To a tamne (22.02.23)
Najlěpše sambašule Rio de Janeira su na kóncu swětoznatych ćahow w Sambodromje brilěrowali. Šěsć top-šulow ćehnješe na poslednim dnju wubědźowanja hač do wutorneho zaheho ranja z kostimami bjez mjezy, spektakularnymi wozami a inowatiwnymi wosebitymi efektami po stadionje samby z wjace hač 70 000 přihladowarjemi. Mnohe sambašule su swoje ćahi tež historiskim brazilskim temam abo figuram wěnowali. Tak je šula „Paraíso do Tuiuti“ stawiznu prěnjotnje z Indiskeje pochadźacych buwołow na kupje Marajó powědała.
Mału holčku, kotraž bě so po raznym zemjerženju w Syriskej pod rozwalinami narodźiła, staj jeje ćeta a teje mandźelski adoptowałoj. „Wona budźe kaž jedne z mojich dźěći. Budu wšitko za nju činić“, rjekny nowy adoptiwny nan, Chalil Sawadi, wčera powěsćerni dpa. Ćeta a wuj mataj samaj štyri dźowki a dweju synow. Swójba je swoju chěžu při žałostnym rženju zhubiła a bydli nětko w stanje.
„Mjetamy pjenjezy z woknom won“
Infineon chce bórze z twarom noweje twornje w Drježdźanach započeć – zo stat tu kóžde dźěłowe městno z jednym milionom eurow subwencionuje, kritizuje znaty wědomostnik.
Drježdźany/Halle (SN/mb). Zasydlenje chipfabrikow dokoławokoło sakskeje stolicy běše po towaršnostnym přewróće najwažniši nadawk krajneho knježerstwa pod nawodom Kurta Biedenkopfa (CDU). Z pomjenowanjom „Silicon Saxony“ zwuraznjeja narok, w swětowej lize hospodarstwa sobu hrać. Subwencije z miliardami dawkowych pjenjez na dobro koncernow su z třomi argumentami wopodstatnili: Sprěnja skutkuje „Silicon Saxony“ kaž swětłownja za cyły kraj. Zdruha móže kraj w globalnym wubědźowanju jenož wobstać, hdyž „global playerjow“ ze spěchowanskimi srědkami wobtykuješ, štož na zakładźe zakonjow legalnje „nawabjenje“ rěka. Střeća njesměš při klučowych technologijach wot statow kaž Chiny wotwisny być.
Trajacu pomoc připrajiłoj
Berlin (dpa/SN). Němska je potrjechenym žałostneho zemjerženja w turkowsko-syriskim pomjeznym regionje najlěpšu móžnu akutnu pomoc a podpěru při nowonatwarje připrajiła. Wonkowna ministerka Annalena Baerbock (Zeleni) a zwjazkowa ministerka nutřkowneho Nancy Faeser (SPD) stej dźensa katastrofowu kónčinu na juhowuchodźe Turkowskeje wopytałoj. Powětrowe wójsko transportowaše dźensa tam znowa pomocne twory, mjez nimi su 100 stanow, 400 pólnych łožow a wjace hač 1 000 spanskich měchow.
Protesty w Israelu
Tel Aviv (dpa/SN). Dźesaćitysacy ludźi su wčera přećiwo wosłabjenju justicneho systema w Israelu demonstrowali. Najebać to je parlament w nocy dźěl dwělomneje reformy justicy prawicarsko-nabožneho knježerstwa w prěnim wot třoch čitanjow schwalił. Mjeztym wopyta prěni raz po spřisahanju noweho israelskeho knježerstwa zwjazkowy minister justicy Marco Buschmann (FDP) tónle kraj. Wón je napominace słowa wolił, bjez toho zo je zakonske předewzaće direktnje mjenował.
W Iranje k smjerći zasudźeny
Ćahi po městach su róžowu póndźelu wjerški w porynskich ...
Mnozy so nuzy w zastaranju z lěkami boja
Frankfurt/Berlin (dpa/SN). Mnozy ludźo w Němskej boja so nuzy při medikamentach, aktualne naprašowanje wujewi. Dohromady 38 procentow naprašowanych mjenuje strach ćežow při dodawanju „jara wulki“ abo „skerje wulki“, rěka w nowym přepytowanju Zwjazkoweho zjednoćenstwa producentow lěkow (BAH), kotrež powěsćerni dpa předleži. Na tamnej stronje maš třećinu probandow, kotraž ma strach za „niski“ resp. „jara niski“, kaž z reprezentatiwneho naprašowanje, na kotrymž wobdźěli so minjenu nazymu 2 000 ludźi.
Wosebje ludźo w starobje 50 do 69 lět (41 procentow) kaž tež tajcy starši hač 70 lět (43 procentow) maja dodawanske ćeže za wulke. Ćeže při kupje lěkow dožiwili pak su wosebje 30 do 49lětni (37 procentow) a mjenje wyše 70 lětni (22 procentow).
Ćeže při dodawanju běchu naposledk při medikamentach, kotrež na patent wjazane njejsu, kaž su na přikład brěčka pře zymicu za dźěći, ale runje tak při preparatach za dorosćenych kaž antibiotiki, lěki pře rak a za zniženje ćišća kreje.
Putin zapad dale wobwinuje
Moskwa (dpa/SN). Krótko do prěnjeje róčnicy wot njeho postajeneje wójny přećiwo Ukrainje je ruski prezident Wladimir Putin zapad za to wobwinował. „Woni su wójnu dowjedli“, twjerdźeše šef Krjemla dźensa z widom na zapadne staty w swojej narěči k połoženju naroda před zastupjerjemi Federalneje zhromadźizny. Tuta wobsteji ze Statneje dumy a Federaciskeje rady. Přitomni běchu mjez druhim tež wojacy z wójnskeje kónčiny.
