Dalše sylne nadpady
Kijew (dpa/SN). Ruske wójsko Ukrainu znowa z raketami nadpadnje. Po cyłym kraju bu dźensa rano powětrowy alarm wuwołany. Tež w ukrainskej stolicy Kijewje běchu wjacore ćežke eksplozije w centrumje słyšeć. Wyši měšćanosta stolicy Witali Kličko rěčeše wo wjacorych eksplozijach, bjeztoho zo detaile mjenowaše. Wón warnowaše před tym, zo milina wupadnje a namołwi ludźi, swoje mobilne telefony nabiwać a sej skład wody přihotować.
Spřisahaja nowe knježerstwo
Jerusalem (dpa/SN). Nimale měsacaj po wólbach parlamenta w Israelu chcychu dźensa prawicarsko-nabožne knježerstwo dobyćerja Benjamina Netanjahu spřisahać. Prěni raz su tež prawicarscy politikarjo w koaliciji zastupjeni. Bywši ministerski prezident Netanjahu wróći so z tym po połdra lětomaj na móc. W stawiznach kraja njebě nichtó dlěje w zastojnstwje hač 73lětny. Je to hižo šeste knježerstwo, kotrež předsyda prawicarskokonserwatiwneje strony Likud wutwori.
Njetrjebaja přinošk płaćić
Wot klětušeho transparentniše
Drježdźany (dpa/SN). Noweho zakonja dla dyrbja zarjady w Sakskej wot klětušeho transparentnišo dźěłać. Wobydlerki a wobydlerjo móža wotpowědnym zarjadam próstwy wo sposrědkowanju informacijow – na přikład nastupajo studije, rozprawy abo zdźělenki – zapodać, kaž zamołwita za škit datow Juliane Hundert wčera zdźěli.
Nimo toho měła so hač do kónca lěta 2026 platforma zarjadować, přez kotruž zjawne zarjady eksistowace informacije online přewostaja. „Transparenca swědči wo modernym zrozumjenju stata“, wujasni prawiznica, kotraž ma dodźerženje zakonja přichodnje kontrolować. Zakoń móhł wažny přinošk być, zo wobydlerki a wobydlerjo postupowanja a pozadki dźěła zarjadow lěpje zrozumja. Nimo toho zesylnja transparenca dowěru do politiki a zarjadnistwa, Juliane Hundert zwurazni.
Köpping: Je na času so wujednać
Drježdźany (dpa/SN). Sakska socialna ministerka Petra Köpping (SPD) měni, zo je nětko čas so wujednać. „Koronakriza bě za zhromadnosć w towaršnosći ćežka, hišće sylniša hač kriza ćěkancow“, wona powěsćerni dpa rozłoži. Tak přizjewichu so ludźo pola njeje, kotřiž běchu přiwuznych korony dla zhubili a sej krućiše naprawy žadachu. „A běchu tež ludźo, kotřiž njemějachu žadyn strach. Koronakrizy dla je so wjele swójbow pačiło. Znaju swójby, hdźež dachu so młodostni skradźu šćěpić, dokelž sej njezwěrichu to staršimaj rjec.“
Ministerka je w swojim ressorće tež za towaršnostnu zwjazanosć zamołwita. Najwjace ludźi je pandemiju derje přetrało. „Njejsym moralisce nihdy hódnoćiła, jelizo nochcychu so přistajeni w strowotniskich zarjadnišćach šćěpić dać.“ Naprawu dyrbjachu strašneje delta-warianty koronawirusa dla přesadźić.
Köpping dopomni na to, zo zasłuža wobydlerjo na wuchodźe Němskeje přerěznje 700 eurow wob měsac mjenje. Rezerwy su hižo za čas korony přetrjebali. Tema so w zwjazkowym knježerstwje dosahajcy njewobjednawa.
Jenož wjelki a brunica?
