Bremen (dpa/SN). Dotal knježaca SPD je po najnowšim hamtskim wozjewjenju wčerawše wólby měšćanskeje zhromadźizny w Bremenje ze 29,9 procentami dobyła. Druha najsylniša móc je CDU ze 25,7 procentami, krajny wólbny běrow dźensa rano zdźěli. Sobu knježacy Zeleni docpěchu po tutych informacijach 11,7 procentow. Trěći koaliciski partner, Lěwica, dósta 11,2 procentaj. Prawicarsko-populistiska regionalna strona Roznjem­drjeni wobydlerjo docpě 9,6 procentow a zaćehnje prěni króć jako frakcija do měšćanskeje zhromadźizny. FDP nažnja 5,2 procentaj a wostanje w parlamenće. Oficialny kónčny wólbny wuslědk wočakuja zajutřišim, srjedu.

Zwjazkowa předsydka SPD Saskia Esken ma sylny wuslědk prawicarsko-populistiskeho wolerskeho zjednoćenstwa Roznjemdrjeni wobydlerjo za warnowanski signal. „Zo móže wolerske zjednoćenstwo hižo z tutym nadpismom a hesłom tajke wuslědki docpěć, měło nas znjeměrnić“, rjekny wona w rozhłosu. „Dyrbimy z ludźimi dale w rozmołwje wostać.“

Němska a Francoska přewostajitej Ukrainje dalšu wojersku pomoc

Berlin (dpa/SN). Ukrainski prezident ­Wolodymyr Zelenskyj je so po swojim krótkim wopyće w Němskej a Francoskej zaso do Kijewa nawróćił, a móže so dalšeje wojerskeje pomocy wobeju krajow nadźijeć. W Berlinje a Parisu bě sej Zelenskyj wčera wospjet wojerske lětadła ­žadał. Zwjazkowy kancler Olaf Scholz (SPD) kaž tež francoski statny prezident Emmanuel Macron reagowaštaj pak zdźeržliwje. Francoski statny šef chcyše so, kaž z Élyséejowejo palasta rěkaše, dźensa wječor w telewizijnej rozmołwje k dalšej wojerskej pomocy wuprajić.

„Zabyta rjekowka humanitarneje pomocy“ steji na pomjatnej tafli za Marju Simonowu, kotruž wotkrychu minjeny pjatk na jeje rownišću w Drježdźanach-Johannstadće. Něhdźe 80 česćowarjow wuznamneje Serbowki bě so k swjatočnosći na pohrjebnišću swj. Trojicy zhromadźiło, mjez nimi społnomócnjena za naležnosće Serbow w sakskim statnym ministerstwje za wědomosć, kulturu a turizm dr. Madlena Malinkec a předsyda Domowiny Dawid Statnik. Předsyda sakskeho Čerwjeneho křiža Rüdiger ­Unger pokaza w swojim witanju na to, zo wotměje so počesćenje na Mjezynarodnym dnju hladarjow 12. meje, wšako bě Marja Simonowa pućrubarka mo­derneho hladanja chorych kaž tež Čerwjeneho křiža w Sakskej.

Dohlad do žiwjenja počesćeneje poda dr. Jürgen Helfricht, publicist z Rade­beula, kotryž dźěła na jeje biografiji. ­Pokazujo na pochad Marje Simonoweje ze serbskeje Janašec swójby w Dobruši pola Budyšina, je jemu w jednorych ­wjesnych poměrach wotrosćena žona „wobdźiwajomna Serbowka a Saksowka“. Kniha wo jeje žiwjenju a skutkowanju ma klětu wuńć.

Bjez alkohola wotměli su so wčerawše wólby parlamenta w Thailandskej. Wot lěta 2014 płaći w kraju 24 hodźin trajacy zakaz alkohola, wot soboty wječora hač do kónca wólbow njedźelu w 17 hodź. Ludźo měli we wólbnych lokalach strózbi być. Nimo toho kładu w kraju wažnosć na fairne a měrniwe wothłosowanje. ­Zakaz płaći we wobchodach runje tak kaž w hosćencach a na priwatnych swjedźenjach. Hodźinu po wólbach smědźa po wšěm kraju zaso piwo točić.

Wjacore sćěny do wuhenja wudypali su zatłusnjeneje kóčki dla w Francoskej. Zwěrjo bě so při přeslědźenju noweho bydlenja zhubiło. Po někotrych dnjach susod wobsedźerki mjawčenje kóčki słyšeše. Wohnjowi wobornicy wudypachu w kóždym poschodźe domu dźěru do sćěny: Skónčnje móžachu wosłabjene zwěrjo namakać a wuswobodźić.