Moskwa (dpa/SN). Šef ruskeje priwatneje armeje Wagner, Jewgeni Prigošin, je swoju kritiku nastupajo postupowanje Ruskeje we wójnje přećiwo Ukrainje potwjerdził a před poražku Ruskeje warnował. „Dyrbimy so na jara ćežku wójnu přihotować“, rjekny wón Krjemlej přichilenemu politoloze Konstantinej Dolgowej, kiž je widejo rozmołwy z Prigošinom w nocy na srjedu wozjewił.

Zo njeby Ruska wójnu přěhrała, dyrbjała wona hnydom wójnski staw wukazać a cyłe hospodarstwo na produkciju municije přestajić. „Trjebamy nowu mobilizaciju wojakow“, rjekny dowěrnik ruskeho prezidenta Wladimira Putina. Wšitcy měli za wójnu dźěłać.

Prigošin dopominaše w rozmołwje z Dolgowom hišće raz na poražki ruskich jednotkow, kiž běchu so před Kijewom a Chersonom „do cholowow zmazali“ a ćeknyli. 61lětny nimo toho rjekny, zo njeje wón „wojersku specialnu operaciju“ zahajił, ale druzy. Putin bě wójnu 24. februara 2022 přikazał.

Lipsk/Berlin (dpa/SN). Něhdźe 200 ludźi je po raciji a přepytowanjach w bydlenjach aktiwistow skupiny Poslednja generacija wčera w Lipsku demonstrowało. Kaž Lipšćanska policija zdźěla, bě zwjazk Fridays for Future k solidaritnemu zarjadowanju na dobro klimowych aktiwistow namołwjał. Demonstracija wosta po informacijach policije měrniwa.

Blokady klimu škitaceje skupiny Poslednja generacija chcedźa po posudku Berlinskeje nutřkowneje politikarki SPD w prěnim rjedźe prowokować. Wčerawšu raciju policije su aktiwisća „wotpohladnje prowokowali“ rjekny předsydka nutřkowneho wuběrka Berlinskeho Domu zapósłancow Melanie Kühnemann-Grunow Berlinskim rozhłosownikam. „Prowokować je wšak jedyn ze zaměrow skupiny.“ Při wšěm bě racija bayerskeho statneho rěčnistwa po jeje měnjenju „dospołnje přehnata“. Zaměry škitarjow klimy njejsu kriminelne, jenož metoda nuzowanja, wona rjekny. So rozhorić a jich chłostać, nikomu ničo njepomha. „Dyrbimy z demonstrantami rěčeć.“

Ministrojo wuradźuja w Podstupimje wo zakładnym zawěsćenju

Podstupim (dpa/SN). Ministrojo za młodźinu a swójby Zwjazka a zwjazkowych krajow su dźensa w Podstupimje wo trěbnych naprawach w zwisku z planowanym zakładnym zawěsćenjom dźěći wuradźowali. We wobłuku amploweje koalicije maja w tym zwisku hišće dosć rozdźělne předstawy. Braniborska socialna ministerka Ursula Nonnemacher (Zeleni) je zwjazkowe knježerstwo namołwjała, předewzaće zahajić. „By dobry signal był, bychu-li na zwjazkowej runinje wotpowědny signal dali, byrnjež hišće wšitko dozrawjene njebyło“, rjekny wona powěsćerni dpa. Nonnemacher zhromadnje z braniborskim ministrom za młodźinu, Steffenom Freibergom (SPD) konferencu nawjeduje.

We wčerawšej rozprawje wo fotowej dźěłarničce w Błótach je so bohužel zmylk zasunył. Šula za delnjoserbsku rěč njeje w Dešnje, ale w Choćebuzu. Fotowa akcija wotmě so w statokomaj Lierschojc a Möbertojc swójbow w Bórkowach.

  Prosymy wo wodaće