Aktiwisća klimoškitneje skupiny „Poslednja generacija“ su zawčerawšim pomnik za zakładny zakoń blisko Zwjazkoweho sejma w Berlinje z čornej substancu pomórali. Kaž policija wčera zdźěli, jednaše so wo lěpk za tapety a čornu barbu. Substanca bě ­podobna zemskemu wolijej. Aktiwisća wumjetuja zwjazkowemu knježerstwu, zo zakładny zakoń njedodźerža, dokelž žiwjenske zakłady a swobodu přichodnych generacijow nješkitaja. Nimo toho su woni z plakatami swoju kritiku zwuraznili. Foto: dpa/Sven Kaeuler

Ministrojo: Dobra kultura debatow

Montag, 06. März 2023 geschrieben von:
Meseberg (dpa/SN). Z diskusijemi wo energijowej změnje a digitalnej politice chcyše amplowa koalicija swoje klawsurne posedźenje na hrodźe Meseberg sewjernje Berlina dźensa zakónčić. Čłonojo kabineta so tam schadźuja, zo bychu wažne temy „w měrniwej atmosferje wobjednawali“, rjekny zwjazkowy kancler Olaf Scholz (SPD). K zahajenju rozmołwow je prezidentka komisije EU Ursula von der Leyen porěčała. Najebać mnohe zwady rěča ministrojo Zelenych a FDP wo „dobrej kulturje debatow“. „To wšědny dźeń častodosć jara derje funguje. Zjawnosć to tak njepytnje, dokelž wšak nikoho njezajimuje, hdyž so njewadźimy“, rjekny minister za ratarstwo Cem Özdemir (Zeleni). Poměr mjez stronami bě minjeny čas zwadow dla napjaty.

Znapřećiwjenja dawka dla

Montag, 06. März 2023 geschrieben von:

Drježdźany (dpa/SN). W sakskich financnych zarjadach je hač do kónca januara 30 317 znapřećiwjenjow k nowemu ležownostnemu dawkej dóšło. To wuchadźa z minjeny pjatk wozjewjeneho naprašowanja zapósłanca AfD w sakskim krajnym sejmje Norberta Meyera. Hač do kónca januara su wobsedźerjo ležownosćow 1,4 milionow deklaracijow zarjadam wotedali. To je kwota 75 procentow.

W Sakskej maja financne zarjady ně­hdźe dwaj milionaj imobilijow a ležownosćow posudźować. Dokładna suma ležownostneho dawka je wotwisna wot sadźbow komunow. Nowy wobličeny dawk maja wobsedźerjo wot 1. januara 2025 płaćić.

Klingbeil a Mützenich w Kijewje

Montag, 06. März 2023 geschrieben von:

Kijew (dpa/SN). Dobre lěto po ruskim nadpadźe na Ukrainu staj předsyda SPD Lars Klingbeil a frakciski šef strony w zwjazkowym sejmje Rolf Mützenich dźensa z wosebitym ćahom na swój prěni wopyt do ukrainskeje stolicy Kijewa dojěłoj. Tam chcyštaj so w běhu dnja ze zastupnikami ukrainskeho knježerstwa a parlamenta k rozmołwam zetkać.

SPD ma sej swojeje politiki napřećo Ruskej do zahajenja inwazije w Ukrainje dla chětro ćežko. Stronje tam wumjetuja, zo je ruskeho prezidenta Wladimira ­Putina lětdźesatki wopak posudźowała a zo je intensiwnu kooperaciju z Ruskej pěstowała. Klingbeil kaž tež Mützenich staj mjeztym zjawnje přiznałoj, zo staj so w tymle prašenju myliłoj. W decembru chcyła SPD swoju wonkownu politiku a tak tež swoje nastajenje k Ruskej na zjězdźe strony znowa definować. Dokładny program wopyta njejsu wozjewili.

Wobchad přiběra

Montag, 06. März 2023 geschrieben von:

Berlin (dpa/SN). Kaž z prognozy zwjazkoweho wobchadneho ministerstwa wuchadźa, budźe nakładny wobchad dale jasnje přiběrać, předewšěm na dróhach. Tole wujasni minjeny pjatk zwjazkowy wobchadny minister Volker Wissing (FDP). Tohodla sej wón žada, zo měli so awtodróhi spěšnišo twarić. Prognoza bu w nadawku ministerstwa zhotowjena. Tak wuchadźeja fachowcy z toho, zo nakładny wobchad hač do lěta 2051 přirunujo z lětom 2019 wo nimale połojcu přiběra. Na dróhach liča z rozrostom 54 procentow. Na kolijach budźe to prawdźepodobnje třećina wjace wobchada.

Za wosoby budźe awto najwažniša móžnosć so dale pohibować. Wutwar ­železniskeje syće a wodowych dróhow njedosahaja, Wissing wuswětli. „Trje­bamy wukonliwy a klimje přichileny neutralny wobchad na dróhach“, mi­nister wuzběhny. Tohorunja měli so planowanja za dróhi pospěšić. Na dróhach, hdźež so wobchad kopi, su nuznje rozrisanja trěbne.

W amplowej koaliciji knježi w zwisku ze spěšnymi planowanskimi jednanjemi za dróhi rozkora. Zeleni tole kategorisce wotpokazuja a chcedźa železnisku syć wutwarić.

