Bayerski ministerski prezident chcył jadrowu milinarnju dale wjesć

Berlin (dpa/SN). Zwjazkowa ministerka za wobswět Steffi Lemke (Zeleni) je namjet bayerskeho ministerskeho prezidenta Markusa Södera (CSU) wotpokazała, zamołwitosć za atomowe milinarnje w Němskej zwjazkowym krajam přewostajić. W rjadach FDP, kiž bě so do wotpinjenja poslednich atomowych milinarnjow w Němskej za podlěšenje dźěłowych časow milinarnjow zasadźała, ­zbudźa žadanje zadźiwanje a kritiku. ­Pozitiwny wothłós dóstanje předsyda CSU z rjadow CDU.

Poslednje tři atomowe milinarnje běchu sobotu wječor wotpinyli, mjeztym Isar 2 w Bayerskej. Söder sej w tym zwisku žada, atomowy zakoń hišće raz změnić a krajam zamołwitosć přepodać, zo móhli milinarnje w swójskej zamołwitosći dale wjesć. Lemke pokazuje na přisłušnosć Zwjazka. „Je wostrózbjace, kak móže ministerski prezident jednoho ze zwjazkowych krajow wustawoprawniske prašenja nuklearneje wěstoty takle lochkomyslnje do prašenja stajeć.“

Mnozy wobsedźerjo jednoswójbnych domow chcedźa sej lětsa fotowoltaikowu připrawu na třěše instalować dać. Skazali su ju zwjetša hižo loni srjedź lěta. Tež ja sym so za tajku připrawu rozsudźił a so nětko wjeselu, zo po wšěm zdaću přichodny měsac tak daloko budźe, zo na swójskej třěše milinu produkuju. Přičina, zo sym so loni za to rozsudźił, bě wysoka płaćizna za milinu. Nětko móžu zličbowanku swojeho zastaraćela nadźijomnje trochu pomjeńšić a tež přetrjebu płuna redukować, hdyž dźakowano ćopłotnej klumpje wodu zhrěju. Chcu prosće wot cyłkowneho zastaranja z milinu mały kusk njewotwisniši być. W tym zwisku njeje to žana reakcija na wotpinjene atomowe milinarnje minjeny kónc tydźenja. Ja tež dwěluju, zo přichodny čas pola nas milina njebudźe, dokelž někotre procenty wupadnu. Te dźě nětko we wukraju přikupimy. Ale so znajmjeńša zdźěla sam z milinu zastarać móc, žno začuwam jako tróšku změrowace. Marian Wjeńka

Kónc njewšědneho pospyta: Po 500 dnjach dobrowólneje izolacije je 50lětna Španičanka Beatriz Flamini swój kwartěr w 70 metrow hłubokej prózdnjeńcy w južnošpaniskej prowincy Granada wopušćiła. Slědźerka prózdnjeńcow chcyše zwěsćić, kak ćěło samotnosć pod zemju znjese. Nimo toho chcyše wona nowy swětowy rekord nastajić. Italčanka Christine Lanzoni bě lěta 2007 na wšě 269 dnjow pod zemju wutrała. Po nawróće chcyše Flamini – prěni króć po 500 dnjach – najprjedy raz dušować.

Po 24 hodźinach su wohnjowi wobornicy w zwjazkowym staće USA Floridźe kruwu z błóćaneje dźěry wuswobodźili, do kotrejež bě wona padnyła. Dospołnje wučerpane zwěrjo móžachu pomocnicy skónčnje wućahnyć, dźakowano wobornikam, kotřiž běchu „za wuchowanje wosebje wulkich zwěrjatow“ wukubłani.

Washington (dpa/SN). W zwisku z wozjewjenjom brizantnych dokumentow tajnych słužbow USA zajaty muž je sobudźěłaćer wójska. Wo tym je justicny minister Merrick Garland we Washingtonje wčera informował. Muža su mjeztym „njewoprawnjeneho zběranja, składowanja a posrědkowanja tajnych podłožkow“ dla zajeli. Sćelak CNN pokazowaše widejo akcije w telewiziji. Po informacijach medijow je muž 21 lět stary.

Dźěle Bachmuta dale zakituja

London (dpa/SN). Po posudku britiskich tajnych słužbow ukrainscy wojowarjo ­zapadne štwórće wuchodo-ukrainskeho města Bachmut přeco hišće zakituja. Minjene 48 hodźin dožiwjachu pak tam „wosebje sylne nadpady ruskeje artilerije“, zakitowanske ministerstwo w Londonje zdźěla. Přičina je, zo jednotki ruskeho zakitowanskeho ministerstwa a ruska skupina zóldnarjow „Wagner“ lěpje hromadźe dźěłaja. Ruske wojerske jednotki su po swójskich informacijach mjeztym 80 procentow Bachmuta zdobyli.

Rozsudźa wo rentowej reformje