Znowa rjekny Putin, zo w Ukrainje „režim neonacijow“ móc wukonja. „Wojersku specialnu operaciju“, tak mjenuje Moskwa tutu wójnu, wjedu dale.
Zdobom je prěni muž Ruskeje dalšu financnu podpěru za ruskich weteranow a swójby morjenych wojakow připowědźił. W swojej narěči je Putin knježerstwu přikazał, zo by so w kooperaciji z jednotliwymi regionami wo wutworjenje wosebiteho statneho fondsa starało. Socialni dźěłaćerjo měli so wo swójby z wójnskimi mortwymi starać.
Wčera Kijew, dźensa w Pólskej
Prezident Biden wječor před Waršawskim kralowskim hrodom porěči
Kijew/Waršawa (dpa/SN). Po swojim překwapjacym wopyće wčera w ukrainskej stolicy Kijewje je prezident USA Joe Biden dźensa z hosćom w Pólskej. W pólskej stolicy běštej mjez druhim zetkanje z prezidentom Andrzejom Dudu a narěč před Waršawskim kralowskim hrodom k prěnjej róčnicy zahajenja wójny w Ukrainje – 24. februara – předwidźanej. Narěč je za wječor planowana, jenož něšto hodźin po tym, zo je so ruski prezident Wladimir Putin w Moskwje k połoženju swojeho kraja wuprajił.
Krótkowizita wčera w Kijewje bě pod najkrućišimi wěstotnymi naprawami. Biden ju wužiwaše, zo by Ukrainje trajacu podpěru USA slubił a signal přezjednosće napřećo Putinej wusyłał. Wulkeho wěstotneho rizika dla je Běły dom wopyt hač do poslednjeho wokomika zamjelčał. Knježerstwo USA pak je rusku stronu něšto hodźin do toho wo wiziće informowało.
To a tamne (21.02.23)
Něšto měsacow do krónowanja Charlesa III. zahaji so předań suweněrowych artiklow. Britiske hornčerske předewzaće Emma Brigdewater liči z wulkim naprašowanjom za šalkami, talerjemi a čajowymi kanami. Motiw – krónu z lawom a jednorohačom jako znamjo britiskeje monarchije – z hubicowym kołkom nanjesu a potom z ruku wudebja. Krónowanje je 6. meje w Londonskej Westminster Abbey.
Druha wulka technoparada „Rave The Planet“ z dźesaćitysacymi wobdźělnikami je za 8. julija w Berlinje planowana. Hišće hač do kónca februara móža so zajimcy za wobdźělenje z wótřerěčakowym wozom požadać. Lětuše moto je „Music is the Answer“ (hudźba je wotmołwa). Parada ma demonstracija za zachowanje elektroniskeje hudźbneje kultury za měr na swěće być.
Póstne eksercicije
Vatikan (B/SN). Tež lětsa přewjedu so tradicionalne póstne eksercicije za Romsku kuriju w priwatnej formje. Přisłušnicy zetkaja so wot 26. februara do 3. měrca k meditacijam a zhromadnemu modlenju. Dźěło w tym času wotpočuje. Tež bamž Franciskus terminy njepřijimuje, generalna awdienca 1. měrca wupadnje.
Přećiwo korupciji
Kinshasa (B/SN). Na jězbje do Afriki je bamž Franciskus w stadionje Kinshasa młodźinje prědował: „Bóh je Wam dar žiwjenja do rukow połožił. Palc je za modlitwy, pokazowak za zhromadnosć, pjeršćenjak za wodawanje, małušk za słužbu a srjedźak za sprawnosć. Njedajće so ke korupciji zawjesć!“ 65 000 přitomnych w stadionje na to wołaše: „Ně ke korupciji!“
Cyrkej a liturgija identiskej
Vatikan (B/SN). Šěsć njedźel po smjerći Benedikta XVI. přednjesu na Božej mši w Canto Santo Teutonico prědowanje kardinala Kurta Kocha. Benedikt XVI. bě woprawnjeneho přeswědčenja, zo „maja wšitke trěbne wobnowjenja cyrkwje z hłuboko sahaceje duchowneje změny liturgije wuchadźeć, dokelž stej cyrkej a liturgija identiskej“.
Sensacionalny dar
Minister trening wopytał
Münster (dpa/SN). Zwjazkowy zakitowanski minister Boris Pistorius je so dźensa wo wukubłanju ukrainskich wojakow na němskich bojowych a třělenskich tankach w Nižosakskej informował. Politikar SPD je šulu tankoweho wójska w Münsteru wopytał, hdźež Ukrainjenjo wobchadźenje z Leopardom 2 a třělenskim tankom Marder nawuknu. Pistorius chcyše sej swójski wobraz wo treningu stworić.
Nimale 47 000 mortwych
Istanbul (dpa/SN). Ličba mortwych po žałostnym zemjerženju w Turkowskej je na 41 020 rozrostła. Wo tym je turkowski zarjad za škit před katastrofami Afad po zdźělence powěsćernje Anadolu wčera wječor informował. W Syriskej su dotal něhdźe 5 900 zahinjenych ludźi w zwisku z přirodnej katastrofu zličili. Dohromady je we woběmaj krajomaj nimale 47 000 ludźi swoje žiwjenje přisadźiło.
Listy po dwěmaj klasomaj