To a tamne (06.03.23)

Montag, 06. März 2023 geschrieben von:

Poprawom bě w Hamburgu připowědźene, zo maja so zawčerawšim drasty markow darmotnje zajimcam rozdźělić. Powěsć je so po socialnych medijach ­rozšěriła a wjele młodostnych je wězo přišło. Kaž so na městnje wukopa, bě powěsć wopačna. Dokelž běchu přitomni přesłapjeni, započinachu randalěrować. Młodostni přichwatanych zastojnikow samo nadběhowachu. Kaž policija informuje, dotal jasne njeje, štó je wopačnu powěsć w interneće rozšěrił.

W składźišću za twarožk su so w Šwicarskej něhdźe 11 000 twarožkowych pokrutow zničili. Přičina njezboža minjeny štwórtk južnozapadnje Berna je njeznata. Něhdźe połojca twarožka słušeše towaršnosći Migros. Přiwšěm budźe w kupnicach Migros přichodnje dosć šwicarskeho twarožka Gruýere k dispoziciji, rěčnik towaršnosće kupcow změruje.

Zatwarja wjace klumpow

Freitag, 03. März 2023 geschrieben von:

Wiesbaden (dpa/SN). Naprašowanje za ćopłotnymi klumpami jako alternatiwa za tepjenje z wolijom abo płunom přiběra. W lońšich prěnich třoch kwartalach su předewzaća něhdźe 243 200 tajkich klumpow produkowali. To je nimale połojca wjace hač lěto do toho, zdźěli dźensa Zwjazkowy statistiski zarjad we Wiesbadenje. W lěće 2021 su ćopłotne klumpy we wjace hač połojcy nowych by­dlenskich domow zatwarili, lěta 2016 w třećinje wšěch twarjenjow.

Scholz we Washingtonje

Washington (dpa/SN). Zwjazkowy kancler Olaf Scholz (SPD) je na swój wopyt do Washingtona dolećał. Knježerstwowe lětadło „Konrad Adenauer“ přizemi wčera wječor na lětanišću Dulles International Airport. Dźensa chcyše so prezident USA Joe Biden ze Scholzom zetkać. Planowane bě hodźinu trajace zetkanje wobeju politikarjow. Hłowna tema měješe wójna w Ukrainje być. Medije kritizuja, zo njeje Scholz ani žurnalistow ani zastupnikow hospodarstwa sobu wzał a zo njeje žana nowinarska konferenca planowana.

Rozsud wo motorach přestorča

Šulerjo Franz, Lukas a Christian (wotlěwa) dźěłaja zhromadnje ze studentku fyziki Juliju Kuhn w laborje Braniborskeje Techniskeje uniwersity Choćebuz-Zły Komorow (BTU). Labor bu wčera oficialnje wotewrjeny. To je prěni labor Němskeho lětarstwoweho a swětnišćoweho centruma (DLR) w Braniborskej. Prěni šulerski labor bu w lěće­ 2000 załoženy. Po cyłej Němskej je nětko 16 tajkich zarjadnišćow. Foto: dpa/Patrick Pleul

Bätzing je reformow dla połny nadźije

Freitag, 03. März 2023 geschrieben von:

Drježdźany (dpa/SN). Němska biskopska konferenca žada sej hladajo na wójnu w Ukrainje wjace diplomatiskeho napinanja. Tak měła so wša próca nałožić, zo móhli wójnskej stronje wujednać, zdźělichu katolscy biskopja wčera w Drježdźanach, hdźež lětušu nalětnju konferencu wotzamknychu. „Wójna njepřinjese nihdy nanihdy měr“, wuzběhny předsyda biskopskeje konferency Georg Bätzing.

Ćežišćo konferency bě synodalny puć. Hižo přichodny tydźeń je pjata a poslednja synodalna zhromadźizna w lěće 2019 zahajeneho procesa reformow. Naposledk bě Vatikan namjety němskich katolskich wěriwych kritizował. Tohodla so reformerojo boja, zo dźěl biskopow namjetam přichodny tydźeń w Frankfurće nad Mohanom njepřihłosuje. Bätzing pak měni, zo běchu intensiwne rozmołwy w Drježdźanach jara spomóžne.

Selena woda podkopkow wina na mrětwje

Freitag, 03. März 2023 geschrieben von:
Frankfurt (dpa/SN). Masiwna mrětwa rybow we Wódrje loni w lěću je prawdźepodobnje sćěh selenych maćiznow, kotrež su pólske hórniske zawody do rěki pušćili. Tole pokazuje rozprawa wobswětoškitneje organizacije Greenpeace, kotraž předleži sćelakej SWR a nowinje Tagesspiegel. Po tym je selena woda z podkopkow we Wódrje masowe rozmnoženje jědojteje družiny algow zawinowała. Greenpeace bě wjacore tydźenje stajnje zaso wodu na městnach pruwowała, na kotrychž pólske hórniske zawody wotwody do rěki pušćeja. Njewotwisni fachowcy na polu rybarstwa maja rozprawu Greenpeace za wěrjomnu. Porno tomu pólske hórniske předewzaća dale twjerdźa, zo su wšitke wobswětoškitne předpisy nastupajo wotwody dodźerželi a zo maćizny, kotrež do rěki dóńdu, kruće na móžne škódne maćizny kontroluja.

Chróšćan Šulerjo

Neuheiten LND