, dyrbjał-li ruski prezident Putin ze swojim postupowanjom wuspěšny być.
Zakitowanski minister je plany k zaměstnjenju brigady Zwjazkoweje wobory w Litawskej potwjerdźił. Po tym chcedźa 4 000 wojakow němskeho wójska trajnje w Litawskej zaměstnić, tež ze swójbami a dźěćimi, ručež je infrastruktura hotowa.
Žadaja sej tuńše elektroawta
Šwikawa (dpa/SN). Woteběraceho naprašowanja za elektroawtami a přiběraceje konkurency chinskich awtotwarcow dla žada sej dźěłarnistwo IG Metall tuńše modele z Němskeje. „Wuchodna Němska je sej z produkciju elektroawtow w narodnym a mjezynarodnym přirunanju předskok nadźěłała“, rjekny zwjazkowy předsyda Jörg Hofmann do awtomobiloweje konferency dźensa w Šwikauwje. „Tón dyrbimy sej wobchować.“ K tomu trěbny je spěšniši wutwar infrastruktury za nabiwanje awtow a tunja milina za e-awta. Na druhim boku dyrbja awtotwarcy modele poskićeć, kotrež móža sej ludźo z přerěznej mzdu dowolić.
Na konferency w Šwikauwje chcedźa połoženje branše analyzować. Njedawno bě Volkswagen z připowědźenjom njeměr zbudźił, zo chcył w swojej tworni w Šwikauwje ludźi pušćić, dokelž ludźo dale a mjenje elektroawtow kupuja. W oktobru chcedźa produkciju dale znižić. W Šwikauwje dźěła wjace hač 10 000 ludźi. Schulze ma wuchodnu Němsku dale za wodźace městno elektromobility. Tam produkuja Volkswagen, Tesla, BMW a Porsche. „To njesměmy wohrozyć.“
Program spěšnje wučerpany był
Berlin (dpa/SN). Kónc spěchowanskeho programa bórze po starće: Po wulkim nawalu na nowy spěchowanski program za nabiwanje elektroawtow ze solarnej milinu su srědki rozdawane. „Cyłkownje 33 000 próstwam smy přizwolili, najebać techniske problemy“, zdźěla statna spěchowanska banka KfW minjenu nóc. Wot zwjazkoweho ministerstwa za digitalne a wobchad přewostajene etatowe srědki 300 milionow eurow za lěto 2023 su z tym wučerpane. Ručež su dalše pjenjezy k dispoziciji, chcyła banka zjawnosć wo tym informować.
Hižo wčera, prěni dźeń programa, běchu hač do 18 hodź. něhdźe 23 000 próstwam z cyłkownym wobjimom nimale 200 milionow eurow přizwolili, banka zdźěla. Wulki nawal bě sčasami portal banki přežadał a techniske problemy zawinował. Za program mějachu cyłkownje 500 milionow eurow k dispoziciji. Z nim spěchuja nakup a zatwar stacije za nabiwanje elektroawta z pomocu fotowoltaikoweje připrawy a solarneje baterije. Stat přewostaja najwjace 10 200 eurow wobsedźerjam twarjenjow ze swójskim abo hižo skazanym elektroawtom.