Nowu imageowu kampanju za Łužicu wčera w Podstupimje zahajili
Podstupim (dpa/SN). Z pomocu noweje imageoweje kampanje ma wjace fachowcow do Łužicy přichadźeć. Ze sloganami, plakatami a filmom ma so wot januara za kónčinu wabić. W regionje dźě njebudźe so nanajpozdźišo wot lěta 2038 hižo wuhlo wudobywać. „Łužica. Super kónčina“ rěka kampanja, kotraž bu wčera w Podstupimskej statnej kencliji předstajena.
Łužica je wjace hač jenož wjelki a wuhlowe jamy, wuzběhny zamołwity šef agentury Christof Biggeleben. Dotal jenož mało ludźi Łužicu znaja. „Zo so tam wjele hiba, nichtó zwonka regiona njezhoni.“ Kampanja je po informacijach statneje kenclije na štyri lěta wusměrjena a ma cyłkownje 1,9 milionow eurow płaćić.
Mjeztym je hižo projekt z regionalneho hospodarstwa přećiwo negatiwnemu imagej Łužicy zahajeny. Naprawa ma zaměr, nowe dźěłowe mocy zdobyć (). Město Choćebuz wabi nimo toho ze sloganom „Boomtown“.
Po přewróće je wjele ludźi z brunicoweje kónčiny wotpućowało. Aktualnje maja po měšćanskim zarjadnistwje wjace hač 7 000 dźěłowych poskitkow a wjace hač 4 000 wukubłanskich městnow.
Móža do wukraja
Peking (dpa/SN). Po kóncu wobmjezowanjow koronapandemije dla móža Chinjenjo bórze zaso dowol we wukraju činić. Narodny zarjad za zapućowanje zawčerawšim zdźěli, zo móža so Chinjenjo, kotřiž chcedźa we wukraju přebywać, wot 8. januara zaso wo pućowanski pas požadać. China njebě tajke za turistiske jězby krótko po spočatku pandemije hižo zhotowiła. Zwjetša běchu jenož hišće nuzne słužbne jězby a přebytki we wukraju za studijne zaměry dowolene.
Pekingska strowotniska komisija bě hižo minjenu póndźelu zdźěliła, zo so hamtski schodźenk stracha koronawirusa dla wot 8. januara zniži. Z tym njeje zdobom karantena při zapućowanju do Chiny trěbna. Naposledk běchu pućowacy hišće znajmjeńša pjeć dnjow w hotelowej stwě izolowani a kruće wobstražowani. Sčasami bě samo zapućowanska karantena we wobjimje 21 dnjow předpisana.
Dochodowy dawk znižić
Berlin (dpa/SN). Zwjazkowy financny minister Christian Lindner (FDP) ma hladajo na aktualne hospodarske połoženje zniženje dochodoweho dawka za prawje. To wuchadźa z interneje papjery jeho ministerstwa, kotraž Němskej nowinarskej agenturje dpa předleži a wo kotrejž najprjedy nowina „FAZ“ rozprawješe.
Politikar FDP bě swojich fachowcow wo namjety prosył, kak móhłoj so hospodarska situacija a wubědźowanjakmanosć spěšnišo polěpšić. „Tež generelne redukowanje tarifa hladajo na dochodowy dawk je móžne“, rěka w papjerje.
Financne ministerstwo žada sej w papjerje změnu nastupajo financnu a hospodarsku politiku. Naposledk su wysoke energijowe płaćizny a inflacija, deficity při modernizaciji a njedostatk fachowcow němske hospodarstwo wosłabili. Trěbne su tuž lěpše powabki za inwesticije a wjace poskitkow fachowcam. Tohorunja měli so běrokratiske zadźěwki wottwarić.
Nimo dawkowych naprawow namjetuja fachowcy FDP fleksibelniše dźěłowe časy a dalše wobhospodarjenje jadrowych milinarnjow.
