Wo spěšnych železniskich zwiskach mjez Němskej a Pólskej wuradźowali

Podstupim (dpa/SN). Zastupjerjo braniborskeho, sakskeho a pólskeho knježerstwa su so wčera w Podstupimje z předsydstwami železniskich předewzaćow schadźowali. Zhromadnje su wo tym ­wuradźowali, kak móhli lěpše wobchadne zwiski mjez Němskej a Pólskej zaručić. Hišće do zeńdźenja braniborski minis­terski prezident Dietmar Woidke (SPD) wuzběhny, zo chce za ICE-projekt mjez Berlinom–Choćebuzom–Zhorjelcom a Wrócławjom wabić. W tamnych europskich krajach su spěšne železniske zwiski dospołnje normalne. Za Łužicu pak tole njepřitrjechi. „Tež do směra Pólskeje měli spěšniki ICE jězdźić. Za to chcu wojować“, Woidke podšmórny.

Hladajo na derje wuhotowane wobchadne zwiski njejsu wuhlady za Budyski region najlěpše. Tole je znowa po wčerawšim „železniskim wjeršku“ w Podstupimje wěste. Tak ma so projekt spěšnika mjez Berlinom přez Choćebuz a Zhorjelc dale do Wrócławja najprjedy wuwić. Rěč wo spěšnym ­zwisku mjez Drježdźanami a Zhorjelcom žadyn tema njeje. To je za wobydlerjow a přede­wzaća w Hornjej Łužicy přesłapjace. Hač do Drježdźan su železniske čary elektrifi­kowane. Tež w Pólskej su železniske předewzaća swoje domjace nadawki spjelnili a zwiski hač do Zhorjelca elektrifikowali. Čara mjez Drježdźanami hač k pólskej mjezy nima po wšěm zdaću tajki ­wulki wuznam, byrnjež su předewzaća kaž na přikład Alstom abo Siemens podłu čary zaměstnjene. Nimo derje wuhotowaneho železniskeho zwiska klaca tež na zwjazkowej awtodróze A 4, hdźež so jězdźidła ­kopja. Móžu ludźi w Hornjej Łužicy zro­zumić, ­jelizo so prašeja: A što je z nami? Bianka Šeferowa

W Peru je po informacijach zarjadow znajmjeńša 585 mórskich lawow na ptačej gripje zahinyło. Mortwe zwěrjata namakachu podłu pobrjoha južnoameriskeho kraja. Z přepytowanjow wuchadźa, zo běchu wone z wirusom H5N1 inficěrowane. W škitanych kónčinach kraja su nimo toho něhdźe 55 000 zahinjenych ptačkow namakali, mjez druhim pelikany, tonuški a pinguiny.

Tysacy ludźi su wčera před čěskej Narodnej banku w Praze čakali, zo bychu jednu z 200 000 limitěrowanych wopomnjenskich bankowkow dóstali. Tež w druhich městach kraja su so rynki před bankami wutworili. Najebać zmjerzk su so zajimcy samo hižo w nocy nastupili. Ban­kowka dopomina na 30lětne wobstaće Narodneje banki.

Paris (dpa/SN). Wolijowy a energijowy koncern Totalenergie měješe loni jasnje wjace dochodow. Francoske předewzaće při tym wot sylnje stupanych płaćiznow za wolij a płun profitowaše. Dobytk je pod smužku wo 28 procentow na 19,1 miliardow eurow rozrostł, koncern dźensa w Parisu zdźěli. Akcionaram chce předsydstwo njewočakowano wysoku kónčnu diwidendu zapłaćić. Nawodnistwo pak je tohorunja informowało, zo chcedźa so přichodnje wo to prócować, akcije wróćo kupić.

Nadźija so pozhubja

Nigde (dpa/SN). Pod wulkim časowym ćišćom spytaja pomocnicy wopory zemjerženja na juhu Turkowskeje a na sewjeru Syriskeje wuchować. Dwaj dnjej po přirodnej katastrofje z jasnje wjace hač 10 000 zemrětymi pozhubja so nadźija, při zdźěla zymskich temperaturach hišće přežiwjenych pod rozpadankami namakać. Mjeztym je turkowski prezident ­Recep Tayyip Erdoğan připowědźił, zo poda so do potrjecheneje kónčiny.

Žada sej wjace transparency