To a tamne (29.12.22)
Prěni hodowny dźeń je defektny błyskač w Berlinje błudny hrał. Připrawa nětko zaso regularnje dźěła, zawčerawšim policija zdźěli. Přičina za permanentnje čerwjenje błyskace swětło na Frankfurtskej aleji bě krótkospjeće. Prawdźepodobnje bě woda do błyskača běžała a zmylk zawinowała. Stacionarna připrawa w Berlinje-Lichtenbergu bě zašłu njedźelu wječor wokoło 22.30 hodź. napadnyła, dokelž so permanentnje a njewotwisnje wot spěšnosće jězdźidłow błyskaše. Dokelž reparatura hnydom móžna njebě, dyrbjachu ju zastojnicy nachwilnje pokryć.
Wćipnosći 70lětnjeje žony ma so młody muž w Lübecku dźakować. Tak móžeše wón patoržicu tola wo ruku swojeje přećelki prosyć. Wuměnkarka bě mjenujcy tyzku z pjeršćenjomaj namakała, wočiniła a to policiji přizjewiła. Kaž so wukopa, je tyzka do toho z dźěćaceho wozyčka padnyła. Muž bě so tohorunja pola policije přizjewił. Zastojnicy sposrědkowachu jemu kontakt k žonje. Hač budźe 70lětna na kwas přeprošena, njeje znate.
Apoteki medicinu zhotowjeja
Berlin (dpa/SN). Zo móhli zastaranje z medikamentami předewšěm za dźěći zawěsćić, zhotowjeja lěkarnje w Berlinje brěčki přećiwo zymicy same. „Tabletow kaž ibuprofen a paracetamol je dosć k dispoziciji. Ale aplikaciske formy za dźěći pobrachuja“, wujasni dźensa předsydka Berlinskeho apotekarskeho towarstwa Anke Rüdinger sćelakej RBB-inforadijo. Kolegojo, kotřiž su přez swjate dny dźěłali, běchu sej dočasnje składy zhotowili.
Wjele ludźi so zatepiło
Manila (dpa/SN). Při sylnych dešćach na Filipinach přez hody je znajmjeńša 25 ludźi zemrěło. Dalšich 26 ludźi je hišće zhubjenych, zdźěli dźensa narodny katastrofowy škit. Wjace hač 390 000 ludźi w 29 prowincach kupoweho stata su wot sylnych spadkow potrjecheni. Dobrych 81 000 ludźi dyrbješe swoje domy wopušćić. W přewažnje katolskim kraju, hdźež so hody tradicionelnje wulce swjeća, bě so patoržicu dešćować započało. Najwjace z dotal namakanych woporow su so zatepili.
Ličba ćěkancow jasnje přiběrała
Lodojty wichor je wulkim dźělam USA hody z blizzardami, woškrotom, ...
Za dalšimi pokazkami w kanalu pytali
Drježdźany/Berlin (dpa/SN). W padźe pokradnjenych juwelow z Drježdźanskeho Zeleneho wjelba je policija pytanje za dalšimi pokazkami w Berlinskim kanalu zakónčiła. „Pytanje smy nětko zastajili“, zdźěli wčera rěčnik policije. Něhdźe 20 nurjakow ze wšelakich zwjazkowych krajow je prěni a druhi hodowny dźeń w kanalu wobwoda Neukölln za dalšimi pokazkami pytało. Krótko do hód bě policija wulki dźěl před něhdźe třomi lětami pokradnjenych debjenkow w Berlinje zawěsćiła.
Informacije k pozadkam akcije w Berlinje pak policija žane podać nochce. „Hladajo na hłowne jednanje njemóžemy žane detaile mjenować, za čim pytamy abo hač smy něšto namakali“, rěčnik policije na naprašowanje wuswětli. Proces w padźe spektakularneho padustwa ma 10. januara w Drježdźanach pokročować. Krótko do hód postajeny jednanski termin bu chorosće sudnicy dla na spočatk noweho lěta přestorčeny.
